ໃນວັນທີ 11 ມີນາ 2026 ໄດ້ຈັດກອງປະຊຸມ ສະຫຼຸບຕີລາຄາການຈັດຕັ້ງປະຕິບັດວຽກງານ ຂອງສະຫະພັນກຳມະບານກະຊວງການເງິນ, ໂດຍການເປັນປະທານ ຂອງ ທ່ານ ພູວົງ ກິດຕະວົງ, ກຳມະການປະຈຳພັກກະຊວງ, ປະທານຄະນະກວດກາພັກກະຊວງ, ຮອງລັດຖະມົນຕີກະຊວງການເງິນ, ທ່ານ ທອງຈັນ ພູມີພັນ ຮອງປະທານສູນກາງສະຫະພັນ ກຳມະບານລາວ, ທ່ານ ອຸບັນ ສຸພິດາ ຄະນະປະຈຳພັກກະຊວງ, ຄະນະບໍລິຫານງານສູນກາງສະຫະພັນກຳມະບານລາວ, ປະທານສະຫະພັນ ກຳມະບານ ກະຊວງການເງິນ, ຕາງໜ້າຈາກໜ່ວຍກຳມະບານອ້ອມຂ້າງກະຊວງ ເຂົ້າຮ່ວມ.
ກອງປະຊຸມໄດ້ຮັບຟັງຮ່າງບົດສະຫຼຸບຜົນງານ 5 ປີ ( 2021-2025) ແລະ ທິດທາງແຜນການ 5 ປີ( 2026-2030)ເຊິ່ງເນື້ອໃນ ຮ່າງບົດລາຍງານໄດ້ຍົກໃຫ້ເຫັນຜົນງານອັນພົ້ນເດັ່ນ ຢ່າງເປັນຮູບປະທຳຫຼາຍດ້ານ ເຊິ່ງສະແດງອອກໃນຜົນສຳເລັດບັນດາແຜນງານ ບັນດາໜ້າວຽກຈຸດສຸມ ບັນລຸໄດ້ຕາມລະດັບຄາດໝາຍທີ່ວາງໄວ້.
ກອງປະຊຸມໄດ້ຜ່ານຂໍ້ຕົກລົງວ່າດ້ວຍການຮັບຮອງສະຫະພັນກຳມະບານກະຊວງການເງິນ ເປັນສະຫະພັນກຳມະບານ 5 ເປັນເຈົ້າຂອງສະຫະພັນກຳມະບານລາວ, ປະດັບຫຼຽນກາກຳມະບານໃຫ້ຮາກຖານ ແລະ ບຸກຄົນ ທີ່ມີຜົນງານ. ພ້ອມນັ້ນຍັງໄດ້ຜ່ານ ຂໍ້ຕົກລົງສະບັບເລກທີ 184/ຄຈປ.ກງ, ລົງວັນທີ 17 ກໍລະກົດ 2025 ວ່າດ້ວຍການແຕ່ງຕັ້ງ ແລະ ບົ່ງໂຕ ຄະນະບໍລິຫານງານ ສະຫະພັນກຳມະບານກະຊວງການເງິນ ຄະນະປະຈຳພັກຕົກລົງດັ່ງນີ້:
1. ສະຫາຍ ອຸບັນ ສຸພິດາ ຫົວໜ້າກົມຈັດຕັ້ງ ເປັນປະທານສະຫະພັນກຳມະບານກະຊວງການເງິນ;
2. ສະຫາຍ ຟອງສະມຸດ ຄຳວານວົງສາ ຮອງຫົວໜ້າສູນສະຖິຕິແຫ່ງຊາດ ເປັນຮອງປະທານ;
3. ສະຫາຍ ຂັນຄຳ ໄຊຍະວົງ ຮັກສາການຫົວໜ້າກົມກວດກາລັດ ເປັນຮອງປະທານ ແລະ ເປັນປະທານກວດກາ;
4. ສະຫາຍ ປອ ນິດຖາ ບຸບຜາ ຮອງຫົວໜ້າກົມຈັດຕັ້ງ ເປັນຄະນະ ແລະ ເປັນຮອງປະທານກວດກາ;
5. ສະຫາຍ ໜູເຊີຍ ພົມສີຈັນ ຫົວໜ້າກົມງົບປະມານ;
6. ສະຫາຍ ກະລຸນາ ນັນທະວົງດວງສິນ ຮອງຫົວໜ້າກົມແຜນການ;
7. ສະຫາຍ ປອ ສີສຸລາດ ລາດສະສີສິນ ຮອງຫົວໜ້າຫ້ອງການຄະນະກຳມະການຮ່ວມມືລາວ-ຈີນ;
8. ສະຫາຍ ສົມບູນ ແກ່ນປະເສີດ ຮອງຫົວໜ້າກົມປະເມີນ ແລະ ຈັດຊື້-ຈັດຈ້າງ;
9. ສະຫາຍ ສີໄວ ວິໄລຫານ ຫົວໜ້າພະແນກ ກົມສ່ວຍສາອາກອນ ເປັນຄະນະ
ໂອກາດນີ້, ທ່ານ ພູວົງ ກິດຕະວົງ ໄດ້ມີຄຳເຫັນວ່າ: ອົງການຈັດ ຕັ້ງມະຫາຊົນ ເປັນອົງປະກອບທີ່ສໍາຄັນຕິດພັນກັບທຸກຂົງເຂດຂອງກະຊວງການເງິນ ທັງເປັນປັດໃຈຍູ້ແຮງການຜັນຂະຫຍາຍ ແລະ ຈັດຕັ້ງປະຕິບັດບັນດານະໂຍບາຍ, ມະຕິ, ຄໍາສັ່ງ, ກົດໝາຍ ແລະ ລະບຽບການ ຂອງພັກ ແລະ ລັດ ລວມທັງວຽກງານວິຊາສະເພາະ ໃຫ້ມີຜົນສໍາເລັດ ແລະ ມີປະສິດທິຜົນ. ຄະນະບໍລິຫານງານຊຸດໃໝ່ ຕ້ອງນຳເອົາມະຕິກອງປະຊຸມໃຫຍ່ ຂອງອົງຄະນະພັກກະຊວງການເງິນໄປຈັດຕັ້ງຜັນຂະຫຍາຍ ແລະ ນຳເອົາມະຕິກອງປະຊຸມຂອງສະຫະພັນກຳມະບານຄັ້ງນີ້ ໄປ ຜັນຂະຫຍາຍລົງສູ່ລວງເລິກ; ຕາງໜ້າໃຫ້ຄະນະພັກ ຄະນະນໍາກະຊວງການເງິນ ມີຄໍາເຫັນຕໍ່ບາງວຽກງານຕົ້ນຕໍ ຂອງສະຫະພັນກໍາມະບານກະຊວງການເງິນ ດັ່ງນີ້:
- ເພີ່ມທະວີ ການສືກສາອົບຮົມ ການເມືອງ, ແນວຄິດ ໃຫ້ແກ່ພະນັກງານ-ສະມາຊິກກໍາມະບານ ໃຫ້ມີຄວາມຮູ້, ເຊື່ອມ ຊຶມ ແລະ ກຳແໜ້ນແນວທາງປ່ຽນແປງໃໝ່ຂອງພັກ, ເປັນແບບຢ່າງ, ຄວາມຮູ້-ຄວາມສາມາດ ຂອງພະນັກງານ-ສະມາຊິກກໍາມະບານ ໃຫ້ດີຂຶ້ນ;
- ເຊີດຊູນ້ຳໃຈຮັບຜິດຊອບ ຕໍ່ໜ້າທີ່ວຽກງານທີ່ໄດ້ຮັບມອບໝາຍ, ມີສະຕິລະວັງຕົວຕໍ່ກົນອຸບາຍປ່ຽນແປງໂດຍສັນຕິຂອງສັດຕູ ທີ່ຫວັງທຳລາຍມ້າງເພລະບອບການເມືອງຂອງພວກເຮົາຢູ່ສະເໝີ, ຮັກສາຄວາມສາ ມັກຄີເປັນເອກະພາບພາຍໃນ, ສະກັດກັ້ນ ແລະ ແກ້ໄຂ ບັນຫາປະກົດການຫຍໍ້ທໍ້ ພາຍໃນ ສະຫະພັນກໍາມະບານກະຊວງ, ໝູ່ມະຫາຊົນ ໃຫ້ຫຼຸດລົງເທື່ອລະກ້າວ;
- ຕີລາຄາ, ປະເມີນຜົນ ພະນັກງານ-ສະມາຊິກກໍາມະບານໃຫ້ເລິກເຊິ່ງ, ໂດຍຕິດພັນກັບການເປີດບັ້ນດຳເນີນຊີວິດ ການເມືອງ, ຕີລາຄາ ຄຸນນະພາບພະນັກງານ-ສະມາຊິກກໍາມະບານ ພ້ອມທັງ ມີມາດຕະການເດັດຂາດ ຕໍ່ພະນັກງານ-ສະມາຊິກກໍາມະບານ ທີ່ ເສຍທາດຂາດຄຸນ, ລະເມີດກົດລະບຽບຂອງພັກ-ລັດ, ຂາດຄວາມໂປ່ງໃສ, ຕ້ອງແກ້ໄຂທັນເວລາ ແລະ ເດັດຂາດຕໍ່ຜູ້ລະເມີດຕໍ່ລະບຽບຂອງ ພັກ ແລະ ກໍາມະບານ ຢ່າງເຂັ້ມງວດ;
- ເພີ່ມທະວີການ ນຳພາ, ຊີ້ນຳ ຂອງພັກ, ເສີມຂະຫຍາຍສິດເປັນເຈົ້າຂອງມະຫາຊົນ, ປະຕິບັດຫຼັກການ ລວມສູນປະຊາທິປະໄຕ, ມີຄວາມເປັນເອກະພາບໃນໝູ່ຄະນະ, ມີການມອບໝາຍວຽກງານ ໃຫ້ບຸກຄົນຮັບຜິດຊອບ ຢ່າງ ຈະແຈ້ງ, ຂາດຕົວ;
- ນຳພາ, ຊີ້ນຳ ຄະນະບໍລິຫານງານສະຫະພັນກໍາມະບານກະຊວງ, ຄະນະກໍາມະບານຮາກຖານ ໃນແຕ່ລະໄລຍະ ໃຫ້ມີ ແຜນການ, ແຜນງານ ລະອຽດ, ໃນການຈັດຕັ້ງປະຕິບັດວຽກງານ ແຕ່ລະໄລຍະ ມີການຕິດຕາມກວດກາ ສະຫຼຸບຖອດຖອນບົດຮຽນ ແລະ ລາຍງານໃຫ້ຄະນະພັກຂັ້ນເທິງເປັນປົກກະຕິ;
- ເອົາໃຈໃສ່ ບຳລຸງຍົກລະດັບ ດ້ານທິດສະດີການເມືອງ ແລະ ວິຊາສະເພາະ ໃຫ້ແກ່ພະນັກງານ ນຳພາ, ຄຸ້ມຄອງ, ພະນັກງານວິຊາການ ສືບທອດປ່ຽນແທນໃນຕໍ່ໜ້າ ໃຫ້ມີຄວາມຮູ້ຄວາມສາມາດ ເພື່ອຕອບສະໜອງຄວາມຮຽກຮ້ອງຕ້ອງການຂອງວຽກງານໃນໄລຍະໃໝ່;
- ຊຸກຍູ້ ສະມາຊິກກຳມະບານ ໃຫ້ເຂົ້າຮ່ວມເຄື່ອນໄຫວ ປະຕິບັດລະບອບດຳເນີນຮ່ວມຊີວິດການເມືອງໃຫ້ ເປັນປົກກະຕິ ແລະ ຕໍ່ເນື່ອງ.
