ໃນວັນທີ 15 ພຶດສະພາ 2026,ໄດ້ຈັດກອງປະຊຸມ ຄົບຄະນະບໍລິຫານງານພັກກະຊວງ ການເງິນ ຄັ້ງທີ 02 ສະໄໝທີ IV ໂດຍການເປັນປະທານຂອງ ສະຫາຍ ສັນຕິພາບ ພົມວິຫານ ກໍາມະການສູນກາງພັກ, ເລຂາຄະນະບໍລິຫານງານພັກ, ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ, ມີສະຫາຍ ກໍາມະການສໍາຮອງສູນກາງພັກ, ຮອງເລຂາຄະນະບໍລິຫານງານພັກກະຊວງ, ພ້ອມດ້ວຍຄະນະບໍລິຫານງານພັກກະຊວງເຂົ້າຮ່ວມ.
 |  |
ກອງປະຊຸມຄັ້ງນີ້, ເປັນບາດກ້າວສໍາຄັນໃນການຜັນຂະຫຍາຍ ມະຕິກອງປະຊຸມໃຫຍ່ຂອງອົງຄະນະພັກກະຊວງ ສະໄໝທີ IV ໃຫ້ເປັນ ແຜນງານ ແລະ ໂຄງການລະອຽດລາຍງານບັນດາເອກະສານສໍາຄັນຕໍ່ກອງປະຊຸມ ເພື່ອຄົ້ນຄວ້າມີຄໍາຄິດ-ຄໍາເຫັນ ເພື່ອສືບຕໍ່ນໍາໄປຈັດຕັ້ງຜັນຂະຫຍາຍ ໂດຍສະເພາະບັນດາເນື້ອໃນມະຕິກອງປະຊຸມໃຫຍ່ຜູ້ແທນອົງຄະນະພັກກະຊວງ ຄັ້ງທີ IV, ແຜນການຈັດຕັ້ງຜັນຂະຫຍາຍມະຕິກອງປະຊຸມສະໄໝວິສາມັນເທື່ອທີ 1 ຂອງສະພາແຫ່ງຊາດ ຊຸດທີ X ທີ່ຕິດພັນກັບຂະແໜງການເງິນ.
ຈາກນັ້ນ, ໄດ້ຮັບຟັງການສັງເກດຕີລາຄາໂດຍສັງເຂບ ໃນການ ນໍາພາ-ຊີ້ນໍາ ຂອງບັນດາສະຫາຍຄະນະບໍລິຫານງານພັກກະຊວງການເງິນ ທີ່ຮັບຜິດຊອບ ຢູ່ແຕ່ລະຂົງເຂດ ເປັນຕົ້ນ: ຂົງເຂດລາຍຮັບ, ລາຍຈ່າຍ, ຂົງເຂດວຽກງານຮ່ວມມື ສາກົນ, ວຽກງານຫັນເປັນທັນສະໄໝ, ວຽກງານສະຖິຕິ ແລະ ວຽກງານປິ່ນອ້ອມອື່ນໆ.
 |  |
ໂອກາດນີ້ ສະຫາຍ ສັນຕິພາບ ພົມວິຫານ ໄດ້ມີຄຳເຫັນໂອ້ລົມ ເຖິງ ຜົນສໍາເລັດທີ່ຍາດມາໄດ້, ບັນດາຜົນງານທີ່ ນໍາສະເໜີ, ລາຍງານຕໍ່ກອງປະຊຸມ ຕ້ອງໄດ້ພິຈາລະນາຄວາມເປັນຈິງ. ພ້ອມນີ້ ສະຫາຍຍັງໃຫ້ທິດທາງ ແລະ ມາດຕະການໃນຕໍ່ໜ້າ ໃນການປະຕິບັດວຽກງານ ໂດຍມີຈຸດສຸມດັ່ງນີ້:
ດ້ານລາຍຮັບ: ສູ້ຊົນໃຫ້ລາຍຮັບງົບປະມານບໍ່ຫຼຸດ ໃນແຜນການປີ ໂດຍການຂະຫຍາຍຖານລາຍຮັບໃໝ່ (ອາກອນທີ່ດິນ, ສິ່ງແວດລ້ອມ), ເລັ່ງການຫັນເປັນທັນສະໄໝ ແລະ ນຳໃຊ້ໃບເກັບເງິນເອເລັກໂຕຣນິກໃຫ້ຄົບຖ້ວນ.
ດ້ານລາຍຈ່າຍ:ປັບປຸງຂອດການອະນຸມັດ ແລະ ເບີກຈ່າຍຜ່ານລະບົບທັນສະໄໝ ເພື່ອຄວາມໂປ່ງໃສ ແລະ ປະຢັດມັດທະຍັດ
ການຄຸ້ມຄອງໜີ້ສິນ: ເປັນເຈົ້າການໃນການປະເມີນ ແລະ ປັບໂຄງສ້າງໜີ້ສິນສາທາລະນະ, ຢຸດຕິການກູ້ຢືມທີ່ມີດອກເບ້ຍສູງ ແລະ ບໍ່ມີປະສິດທິຜົນ.
ການພັດທະນາບຸກຄະລາກອນ: ເນັ້ນການສ້າງພະນັກງານທີ່ມີຄຸນສົມບັດ ແລະ ຄວາມຮູ້ຄວາມສາມາດແທ້ຈິງ, ປະຕິບັດນະໂຍບາຍ "ມີຂຶ້ນ-ມີລົງ, ມີເຂົ້າ-ມີອອກ" ໂດຍຖືເອົາຜົນປະໂຫຍດສ່ວນລວມເປັນທີ່ຕັ້ງ
ການສ້າງເສດຖະກິດເອກະລາດ: ສືບຕໍ່ຜັນຂະຫຍາຍມະຕິ 04/ກມສພ ວ່າດ້ວຍການສ້າງເສດຖະກິດເອກະລາດ ເປັນເຈົ້າຕົນເອງ (ສອຈ) ໃຫ້ເປັນຮູບປະທໍາ.
ໃນຕອນທ້າຍຂອງກອງປະຊຸມ, ສະຫາຍໄດ້ຮຽກຮ້ອງໃຫ້ຄະນະພັກທຸກຂັ້ນ ຍົກສູງຄວາມຮັບຜິດຊອບທາງດ້ານການເມືອງ ແລະ ຈັດຕັ້ງປະຕິບັດຄຳຂວັນທີ່ວ່າ: “ຍົກສູງບົດບາດການນຳພາຂອງພັກ, ຕັ້ງໜ້າເປັນເຈົ້າຕົນເອງບຸກທະລຸ ຄຸ້ມຄອງການເງິນພາກລັດ ເປັນທັນສະໄໝ, ຍູ້ແຮງການພັດທະນາ ເສດຖະກິດ-ສັງຄົມແຫ່ງຊາດ ໃຫ້ມີຄວາມເຂັ້ມແຂງ, ສີຂຽວ ແລະ ຍືນຍົງ” ໃຫ້ປາກົດຜົນເປັນຈິງ.
 |  |
 |  |
