ເພື່ອຮັບປະກັນໃຫ້ການຈັດຕັ້ງປະຕິບັດກົດໝາຍໃຫ້ມີຄວາມຈະແຈ້ງ, ເປັນເອກະພາບ ແລະ ສ້າງຄວາມສະດວກສູງສຸດໃຫ້ແກ່ພາກທຸລະກິດ, ໃນວັນທີ 25 ສິງຫາ 2026, ກົມສ່ວຍສາອາກອນ ໄດ້ຈັດກອງປະຊຸມທາບທາມຄຳຄິດເຫັນຕໍ່ ຮ່າງຄຳແນະນຳການຈັດຕັ້ງປະຕິບັດ ກົດໝາຍວ່າດ້ວຍອາກອນມູນຄ່າເພີ່ມ (VAT) ຮ່ວມກັບພາກທຸລະກິດ. ກອງປະຊຸມດັ່ງກ່າວ ໃຫ້ກຽດເປັນປະທານໂດຍ ທ່ານ ສຸພັນ ວິລະວົງ, ຮອງຫົວໜ້າກົມສ່ວຍສາອາກອນ, ໂດຍມີຜູ້ຕາງໜ້າຈາກສະພາການຄ້າ ແລະ ອຸດສາຫະກຳ, ບັນດາສະມາຄົມທຸລະກິດ, ບໍລິສັດ, ວິສາຫະກິດ, ຜູ້ປະກອບການ ແລະ ຂະແໜງການທີ່ກ່ຽວຂ້ອງເຂົ້າຮ່ວມ.
ກອງປະຊຸມຄັ້ງນີ້ມີຄວາມສຳຄັນຢ່າງຍິ່ງ ເນື່ອງຈາກອາກອນມູນຄ່າເພີ່ມ ເປັນແຫຼ່ງລາຍຮັບຫຼັກຂອງງົບປະມານແຫ່ງລັດ ແລະ ກ່ຽວພັນໂດຍກົງກັບການດຳເນີນທຸລະກິດ, ການຊື້-ຂາຍ, ການສະໜອງບໍລິການ, ການນຳເຂົ້າ-ສົ່ງອອກ ລວມທັງທຸລະກຳທາງເສດຖະກິດໃນຫຼາຍຮູບແບບ.
 |  |
ໃນກອງປະຊຸມ, ທ່ານ ສຸພັນ ວິລະວົງ ໄດ້ເນັ້ນໜັກວ່າ: ການມີກົດໝາຍທີ່ດີແມ່ນສຳຄັນ, ແຕ່ສິ່ງທີ່ສຳຄັນໄປກວ່ານັ້ນ ແມ່ນການເຮັດໃຫ້ບົດບັນຍັດຂອງກົດໝາຍສາມາດນຳໄປຈັດຕັ້ງປະຕິບັດໄດ້ແທ້, ມີຄວາມຈະແຈ້ງ, ເຂົ້າໃຈງ່າຍ, ປະຕິບັດໄດ້ສະດວກ ແລະ ເປັນເອກະພາບທົ່ວປະເທດ. ພ້ອມນີ້, ກົມສ່ວຍສາອາກອນ ໄດ້ໃຫ້ຄວາມສຳຄັນຕໍ່ການມີສ່ວນຮ່ວມຂອງພາກທຸລະກິດ ເຊິ່ງເປັນຜູ້ປະຕິບັດຕົວຈິງ, ເພາະຜູ້ປະກອບການຄືຜູ້ທີ່ຮູ້ດີກ່ຽວກັບຂໍ້ຫຍຸ້ງຍາກ, ຄວາມສັບສົນໃນຂັ້ນຕອນ ຫຼື ຕົ້ນທຶນດ້ານເອກະສານ.
 |  |  |
ເປົ້າໝາຍສຳຄັນຂອງກອງປະຊຸມ ຈຶ່ງບໍ່ພຽງແຕ່ “ເກັບອາກອນໃຫ້ໄດ້”, ແຕ່ແມ່ນ “ເກັບໃຫ້ຖືກຕ້ອງ, ເປັນທຳ, ໂປ່ງໃສ, ສະດວກ ແລະ ສ້າງຄວາມໝັ້ນໃຈໃຫ້ແກ່ຜູ້ເສຍອາກອນ”.
ໂດຍກອງປະຊຸມໄດ້ນຳເອົາປະເດັນທີ່ສຳຄັນມາປຶກສາຫາລື ມີດັ່ງນີ້ :
1. ຖານອາກອນ, ອັດຕາອາກອນ ແລະ ເວລາເກີດພັນທະອາກອນ
2. ການອອກ ແລະ ນຳໃຊ້ໃບເກັບເງິນ
ຫຼັກການຫັກອາກອນມູນຄ່າເພີ່ມຂາເຂົ້າ ແລະ ຂາອອກ
3. ການແຈ້ງ, ຊຳລະ ແລະ ການປັບປຸງໃບແຈ້ງອາກອນ
4. ການຂໍຄືນອາກອນ ແລະ ການນຳໃຊ້ລະບົບເອເລັກໂຕຣນິກ ເພື່ອຫຼຸດຜ່ອນຂັ້ນຕອນບໍລິຫານ.
ໃນຕອນທ້າຍ, ປະທານກອງປະຊຸມ ໄດ້ເນັ້ນຕື່ມວ່າ ພາກລັດ ແລະ ພາກທຸລະກິດ ບໍ່ຄວນຖືກສັງຄົມເບິ່ງວ່າຢູ່ຄົນລະຝ່າຍ, ເພາະເມື່ອທຸລະກິດສາມາດຂະຫຍາຍຕົວໄດ້ຢ່າງໝັ້ນຄົງ, ຖານລາຍຮັບຂອງລັດກໍຈະເຕີບໂຕຕາມໄປດ້ວຍ, ທັງສອງຝ່າຍ ຈຶ່ງຕ້ອງຮ່ວມກັນສ້າງກົນໄກການຈັດຕັ້ງປະຕິບັດທີ່ໂປ່ງໃສ ແລະ ກວດສອບໄດ້ຢ່າງແທ້ຈິງ.
