ໃນວັນທີ 18 ສິງຫາ 2026, ທີ່ກະຊວງການເງິນ ໄດ້ມີພິທີເຊັນສັນຍາຊື້-ຂາຍຊັບສິນຂອງລັດ ແລະ ສັນຍາເຊົ່າ-ສຳປະທານທີ່ດິນຂອງລັດ ໃນເນື້ອທີ່ຂອງ ໂຮງແຮມແມ່ຂອງ (ເກົ່າ) ລະຫວ່າງ ກົມຄຸ້ມຄອງຊັບສິນແຫ່ງລັດ ແລະ ບໍລິສັດ ເອັມວາຍ ກຣຸບ ຈຳກັດຜູ້ດຽວ (M.Y Group Sole Co., Ltd) ໂດຍການເຂົ້າຮ່ວມຂອງ ທ່ານ ທຳມະລົດ ຣາຊະພົນ ຫົວໜ້າກົມຄຸ້ມຄອງຊັບສິນແຫ່ງລັດ ແລະ ທ່ານ ສຸກສະໝອນ ສີຫາເທບ ປະທານບໍລິສັດ ເອັມວາຍ ກຣຸບ ຈຳກັດຜູ້ດຽວ ພ້ອມດ້ວຍພາກສ່ວນທີ່ກ່ຽວຂ້ອງທັງສອງຝ່າຍເຂົ້າຮ່ວມ.
ພິທີດັ່ງກ່າວ ໄດ້ຈັດຂຶ້ນພາຍຫຼັງທີ່ມີການຮັບຮອງເອົາຜົນການປະມູນ ຕາມຂໍ້ຕົກລົງຂອງທ່ານ ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ ສະບັບເລກທີ 2701/ກງ, ລົງວັນທີ 14 ກໍລະກົດ 2026 ວ່າດ້ວຍການຮັບຮອງເອົາຜົນການປະມູນຊື້ຊັບສົມບັດ ແລະ ປະມູນເຊົ່າ-ສໍາປະທານທີ່ດິນຂອງລັດ ເຊິ່ງກໍ່ແມ່ນບໍລິສັດ ເອັມວາຍ ກຣຸບ ເປັນຜູ້ຊະນະການປະມູນ ເພື່ອເຂົ້າພັດທະນາເນື້ອທີ່ດັ່ງກ່າວ
 |  |
ເຊິ່ງເນື້ອທີ່ໂຄງການ: ຕັ້ງຢູ່ບ້ານສີຖານເໜືອ, ເມືອງສີໂຄດຕະບອງ, ນະຄອນຫຼວງວຽງຈັນ (ບໍລິເວນໂຮງແຮມແມ່ຂອງເກົ່າ) ເຊິ່ງມີທີ່ດິນ 2 ຕອນ ມີເນື້ອທີ່ທັງໝົດ 8,892 ຕາແມັດ. ມູນຄ່າການຊື້ຊັບສິນ: ບໍລິສັດໄດ້ຕົກລົງຊື້ຊັບສິນຂອງລັດທີ່ຕິດພັນກັບທີ່ດິນໃນມູນຄ່າ 2,037,756.50 ໂດລາສະຫະລັດ.
ຄ່າເຊົ່າ-ສຳປະທານ: ມີມູນຄ່າເລີ່ມຕົ້ນ 452,000 ໂດລາສະຫະລັດຕໍ່ປີ ໂດຍມີອາຍຸສັນຍາ 50 ປີ ແລະ ຈະມີການປັບເພີ່ມຂຶ້ນ 5% ໃນທຸກໆ 5 ປີ.
ສໍາລັບວິໄສທັດການພັດທະນາ ບໍລິສັດ ເອັມວາຍ ກຣຸບ ມີແຜນທີ່ຈະຫັນປ່ຽນເນື້ອທີ່ຍຸດທະສາດແຄມຂອງນີ້ ໃຫ້ກາຍເປັນສູນລວມທຸລະກິດ ແລະ ການບໍລິການທີ່ທັນສະໄໝ ເຊິ່ງລວມມີ:
ໂຮງແຮມລະດັບມາດຕະຖານ,
ອາພາດເມັ້ນ (Apartment),
ຫ້ອງການໃຫ້ເຊົ່າ,
ຮ້ານອາຫານ ແລະ ຮ້ານຊັບພະສິນຄ້າຄົບວົງຈອນ ຫຼື ກິດຈະການອື່ນໆ.
ການຮ່ວມມືໃນຄັ້ງນີ້ ຖືເປັນບາດກ້າວສຳຄັນໃນການຫັນຊັບສິນຂອງລັດໃຫ້ກາຍເປັນທຶນຢ່າງມີປະສິດທິຜົນ, ທັງເປັນການຊຸກຍູ້ການຂະຫຍາຍຕົວຂອງເສດຖະກິດ ແລະ ປັບປຸງພື້ນຖານໂຄງລ່າງຂອງນະຄອນຫຼວງວຽງຈັນ ໃຫ້ມີຄວາມສວຍງາມ ແລະ ທັນສະໄໝຂຶ້ນຕື່ມ.
