ໃນໂອກາດນີ້, ທ່ານ ເອກອັກຄະລັດຖະທູດ ປະຈຳ ສປປ ລາວ ໄດ້ລາຍງານ ກ່ຽວກັບ ບັນດາວຽກງານທີ່ ຣັດເຊຍ ໃຫ້ການຊ່ວຍເຫຼືອໃນໄລຍະຜ່ານມາ ທີ່ປະກອບສ່ວນສະໜັບສະໜູນໃຫ້ການຊ່ວຍເຫຼືອເຂົ້າໃນວຽກງານການພັດທະນາເສດຖະກິດ-ສັງຄົມ, ໂດຍສະເພາະ ການຮ່ວມມືໃນ 05 ຂົງເຂດເປັນຕົ້ນແມ່ນການຮ່ວມມືໃນຂົງເຂດການເງິນ-ທະນາຄານ, ການຄ້າ, ພະລັງງານ-ບໍ່ແຮ່, ເສດຖະກິດ ແລະ ທ່ອງທ່ຽວ. ນອກຈາກນັ້ນ, ຝ່າຍຣັດເຊຍ ໄດ້ທົບທວນຄືນກ່ຽວກັບຄວາມຄືບໜ້າການຈັດຕັ້ງປະຕິບັດການຮ່ວມມື ລະຫວ່າງ ລາວ-ຣັດເຊຍ ພາຍຫຼັງກອງປະຊຸມຄະນະກຳມະທິການຮ່ວມມືທາງດ້ານເສດຖະກິດ, ການຄ້າ, ວິທະຍາສາດ ແລະ ເຕັກນິກ ລາວ-ຣັດເຊຍ ຄັ້ງທີ 18 ໃຫ້ເປັນຮູບປະທຳ. ທ່ານ ເຊຣເກ ເຊດສະກີ ຍັງໄດ້ສະແດງເຈດຈໍານົງໃນການສືບຕໍ່ໃຫ້ການສະໜັບສະໜູນ ສປປ ລາວ ຜ່ານການປະສານງານທີ່ດິ ຂອງ ກະຊວງການເງິນ ກັບ ບັນດາຂະແໜງການກ່ຽວຂ້ອງ ໃນວຽກງານບູລິມະສິດ ເປັນຕົ້ນແມ່ນ ການຊ່ວຍເຫຼືອ ແລະ ສະໜັບສະໜູນຂອງລັດຖະບານ ຣັດເຊຍ ໃນຮູບແບບສອງຝ່າຍ. ພ້ອມນັ້ນ, ທ່ານ ຍັງໄດ້ແລກປ່ຽນກ່ຽວກັບການເພີ່ມທະວີແກ້ໄຂບັນຫາເສດຖະກິດ-ສັງຄົມ ທີ່ໄດ້ຮັບຜົນກະທົບ ຈາກ ລາຄາພະລັງງານທີ່ສູງຂຶ້ນ ເນື່ອງຈາກສະພາບຄວາມບໍ່ສະຫງົບຢູ່ຕາເວັນອອກກາງ. ໃນໂອກາດດຽວກັນ, ທ່ານ ສັນຕິພາບ ພົມວິຫານ ລັດຖະມົນຕີ ກະຊວງການເງິນ ໄດ້ສະແດງຄວາມຂອບໃຈຕໍ່ ລັດຖະບານຣັດເຊຍ ທີ່ໄດ້ໃຫ້ການຊ່ວຍເຫຼືອ ສປປ ລາວ ນັບແຕ່ ວັນທີ 7 ຕຸລາ 1960 ເປັນຕົ້ນມາ, ໂດຍສະເພາະ ການສະໜັບສະໜູນຂອງ ຣັດເຊຍ ຕໍ່ ສປປ ລາວ ທີເຫັນວ່າ ນັບມື້ນັບເພີ່ມຂຶ້ນຢ່າງຕໍ່ເນື່ອງ ໂດຍສະເພາະໃນຂົງເຂດການຮ່ວມມືດ້ານການເງິນ-ການທະນາຄານ, ດ້ານຄວາມໝັ້ນຄົງ, ສ້າງບຸກຄະລາກອນ, ເສີມຂະຫຍາຍການຮ່ວມມືທາງດ້ານເສດຖະກິດ-ການຄ້າ, ການລົງທຶນ, ອຸດສາຫະກຳ, ພະລັງງານ-ບໍ່ແຮ່, ຂົນສົ່ງ, ICT, ວິທະຍາສາດ ແລະ ການສຶກສາ, ວັດຖະນະທຳ ແລະ ສື່ມວນຊົນ, ການທ່ອງທ່ຽວ, ການປ່ຽນແປງດິນຟ້າອາກາດ, ສາທາລະນະສຸກ, ກະສິກຳ ແລະ ການຮ່ວມມືດ້ານອື່ນໆ ໃຫ້ແຕກດອກອອກຜົນ. ໃນຕອນທ້າຍ, ທ່ານ ລັດຖະມົນຕີກະຊວງການເງິນ ກໍສະແດງຄວາມຍິນດີ ແລະ ຊົມເຊີຍການມາຮັບໜ້າທີ່ຕຳແໜ່ງໃໝ່ຂອງ ທ່ານ ເຊຣເກ ເຊດສະກີ (Sergey Zhestkii) ເອກອັກຄະລັດຖະທູດ ແຫ່ງ ສະຫະພັນ ຣັດເຊຍ ປະຈຳ ສປປ ລາວ ແລະ ພ້ອມຈະສືບຕໍ່ໃຫ້ການຮ່ວມມືປະສານສົມທົບ ຕາມແຜນວຽກຕ່າງໆໃນຕໍ່ໜ້າໃຫ້ມີຄວາມສຳເລັດ ແລະ ໃຫ້ໄດ້ຮັບໝາກຜົນສູງສຸດ ໃຫ້ແກ່ສອງລັດຖະບານ ສປປ ລາວ ແລະ ຣັດເຊຍ.
