ໃນວັນທີ 3 ກັນຍາ 2026 ນີ້, ທີ່ຫ້ອງການ-ການເງິນເມືອງ ນາຊາຍທອງ ໄດ້ຈັດກອງປະຊຸມຝຶກອົບຮົມການນໍາໃຊ້ລະບົບຄຸ້ມຄອງການເງິນຕາແສງຜ່ານທາງເອເລັກໂຕຣນິກ, ໂດຍການເຂົ້າຮ່ວມເປັນປະທານຂອງທ່ານ ບຸນຊູ ພະວິເສດ ປະທານຄະນະກໍາມະການປົກຄອງເມືອງນາຊາຍທອງ ແລະ ທ່ານ ສິງຄໍາ ເຢຍລີເຮີ ຮອງຫົວໜ້າພະແນກການເງິນ ນະຄອນຫຼວງວຽງຈັນ; ມີຫົວໜ້າຫ້ອງການ-ການເງິນເມືອງ, ຕາງໜ້າຂະແໜງການທີ່ກ່ຽວຂ້ອງ, ພະນັກງານ ແລະ ໜ່ວຍງານເສດຖະກິດ-ການເງິນຈາກ ຕາແສງສີເກີດ, ຕາແສງອິໄລ ແລະ ຕາແສງໂພນທອງ ເຂົ້າຮ່ວມ.
ການຫັນວຽກງານການເງິນຕາແສງ ເຂົ້າສູ່ລະບົບທັນສະໄໝ ເປັນບາດກ້າວຫັນປ່ຽນທີ່ມີຄວາມສຳຄັນຢ່າງຍິ່ງ ການພັດທະນາເສດຖະກິດ-ສັງຄົມ, ການຫັນຕາແສງສູ່ລະບົບທັນສະໄໝ ແມ່ນເພື່ອເພີ່ມປະສິດທິພາບການຄຸ້ມຄອງ ແລະ ບໍລິຫານ ຊ່ວຍເຊື່ອມໂຍງ ຂໍ້ມູນຂ່າວສານລະຫວ່າງຂັ້ນສູນກາງ, ເມືອງ ແລະ ຕາແສງ ໃຫ້ເປັນລະບົບດຽວ ຫຼຸດຜ່ອນຄວາມຊັກຊ້າໃນການສົ່ງຕໍ່ເອກະສານ ແລະ ການລາຍງານຜົນ, ມີຄວາມຖືກຕ້ອງ ແລະ ເປັນຖານຂໍ້ມູນ ອຳນວຍຄວາມສະດວກໃນການເກັບກຳຂໍ້ມູນ ໃຫ້ມີຄວາມຊັດເຈນ, ຫຼຸດຜ່ອນຂັ້ນຕອນເອກະສານທີ່ຫຍຸ້ງຍາກ ມີເສີມຄວາມໂປ່ງໃສ ແລະ ສະດວກໃນການຕິດຕາມກວດກາການຈັດຕັ້ງປະຕິບັດຕ່າງໆ
 |  |
ໃນພິທີດັ່ງກ່າວ, ທ່ານ ທອງແດງ ສຸດທິວົງ ຫົວໜ້າຂະແໜງຄຸ້ມຄອງການບັນຊີ ພະແນກການເງິນ ນະຄອນຫຼວງວຽງຈັນ ໄດ້ສະເໜີແນະນໍາກ່ຽວກັບວິທີການນໍາໃຊ້ລະບົບຜ່ານເວັບໄຊ fdvcsubdistrict.la ໂດຍເລີ່ມແຕ່ລະຂັ້ນຕອນ ເປັນຕົ້ນ ຮຽນຮູ້ການເຂົ້ານໍາໃຊ້ລະບົບ, ວິທີການອອກໃບບິນຮັບເງິນ, ການຊໍາລະເງິນຜ່ານລະບົບທະນາຄານ ລວມທັງວິທີກວດກາບັນຊີປະຈໍາວັນຂອງຕາແສງ ແລະ ການສະຫຼຸບລາຍງານ. ທັງນີ້, ກໍເພື່ອໃຫ້ບັນດາພະນັກງານ, ໜ່ວຍງານທີ່ກ່ຽວຂ້ອງຂອງບັນດາຕາແສງຕ່າງໆ...ໄດ້ຮັບຮູ້, ເຂົ້າໃຈການນໍາໃຊ້ລະບົບດັ່ງກ່າວ ເພື່ອອໍານວຍຄວາມສະດວກ ໃຫ້ແກ່ພະນັກງານຕາແສງປະຕິບັດເກັບລາຍຮັບຂອງບັນດາຕາແສງເຂົ້າງົບປະມານໄດ້ຢ່າງສະດວກ ແລະ ມີຄວາມວ່ອງໄວ ທັນສະໄໝ, ສາມາດກວດສອບໄດ້. ພ້ອມທັງເປີດໂອກາດໃຫ້ຜູ້ເຂົ້າຮ່ວມໄດ້ແລກປ່ຽນຄໍາຄິດຄໍາເຫັນເພື່ອເພີ່ມປະສິດທິພາບໃນການຄຸ້ມຄອງວຽກງານຕາແສງ.
|  |
ໂອກາດດັ່ງກ່າວ, ຄະນະປະທານກອງປະຊຸມ ຍັງໄດ້ມີຄໍາເຫັນໂອ້ລົມຕໍ່ກອງປະຊຸມໂດຍໄດ້ຍົກໃຫ້ເຫັນຄວາມໝາຍຄວາມສໍາຄັນ ຂອງການຈັດຕັ້ງປະຕິບັດວຽກງານດັ່ງກ່າວ ເພາະຈະຊ່ວຍໃຫ້ພະນັກງານສາມາດລົງຂໍ້ມູນ, ສ້າງແຜນງົບປະມານ ແລະ ຈົດຮັບ-ຈົດຈ່າຍ ໄດ້ຢ່າງຖືກຕ້ອງ, ຮັບປະກັນໃຫ້ການຈັດເກັບລາຍຮັບ ແລະ ຄຸ້ມຄອງລາຍຈ່າຍ ມີຄວາມຄົບຖ້ວນ ແລະ ສາມາດກວດສອບໄດ້, ສ້າງຄວາມເຂັ້ມແຂງໃຫ້ແກ່ງົບປະມານຂັ້ນຮາກຖານທ້ອງຖິ່ນ ແລະ ເພີ່ມປະສິດທິພາບການບໍລິຫານວຽກງານການເງິນ ໃຫ້ມີຄວາມວ່ອງໄວຫຼຸດຜ່ອນຊ່ອງຫວ່າງ ການຮົ່ວໄຫຼ ແລະ ນໍາເອົາລາຍຮັບເຂົ້າງົບປະມານເພື່ອນຳໄປສ້າງສາພັດທະນາປະເທດຊາດຢ່າງຍືນຍົງ.
