• ກະຊວງການເງິນ
  • |
  • 2026-11-18
  • |
  • ວຽກວິຊາສະເພາະ

        ໃນວັນທີ 18 ພະຈິກ 2026 ກະຊວງການເງິນ ໄດ້ຈັດພິທີເປີດ ຫ້ອງກວດຄຸນນະພາບ ແຮ່ທາດກ່ອນການສົ່ງອອກຢູ່ປາຍທາງ ສະຖານີລົດໄຟ ວຽງຈັນໄຕ້ ໂດຍການເປັນປະທານຂອງ ທ່ານ ສັນຕິພາບ ພົມວິຫານ ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ, ມີຄະນະລັດຖະມົນຕີ, ຄະນະກຳການປົກຄອງ ນະຄອນຫຼວງວຽງຈັນ, ພ້ອມດ້ວຍຄະນະກົມ, ຜູ້ປະກອບການແຮ່ທາດ ແລະ ພາກສ່ວນກ່ຽວຂ້ອງ ເຂົ້າຮ່ວມ.

       ໃນພິທີດັ່ງກ່າວ, ທ່ານ ສັນຕິພາບ ພົມວິຫານ ມີຄໍາເຫັນວ່າ ວຽກງານການກວດກາຄຸນນະພາບແຮ່ທາດກ່ອນການສົ່ງອອກຢູ່ປາຍທາງ ແມ່ນມາດຕະການສຳຄັນໃນການຜັນຂະຫຍາຍມະຕິຂອງພັກ ແລະ ລັດຖະບານ ເພື່ອຮັບປະກັນການຈັດເກັບລາຍຮັບເຂົ້າງົບປະມານແຫ່ງລັດ ໃຫ້ຖືກຕ້ອງ, ໂປ່ງໃສ, ປະຢັດ, ມີປະສິດທິຜົນ ແລະ ຮັບປະກັນຜົນປະໂຫຍດສູງສຸດໃຫ້ແກ່ປະເທດຊາດ.

       ຜ່ານມາ ທາງກະຊວງການເງິນ ໄດ້ເປີດນໍາໃຊ້ສໍາເລັດແລ້ວ 07 ຈຸດ (ລວມທັງຈຸດສະຖານີວຽງຈັນໄຕ້) ໃນການຈັດຕັ້ງປະຕິບັດ ແລະ ໄດ້ຮັບຜົນຕອບຮັບທີ່ດີ ໂດຍສາມາດກວດກາ ແລະ ຄວບຄຸມການສົ່ງອອກແຮ່ທາດໄດ້ຢ່າງເປັນລະບົບ.

       ໃນຕອນທ້າຍ, ທ່ານ ສັນຕິພາບ ພົມວິຫານ ໄດ້ສະແດງຄວາມເຊື່ອໝັ້ນວ່າ ທຸກພາກສ່ວນ ຈະເຮັດໃຫ້ວຽກງານການກວດກາຄຸນນະພາບແຮ່ທາດກ່ອນການສົ່ງອອກຢູ່ປາຍທາງ ໄດ້ຮັບຜົນສຳເລັດອັນຈົບງາມ ແລະ ປະກອບສ່ວນອັນສຳຄັນເຂົ້າໃນການພັດທະນາເສດຖະກິດ-ສັງຄົມຂອງຊາດໃຫ້ເຕີບໃຫຍ່ເຂັ້ມແຂງຂຶ້ນເລື້ອຍໆ.

© 2025 Copyright: ກະຊວງການເງິນ, ສປປ ລາວ