ຈຸດປະສົງຂອງ ການຈັດຊຸດຝຶກອົບຮົມໃນຄັ້ງນີ້ ເພື່ອເປັນການເສີມສ້າງຂີດຄວາມສາມາດ ໃຫ້ແກ່ພະນັກງານກົມກວດກາລັດ, ຂະແໜງກວດກາລັດພະແນກການເງິນ 07 ແຂວງ ແລະ ພະນັກງານເຮັດໜ້າທີ່ກວດກາລັດບັນດາກົມອ້ອມຂ້າງຂອງກະຊວງການເງິນ, ທີ່ເຮັດວຽກງານຕິດຕາມ, ກວດກາ ແລະ ການສິດສອນວຽກງານກວດກາ ໃຫ້ມີຄຸນນະພາບ ຕອບສະໜອງໄດ້ຕາມຄວາມຮຽກຮ້ອງຕ້ອງການຂອງໜ້າທີ່ວຽກງານ ວິຊາສະເພາະກວດກາ ໃນໄລຍະໃໝ່, ເປັນກຳລັງແຮງປະກອບສ່ວນຊ່ວຍຄະນະພັກ-ຄະນະນຳ ຂະແໜງການເງິນ ໃນການຕິດຕາມ, ກວດກາ, ສະກັດກັ້ນ, ຕ້ານການສໍ້ລາດບັງຫຼວງ ແລະ ແກ້ໄຂຜົນການກວດກາ-ກວດສອບ ໃນຂົງເຂດການເງິນແຕ່ສູນກາງຮອດທ້ອງຖິ່ນເພື່ອເຮັດໃຫ້ປະກົດການຫຍໍ້ທໍ້ລຸດລົງເທື່ອລະກ້າວ ແລະ ເພື່ອຮັບປະກັນຮອງຮັບແຜນປະຕິຮູບ ແລະ ແຜນພັດທະນາຂະແໜງການເງິນ 05 ປີ, ໃຫ້ສອດຄ່ອງກັບການຕັ້ງໜ້າຜັນຂະຫຍາຍມະຕິກອງປະຊຸມໃຫ່ຍ ຄັ້ງທີ XII ຂອງພັກ, ມະຕິກອງປະຊຸມໃຫ່ຍ ຄັ້ງທີ IV ຂອງອົງຄະນະພັກກະຊວງການເງິນ ໂດຍສະເພາະແມ່ນການສຸມໃສ່ຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ 2026 ຢ່າງເປັນຂະບວນຟົດຟື້ນ ຕິດພັນກັບການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງ ຍາກທາງດ້ານເສດຖະກິດ-ການເງິນ ຕາມຄໍາສັ່ງຂອງນາຍົກລັດຖະມົນຕີ ສະບັບເລກທີ 18/ນຍ, ລົງວັນທີ 16 ກັນຍາ 2021 ວ່າດ້ວຍການ ເພີ່ມທະວີການຄຸ້ມຄອງ ແລະ ຕ້ານການຮົ່ວໄຫຼຂອງ ລາຍຮັບງົບປະມານແຫ່ງລັດ. ວຽກງານກວດກາແມ່ນເປັນວຽກງານໜຶ່ງທີ່ສຳຄັນສອດຫ້ອຍ ແລະ ຄຽງຄູ່ກັບທຸກຂົງເຂດວຽກງານ ເປັນວຽກງານໜຶ່ງທີ່ຫຍຸ້ງຍາກລະອຽດອ່ອນ, ແຕ່ມີບົດບາດສຳຄັນຫຼາຍ ເພາະວຽກງານກວດກາເປັນເຄື່ອງມືວັດແທກຜົນສຳເລັດການນຳພາຂອງພັກ ແລະ ການຈັດຕັ້ງປະຕິບັດລະບຽບກົດໝາຍຂອງລັດ, ທັງແມ່ນມາດຕະການຕົ້ນຕໍໃນການກະຕຸກ, ຊຸກຍູ້ ໃນການຜັນຂະຫຍາຍ ແລະ ຈັດຕັ້ງປະຕິບັດແນວທາງນະໂຍບາຍຂອງພັກ, ກົດໝາຍຂອງລັດ ໃຫ້ມີປະສິດຕິຜົນ, ມີຄວາມສັກສິກ, ໜັກແໜ້ນ, ເຂັ້ມແຂງ. 
ການຝຶກອົບຮົມໃນຄັ້ງນີ້, ຈະໄດ້ດຳເນີນເປັນເວລາ 5 ວັນ, ນັບແຕ່ວັນທີ 02-06 ມີນາ 2026 ເຊິ່ງຈະໄດ້ລົງເລິກ 3ຫົວຂໍ້ສຳຄັນ ຄື: ວຽກງານກວດກາລັດ (ກວດກາການເງິນ ແລະ ກວດກາການລົງທຶນ); ວຽກງານການຕິດຕາມ (ກວດກາການປະຕິບັດຜົນການກວດກາ) ແລະ ວຽກງານການຕິດຕາມ(ກວດກາການປະຕິບັດຜົນການກວດສອບ)
ໂອກາດດັ່ງກ່າວ ປະທານກອງປະຊຸມ ຍັງໄດ້ຮຽກຮ້ອງມາຍັງບັນດານັກສຳມະນາກອນ ແລະ ວິທະຍາກອນ ຈົ່ງພ້ອມກັນເອົາໃຈໃສ່ໃນການ ຄົ້ນຄວ້າ, ຮໍ່າຮຽນ, ປະກອບຄວາມຄິດຄວາມເຫັນ, ແລກປ່ຽນຢ່າງຕັ້ງໜ້າ ເພື່ອນຳເອົາບົດຮຽນດັ່ງກ່າວໄປປັບປຸງນຳໃຊ້ເຂົ້າໃນວຽກງານຕົວຈິງ ເຮັດໃຫ້ວຽກງານກວດກາ ມີຄຸນນະພາບ ນັບມື້ນັບເຂັ້ມແຂງຂຶ້ນເປັນກ້າວໆ.
