ໃນວັນທີ 12 ພະຈິກ 2026 ທ່ານ ສັນຕິພາບ ພົມວິຫານ ຮອງນາຍົກລັດຖະມົນຕີ, ລັດຖະມົນຕີ ກະຊວງການເງິນ ພ້ອມດ້ວຍຄະນະ ໄດ້ຕ້ອນຮັບການເຂົ້າຢ້ຽມຂໍ່ານັບອໍາລາໜ້າທີ່ ຂອງທ່ານ ນາງ ເມແກນ ໂຈນຊ (H.E. Megan Jones) ເອກອັກຄະລັດຖະທູດອົດສະຕາລີ ປະຈຳ ສປປ ລາວ ເນື່ອງໃນໂອກາດສໍາເລັດໜ້າທີ່ທາງການທູດ. ໃນໂອກາດດັ່ງກ່າວ, ທ່ານ ຮອງນາຍົກລັດຖະມົນຕີ ໄດ້ສະແດງຄວາມຍ້ອງຍໍຊົມເຊີຍ ແລະ ຂອບໃຈເປັນຢ່າງສູງຕໍ່ການປະກອບສ່ວນອັນພົ້ນເດັ່ນຂອງທ່ານທູດ ໃນການເພີ່ມພູນຄູນສ້າງສາຍພົວພັນມິດຕະພາບ ແລະ ການຮ່ວມມືລະຫວ່າງສອງປະເທດໃຫ້ຂະຫຍາຍຕົວຢ່າງເລິກເຊິ່ງ. ຕະຫຼອດໄລຍະຜ່ານມາ, ທັງສອງຝ່າຍໄດ້ຮ່ວມມືກັນໃນຫຼາຍຂົງເຂດສໍາຄັນ ເຊັ່ນ: ການເມືອງ-ການຕ່າງປະເທດ, ການຄ້າ-ການລົງທຶນ, ການສຶກສາ, ການແກ້ໄຂບັນຫາລະເບີດບໍ່ທັນແຕກ (UXO) ແລະ ການປ່ຽນແປງດິນຟ້າອາກາດ. ການພົບປະຄັ້ງນີ້ຍັງໄດ້ຕີລາຄາສູງຕໍ່ຜົນສຳເລັດໃນການແລກປ່ຽນບົດຮຽນດ້ານການພັດທະນາ ແລະ ຄຸ້ມຄອງການເກັບລາຍຮັບຈາກການຂຸດຄົ້ນແຮ່ທາດ ຢູ່ປະເທດອົດສະຕາລີ ໃນໄລຍະທ້າຍເດືອນກັນຍາ 2026 ທີ່ຜ່ານມາ. ເຊິ່ງຝ່າຍລາວໄດ້ສະເໜີໃຫ້ອົດສະຕາລີສືບຕໍ່ໃຫ້ການຊ່ວຍເຫຼືອໃນການຍົກລະດັບຂີດຄວາມສາມາດດ້ານການຄຸ້ມຄອງແຮ່ທາດ ໂດຍສະເພາະການນຳໃຊ້ລະບົບຖານຂໍ້ມູນ ແລະ ເຕັກໂນໂລຊີເຂົ້າໃນການຕິດຕາມແຕ່ຂັ້ນຕອນການຂຸດຄົ້ນຈົນເຖິງການສົ່ງອອກໃຫ້ໄດ້ມາດຕະຖານສາກົນ. ນອກຈາກນີ້, ຍັງໄດ້ແລກປ່ຽນກ່ຽວກັບການກະກຽມຄວາມພ້ອມຂອງ ສປປ ລາວ ໃນການອອກຈາກສະຖານະພາບປະເທດດ້ອຍພັດທະນາ (LDC) ເຊິ່ງລັດຖະບານລາວໄດ້ວາງບຸລິມະສິດຮັບມືກັບສິ່ງທ້າທາຍໃນໄລຍະຂ້າມຜ່ານ ໂດຍສະເພາະຜົນກະທົບຕໍ່ຂະແໜງການຄ້າ ແລະ ການເງິນ ທີ່ອາດຈະເຮັດໃຫ້ສິດທິພິເສດທາງການຄ້າ ແລະ ທຶນຊ່ວຍເຫຼືອລ້າ (ODA) ຫຼຸດລົງ. ເຖິງຢ່າງໃດກໍຕາມ, ສະພາບລວມເສດຖະກິດມະຫາພາກຂອງ ສປປ ລາວ ຍັງສາມາດຮັກສາສະຖຽນລະພາບໄດ້ ໂດຍຄາດຄະເນວ່າການເຕີບໂຕທາງເສດຖະກິດ (GDP) ໝົດປີ 2026 ຈະຂະຫຍາຍຕົວໃນລະດັບ 5,1%. ເພື່ອສືບຕໍ່ສະໜັບສະໜູນແນວທາງການປະຕິຮູບເສດຖະກິດ ແລະ ພັດທະນາປະເທດ, ລັດຖະບານອົດສະຕາລີໄດ້ແຈ້ງແຜນງົບປະມານຊ່ວຍເຫຼືອ ສປປ ລາວ ສໍາລັບສົກປີ 2026-2027 ໃນມູນຄ່າລວມ 64,4 ລ້ານໂດລາອົດສະຕາລີ ເຊິ່ງເພີ່ມຂຶ້ນຈາກປີກ່ອນໜ້າ 9,4 ລ້ານໂດລາອົດສະຕາລີ. ທຶນດັ່ງກ່າວຈະຖືກສຸມໃສ່ບັນດາຂົງເຂດບຸລິມະສິດ ເປັນຕົ້ນແມ່ນ: ການຄຸ້ມຄອງການເງິນສາທາລະນະ, ການລົງທຶນດ້ານກະສິກໍາສະອາດ, ພະລັງງານສີຂຽວ, ການພັດທະນາພື້ນຖານໂຄງລ່າງເພື່ອການເຊື່ອມໂຍງການຄ້າ ແລະ ການພັດທະນາຊັບພະຍາກອນມະນຸດ ເພື່ອຊ່ວຍຊຸກຍູ້ໃຫ້ ສປປ ລາວ ບັນລຸເປົ້າໝາຍການພັດທະນາແບບຍືນຍົງຢ່າງມີປະສິດທິຜົນ.
