ກົມຄຸ້ມຄອງວິສາຫະກິດການເງິນ ສະຫຼຸບຕີລາຄາການຈັດຕັ້ງປະຕິບັດວຽກງານ ປະຈຳປີ 2025 ແລະ ທິດທາງແຜນການ ປີ 2026

        ໃນວັນທີ 08 ມັງກອນ 2026  ກົມຄຸ້ມຄອງວິສາຫະກິດການເງິນ (ຄວກ) ກະຊວງການເງິນ ໄດ້ເປີດກອງປະຊຸມສະຫຼຸບຕີລາຄາການຈັດຕັ້ງປະຕິບັດວຽກງານ ປະຈຳປີ 2025 ແລະ ທິດທາງແຜນການ ປິີ 2026 ຂື້ນ, ໂດຍການເປັນປະທານຂອງທ່ານ ໄພທູນ ທ່ຽງລະໄມ ຫົວໜ້າກົມຄຸ້ມຄອງວິສາຫະກິດການເງິນ, ມີຄະນະກົມ, ຄະນະພະແນກ ພ້ອມດ້ວຍວິຊາການຂອງກົມເຂົ້າຮ່ວມ.

       ໃນກອງປະຊຸມໄດ້ຮັບຟັງການສະຫຼຸບລາຍງານວຽກງານທີ່ພົ້ນເດັ່ນ, ຂໍ້ຄົງຄ້າງໃນການປະຕິບັດໜ້າທີ່ວຽກງານ ປະຈຳປີ 2025 ເເລະ ກຳນົດທິດທາງແຜນການ ປີ 2026 ຂອງວຽກງານຄຸ້ມຄອງວິສາຫະກິດການເງິນ ບັນດາພະເເນກອ້ອມຂ້າງກົມ ທັງ 04 ພະເເນກ, ເຊິ່ງກອງປະຊຸມໄດ້ມີການປຶກສາຫາລື ເເລະ ເເລກປ່ຽນຄຳຄິດເຫັນ ຕໍ່ກັບບັນ​ດາ​ໜ້າ​ວຽກຕົ້ນຕໍ່​ທີ່​ຈະຕ້ອງ​ໄດ້​ສືບ​ຕໍ່ຈັດຕັ້ງ​ປະ​ຕິ​ບັດ​ໃນ​ປີ 2026 ເປັນ​ຕົ້ນ:

1. ແຜນການຄຸ້ມຄອງວຽກງານການປະກັນໄພໃນຕໍ່ໜ້າ ເພື່ອຍົກບົດບາດພະເເນກຄຸ້ມຄອງການປະກັນໄພຂຶ້ນເປັນສຳນັກງານ ເພື່ອເພີ່ມມາດຕະຖານການຄຸ້ມຄອງ ທຽບເທົ່າພາກພື້ນ-ສາກົນ ເເລະ ສ້າງຂະເເໜງວຽກງານການປະກັນໄພ ໃຫ້ເປັນໜຶ່ງເສົາຄໍ້າດ້ານເສດຖະກິດເເຫ່ງຊາດ; 
2. ການສ້າງນິຕິກຳເປັນຫຼັກ ເພື່ອສ້າງຄວາມເຂັ້ມແຂງໃນການຄຸ້ມຄອງທຸລະກິດກາຊີໂນຢ່າງລວມສູນ ແລະ ສຸມໃສ່ການຈັດຕັ້ງຍຸດທະສາດຕີຖອຍຫວຍເຖື່ອນ ເເລະ ຄຸ້ມຄອງຫວຍໃນໄລຍະໃໝ່ ເພື່ອປ່ຽນແທນກົນໄກໃນປັດຈຸບັນ;
3. ສ້າງນິຕິກໍາ ເພື່ອຄຸ້ມຄອງທຸລະກິດລະບົບສາງສິນຄ້າ ເເລະ ຊິງສັ່ງທັນສະໄໝ ໃຫ້ມີຄວາມເຂັ້ມເເຂງ, ໂລ່ງລ່ຽນ ເເລະ ເປັນຖານລາຍຮັບໃໝ່ໃຫ້ເເກ່ລັດຖະບານ ສູ້ຊົນ​ຄົ້ນ​ຄວ້າ​ສ້າງ​ຂໍ້​ຕົກ​ລົງ ຫຼື ຄຳເເນະນຳ​​ຂອງ​ກະ​ຊວງ​ການ​ເງິນ ​ໃນ​ການ​ອະ​ນຸ​ຍາດ ແລະ ​ຄຸ້ມ​ຄອງ​ບໍ​ລິ​ສັດ​ປະ​ເມີນ​ມູນ​ຄ່າ​ຊັບ​ສິນ ໃຫ້ສຳເລັດ;
4. ຄົ້ນຄວ້າກຳນົດທິດທາງການຂຶ້ນແຜນງົບປະມານແຫ່ງລັດ ບ້ວງລາຍຈ່າຍລົງທຶນແບບຈຸດສຸມ ເເລະກົນໄກເກັບເງິນຜ່ານທາງ ໃນໂຄງການຊຸກຍູ້ສົ່ງເສີມການກໍ່ສ້າງ ແລະສ້ອມແປງທາງໃນໄລຍະໃໝ່ ຕາມມະຕິຂອງສະພາເເຫ່ງຊາດ ສະບັບເລກທີ 165/ສພຊ, ລົງວັນທີ 26 ມິຖຸນາ 2025 ເເລະ ມະຕິຂອງລັດຖະ ບານ ສະບັບເລກທີ 10/ລບ, ລົງວັນທີ 01 ກັນຍາ 2025.

ພ້ອມນັ້ນ, ກອງປະຊຸມໄດ້ມີການປະກອບຄຳຄິດຄຳເຫັນໃສ່ບົດສະຫຼຸບການຈັດຕັ້ງປະຕິບັດການເຄື່ອນໄຫວວຽກງານ ປະຈຳປີ 2025 ແລະ ທິດທາງແຜນການ 2026.