ໃນວັນທີ 23 ເມສາ 2026, ກົມພາສີ ກະຊວງການເງິນ ໄດ້ຈັດກອງປະຊຸມສໍາມະນາວຽກແຜນງານຜູ້ປະກອບການມາດຕະຖານ AEO ຕິດພັນກັບຂະແໜງການພາກລັດ ທີ່ກ່ຽວຂ້ອງ ໂດຍການເປັນປະທານຂອງທ່ານ ວົງວັນເພັງ ພູມສະຫວັນ ຮອງຫົວໜ້າກົມພາສີ, ມີບັນດາກົມອ້ອມຂ້າງກະຊວງການເງິນ ພ້ອມດ້ວຍຜູ້ຊ່ຽວຊານອົງການໄຈກາ ປະຈຳກົມພາສີ ແລະ ຜູ້ປະກອບການ ເຂົ້າຮ່ວມ.
ທ່ານ ວົງວັນເພັງ ພູມສະຫວັນ ໃຫ້ຮູ້ວ່າ: ການສໍາມະນາຄັ້ງນີ້ ມີຄວາມໝາຍ ແລະ ຄວາມສໍາຄັນຢ່າງຍິ່ງ ເນື່ອງຈາກວ່າ ການອໍານວຍຄວາມສະດວກທາງດ້ານການຄ້າ ເປັນປັດໄຈພື້ນຖານ ໃນການຂັບເຄື່ອນເສດຖະກິດຂອງປະເທດຊາດ ແລະ ເພື່ອດຶງດູດໃຫ້ຜູ້ປະກອບການ ເຂົ້າຮ່ວມແຜນງານAEO ດ້ວຍຄວາມສະມັກໃຈ. ວຽກງານການອໍານວຍຄວາມສະດວກທາງດ້ານພາສີ ແລະ ການຄ້າ ເປັນວຽກງານໜຶ່ງທີ່ປະກອບສ່ວນເຂົ້າໃນການຂະຫຍາຍຕົວຂອງລະບົບເສດຖະກິດ ໃນຍຸກຂອງການຄ້າເສລີໃນປັດຈຸບັນ, ຊຶ່ງ ສປປ ລາວ ມີພັນທະຕໍ່ອົງການການຄ້າໂລກ ແລະ ສາກົນ.
ແຜນງານຜູ້ປະກອບການມາດຕະຖານ AEO ເປັນການຮ່ວມມືກັນ ລະຫວ່າງ ພາກລັດ ແລະ ພາກຜູ້ປະກອບການ ເພື່ອຍົກສູງການຈັດຕັ້ງປະຕິບັດລະບຽບກົດໝາຍ, ຮັບປະກັນຄວາມປອດໄພທາງດ້ານການຄ້າສາກົນ ແລະ ແນໃສ່ເພີ່ມທະວີການອໍານວຍຄວາມສະດວກ, ເຊິ່ງເປັນລະບຽບການທີ່ອົງການພາສີໂລກສ້າງຂຶ້ນ ໃນຂອບມາດຕະຖານການຮັກສາຄວາມປອດໄພ ແລະ ການອໍານວຍຄວາມສະດວກທາງການຄ້າສາກົນ ຕາມກອບມາດຕະຖານ ຂອງອົງການພາສີໂລກ WCO SAFE Framework of Standards ແລະ ແນະນໍາໃຫ້ບັນດາປະເທດສະມາຊິກທົ່ວໂລກ ເພື່ອຈັດຕັ້ງປະຕິບັດວຽກແຜນງານAEO.
ສໍາລັບແຜນງານຜູ້ປະກອບການມາດຕະຖານ AEO ສປປ ລາວ ໄດ້ລິເລີ່ມຢ່າງເປັນທາງການນັບແຕ່ ປີ2019, ສະເພາະວຽກງານ AEO ໄດ້ມີນິຕິກໍາ ຄໍາແນະນຳຂອງກະຊວງການເງິນ ສະບັບເລກທີ 1159/ກງ, ລົງວັນທີ 18 ເມສາ 2019 ວ່າດ້ວຍການຄຸ້ມຄອງຜູ້ປະກອບການມາດຖານ AEO; ປັດຈຸບັນ ໄດ້ປັບປຸງນິຕິກໍາຄືນ ໂດຍນໍາໃຊ້ ສະບັບເລກທີ 1399/ກງ, ລົງວັນທີ 07 ພຶດສະພາ 2025, ຊຶ່ງກົມພາສີ ໄດ້ໂຄສະນາເຜີຍແຜ່, ຊຸກຍູ້ສົ່ງເສີມ ໃຫ້ບັນດາຜູ້ປະກອບການ ຢ່າງຕໍ່ເນື່ອງ, ເຊິ່ງມີຜູ້ປະກອບການສາມາດເຂົ້າຮ່ວມແຜນງານຜູ້ປະກອບການມາດຖານ AEOໄດ້ ຈໍານວນ 04 ບໍລິສັດ ຄື: ບໍລິສັດ ໂຕໂຍຕ້າລາວ ຈຳກັດ, ບໍລິສັດ ປີໂຕຣເທດ ນໍາເຂົ້າ-ສົ່ງອອກ ຈຳກັດ, ບໍລິສັດ ເບຍລາວ ຈໍາກັດ ແລະ ບໍລິສັດ ຫົວເວີຍເທັກໂນໂລຍີລາວ ຈໍາກັດ.
ຜ່ານການຈັດຕັ້ງປະຕິບັດແຜນງານ ເຫັນວ່າການຂັບເຄື່ອນວຽກແຜນງານຜູ້ປະກອບການມາດຕະຖານ AEO ຈະປະສົບຜົນສໍາເລັດ ຈໍາເປັນຕ້ອງອາໄສການຮ່ວມມືຢ່າງໃກ້ຊິດ ແລະ ຄວາມຮັບຜິດຊອບຮ່ວມກັນ ລະຫວ່າງພາກສ່ວນຜູ້ປະກອບການ, ລັດຖະການພາສີ ແລະ ບັນດາຂະແໜງການລັດ ທີ່ກ່ຽວຂ້ອງ. ແຜນງານຜູ້ປະກອບການມາດຕະຖານເອອີໂອ (AEO) ບໍ່ແມ່ນພຽງແຕ່ການລິເລີ່ມຂອງຂະແໜງພາສີເທົ່ານັ້ນ; ແຜນງານດັ່ງກ່າວ ແມ່ນຍຸດທະສາດລະດັບຊາດທີ່ຖືກອອກແບບ ເພື່ອຊຸກຍູ້ການແຂ່ງຂັນທາງດ້ານການຄ້າໃນທົ່ວໂລກ ແລະ ເສີມສ້າງຄວາມປອດໄພຂອງຕ່ອງໂສ້ການສະໜອງ ຂອງລັດຖະບານ ສປປ ລາວ.
