ທ່ານ ບົວວັງ ອາຕະນາພອນ ພາສີ ປະຈຳນະຄອນຫຼວງວຽງຈັນ, ໄດ້ຂຶ້ນຜ່ານບົດສະຫຼຸບການຈັດຕັ້ງປະຕິບັດວຽກງານ ປະຈຳປີ 2025 ແລະ ທິດທາງແຜນການ ປີ 2026 ຂອງພາສີປະຈຳນະຄອນຫຼວງວຽງຈັນ. ເຊິ່ງພາສີ ປະຈຳນະຄອນຫຼວງວຽງຈັນ ແມ່ນກົງຈັກໜື່ງທີ່ເປັນເສນາທິການໃຫ້ແກ່ກົມພາສີ ກະຊວງການເງິນ ແລະ ອົງການຄະນະປົກຄອງນະຄອນຫຼວງວຽງຈັນ ໃນການຈັດຕັ້ງປະຕິບັດແຜນຍຸດທະສາດ, ກົນໄກຄຸ້ມຄອງວຽກງານວິຊາສະເພາະພາສີ ຢູ່ໃນຂອບເຂດຄວາມຮັບຜິດຊອບຂອງຕົນ ຕາມກົດໝາຍວ່າດ້ວຍພາສີ ແລະ ລະບຽບການອື່ນໆ. ການຈັດເກັບແຜນລາຍຮັບ ປີ 2025 ຕົວເລກຕາມແຜນ 7.219 ຕື້ກວ່າກີບ ຜ່ານການຈັດຕັ້ງປະຕິບັດ ຕົວຈິງ ສາມາດຈັດເກັບລາຍຮັບ ໄດ້ 9.459 ຕື້ກວ່າກີບ ເທົ່າກັບ 131.04%, ທຽບໃສ່ແຜນການປີ ປະຕິບັດໄດ້ເກີນແຜນ 33.23% ເທົ່າກັບ 2.359 ຕື້ກວ່າກີບ. ໃນນັ້ນ ລາຍຮັບ ພາສີ-ອາກອນ ທີ່ຈັດເກັບໄດ້ເກີນແຜນ ຕົ້ນຕໍ່ໄດ້ມາຈາກ ນໍ້າມັນເຊື້ອໄຟ ຈັດເກັບໄດ້ 2.324 ຕື້ກວ່າກີບ, ເພີ້ມຂື້ນ 69.72% ເທົ່າກັບ 129 ລ້ານກີບ; ດ້ານພາຫະນະ ຈັດເກັບໄດ້ 3.987 ຕື້ກວ່າກີບ, ເພີ້ມຂື້ນ 138.21% ເທົ່າກັບ 1.629 ຕື້ກວ່າກີບ; ສິ້ນສ່ວນອາໄຫລ່ ຈັດເກັບໄດ້ 67,784 ລ້ານກວ່າກີບ ເພີ້ມຂື້ນ 14.58% ເທົ່າກັບ 8,625 ລ້ານກວ່າກີບ; ອຸປະກອນເຄື່ອງກໍ່ສ້າງ ຈັດເກັບໄດ້ 53,479 ລ້ານກວ່າກີບ, ເພີ້ມຂື້ນ 25.89% ເທົ່າກັບ 10,998 ລ້ານກວ່າກີບ; ເຄື່ອງໄຟຟ້າ ຈັດເກັບໄດ້ 60,313 ລ້ານກວ່າກີບ, ເພີ້ມຂື້ນ 30.10% ເທົ່າກັບ 13,954 ລ້ານກວ່າກີບ; ເຄື່ອງອຸປະໂພກ-ບໍລິໂພກ ຈັດເກັບໄດ້ 1.784 ຕື້ກວ່າກີບ, ເພີ້ມຂື້ນ 6.10% ເທົ່າ 102,589 ລ້ານກີບ%ແລະ ຄ່າທໍານຽມຕ່າງໆ ຈັດເກັບໄດ້: 60,705 ລ້ານກີບ, ເພີ້ມຂື້ນ 55.56% ເທົ່າກັບ261;134 ລ້ານກີບ.% ທ່ານ ບົວວັງ ອາຕະນາພອນ ໄດ້ກ່າວຕື່ມວ່າ ທິດທາງແຜນການ ແລະ ວຽກຈຸດສຸມໃນປີ 2026 ພາສີ ປະຈໍານະຄອນຫຼວງວຽງຈັນ ໄດ້ຮັບແຜນການຈັດເກັບລາຍຮັບທັງໝົດ 11.779 ຕື້ກີບ, ເຊິ່ງເປັນຕົວເລກສູງສົມຄວນ, ເຖິງຢ່າງໃດກໍ່ຕາມເພື່ອຮັບປະກັນເຮັດໃຫ້ການປະຕິບັດແຜນລາຍຮັບ ປີ 2026 ໃຫ້ບັນລຸໄດ້ຕາມຄາດໝາຍທີ່ວາງໄວ້ ພາສີປະຈຳນະຄອນຫຼວງວຽງຈັນ ຈະໄດ້ສຸມໃສ່ທິດທາງ ແລະ ມາດຕະການຕົ້ນຕໍ່ ດັ່ງນີ້: 1) ເພີ້ມທະວີສຶກສາອົບຮົມແນວທາງການເມືອງໃຫ້ພະນັກງານຂະແໜງພາສີປະຕິບັດໜ້າທີດ້ວຍຄວາມຮັບຜິດຊອບສູງ; 2) ໂຄສະນາເຜີຍແຜ່ກົດໝາຍ ແລະ ນິຕິກຳລຸ່ມກົດໝາຍ ກ່ຽວກັບຂະແໜງການເງິນ ໃຫ້ທົ່ວເຖິງ; 3) ສ້າງກົນໄກການຄຸ້ມຄອງ, ຕິດຕາມ ແລະ ກວດກາການເຄື່ອນຍ້າຍຕູ້ສິນຄ້າຈາກສະຖາທີ່ວຽງຈັນໃຕ້ມາຍັງທ່າບົກທ່ານາແລ້ງ; 4) ເລັ່ງສະສາງສິນຄ້າ, ເຄື່ອງຂອງ ແລະ ພາຫະນະຄ້າງສາງຫຼາຍປີ, ເລັ່ງທວງການຊຳລະສະສາງໃບແຈ້ງພາສີລະບອບຄໍ້າປະກັນ IM8 ເຊິ່ງຄ້າງໃນລະບົບ; 5) ຈັດຕັ້ງປະຕິບັດລະບົບການແຈ້ງພາສີປະຕູດຽວແຫ່ງຊາດ ອາຊີກູດາ ພາດສ (NSWA+) ຢູ່ດ່ານພາສີສາກົນ ແລະ ອື່ນໆ. ໃນໂອກາດດັ່ງກ່າວ ທ່ານ ພູເຂົາຄຳ ວັນນະວົງໄຊ ຫົວໜ້າກົມພາສີ ໄດ້ສະແດງຄວາມຊົມເຊີຍຕໍ່ຜົນງານຍາດມາໄດ້ໃນປີຜ່ານມາ ແລະ ໄດ້ເນັ້ນໃຫ້ ພາສີ ປະຈຳນະຄອນຫຼວງວຽງຈັນ ຈົ່ງເອົາໃຈໃສ່ເພີ່ມທະວີຄວາມເປັນເຈົ້າການ, ຄວາມຮັບຜິດຊອບໃນທຸກດ້ານ ເພື່ອສຳເລັດຕໍ່ໜ້າທີ່ການເມືອງທີ່ໄດ້ຮັບມອບໝາຍ ປະຕິບັດແຜນການຈັດເກັບລາຍຮັບ ໃນສົກປີ 2026 ໃຫ້ໄດ້ຕາມແຜນການ ຫລື ລື່ນແຜນການທີ່ທາງພາສີ ປະຈຳນະຄອນຫຼວງວຽງຈັນ ໄດ້ວາງໄວ້. 
