ໃນທ້າຍອາທິດຜ່ານມານີ້, ຄະນະພັກຮາກຖານພະແນກການເງິນ ປະຈຳແຂວງສະຫວັນນະເຂດ ໄດ້ຈັດກອງປະຊຸມໃຫຍ່ ຄັ້ງທີ VIII ຂອງຕົນຂຶ້ນ ທີ່ສະໂມສອນຂອງຫ້ອງວ່າການແຂວງສະຫວັນນະເຂດ. ໂດຍໃຫ້ກຽດເຂົ້າຮ່ວມເປັນປະທານຂອງ ສະຫາຍ ບຸນໂຈມ ອຸບົນປະເສີດ ກຳມະການສູນກາງພັກ ເລຂາພັກແຂວງ, ເຈົ້າແຂວງສະຫວັນນະເຂດ ແລະ ສະຫາຍ ນາງ ບົວສະຫວັນ ລຸຍບົວທອງ ກຳມະການພັກແຂວງ ເລຂາຄະນະພັກຮາກຖານ ຫົວໜ້າພະແນກການເງິນ ປະຈຳແຂວງສະຫວັນນະເຂດ, ມີບັນດາສະຫາຍຈາກຄະນະຈັດຕັ້ງແຂວງ, ຄະນະກວດກາພັກ-ລັດແຂວງ ພ້ອມດ້ວຍບັນດາສະຫາຍຜູ້ແທນສົມບູນ ແລະ ແຂກຖືກເຊີນຈາກພະແນກການອ້ອມຂ້າງແຂວງເຂົ້າຮ່ວມ.
ໃນກອງປະຊຸມ, ສະຫາຍ ນາງ ບົວສະຫວັນ ລຸຍບົວທອງ ໄດ້ກ່າວເປີດກອງປະຊຸມຢ່າງເປັນທາງການ, ຈາກນັ້ນ ສະຫາຍ ບຸນເພັງ ເຂັມມາລາ ຮອງເລຂາຄະນະພັກຮາກຖານ ກໍ່ໄດ້ຜ່ານຮ່າງບົດລາຍງານການເມືອງຕໍ່ກອງປະຊຸມ ພ້ອມທັງຜ່ານທິດທາງແຜນການໃນ 5 ປີຕໍ່ໜ້າ ເຊິ່ງເຫັນໄດ້ການຈັດຕັ້ງປະຕິບັດວຽກງານ ໃນໄລຍະຜ່ານມາ ຄະນະພັກຮາກຖານພະແນກການເງິນແຂວງ ໄດ້ເອົາໃຈໃສ່ໃນການປັບປຸງກໍ່ສ້າງພັກຕາມ 5 ຫຼັກການ 3 ທິດນຳ, ເຮັດໃຫ້ຖັນແຖວສະມາຊິກພັກໄດ້ຮັບການປັບປຸງ, ກໍ່ສ້າງທັງປະລິມານ ແລະຄຸນນະພາບຕໍ່ເນື່ອງ ພາຍຫຼັງປັບປຸງກົງຈັກການຈັດຕັ້ງໂຮມ 2 ພະແນກ ເຫັນໄດ້ກົງຈັກການຈັດຕັ້ງມີຄວາມກະທັດຮັດ ແລະຈຳນວນສະມາຊິກພັກໃນຮາກຖານເພີ່ມຂຶ້ນ.
ປະຈຸບັນຄະນະພັກຮາກຖານພະແນກການເງິນແຂວງ ປະກອບມີ 5 ໜ່ວຍພັກ, ມີສະມາຊິກພັກທັງໝົດ 184 ສະຫາຍ, ຍິງ 82 ສະຫາຍ, ນຳພາ-ຊີ້ນຳໃນ 7 ຂະແໜງການ ຄື: ຂະແໜງຈັດຕັ້ງ ແລະ ບໍລິຫານ, ຂະແໜງກວດກາ, ຂະແໜງງົບປະມານແຫ່ງລັດ, ຂະແໜງແຜນການ ແລະ ສະຖິຕິ, ຂະແໜງຈັດຊື້-ຈັດຈ້າງ, ຂະແໜງຄຸ້ມຄອງຊັບສິນແຫ່ງລັດ ແລະ ຂະແໜງຄຸ້ມຄອງບັນຊີ. ໃນໄລຍະ 5 ປີຜ່ານມາ, ພະແນກການເງິນປະຈຳແຂວງໄດ້ຄົ້ນຄວ້າສ້າງແຜນເຄື່ອນໄຫວ ແລະ ສະຫຼຸບສັງລວມວຽກງານ ຂອງພະແນກການເງິນ ເປັນປະຈຳ ເພື່ອລາຍງານໃຫ້ຫົວໜ້າຫ້ອງວ່າການແຂວງ, ຄະນະຈັດຕັ້ງແຂວງ ແລະ ຫ້ອງການ ກະຊວງການເງິນ ຢ່າງເປັນປົກກະຕິ, ສຳເລັດການເຂົ້າຮ່ວມເປັນຄະນະກຳມະການຕິດຕາມກວດກາໂຄງການລົງທຶນຂອງລັດແຕ່ຫົວທີ ປະຈຳປີ 2021 ແລະ 2022 ພາຍໃນແຂວງສະຫວັນນະເຂດ ລວມມີ 24 ໂຄງການ (ສໍາເລັດແລ້ວ) ໂດຍປະຕິບັດຕາມຂໍ້ຕົກລົງຂອງທ່ານເຈົ້າແຂວງ ສະບັບເລກທີ 2684/ຈຂ.ສຂ ລົງວັນທີ 23 ພະຈິກ 2022.
ວຽກງານງົບປະມານແຫ່ງລັດ, ດ້ານລາຍຮັບງົບປະມານສາມາດປະຕິບັດລາຍຮັບໄດ້ 15,844.15 ຕື້ກີບ,ທຽບໃສ່ໄລຍະຂອງ 5 ປີກ່ອນ ເພີ່ມຂຶ້ນ 39.35%, ພົ້ນເດັ່ນແມ່ນສາມາດປະຕິບັດລາຍຮັບງົບປະມານຢ່າງຕັ້ງໜ້າ ເຊິ່ງການຈັດເກັບລາຍຮັບແມ່ນເພີ່ມຂຶ້ນ ແລະ ລື່ນມະຕິຂອງກອງປະຊຸມສະພາຮັບຮອງ 35.78% ຂອງແຜນການ 5 ປີ, ລື່ນແຜນທີ່ກະຊວງການເງິນແຈ້ງໃນແຕ່ລະປີ, ເທົ່າກັບ 21.57% ແລະ ນັບແຕ່ປີ 2022 ເປັນຕົ້ນມາ ດ້ານລາຍຈ່າຍ ໄດ້ຈັດຕັ້ງປະຕິບັດ ຄຳສັ່ງເລກທີ 09/ນຍ ແລະ ຂໍ້ຕົກລົງເລກທີ 0200/ກງ ເຊິ່ງໄດ້ເຮັດໃຫ້ການຄຸ້ມຄອງລາຍຈ່າຍງົບປະມານຮັດກຸມຂຶ້ນ ໃນໄລຍະ 5 ປີ (2021-2025) ສາມາດປະຕິບັດລາຍຈ່າຍໄດ້ທັງໝົດ 5,175.49 ຕື້ກີບ, ເທົ່າກັບ 96.67%.
ກອງປະຊຸມຄັ້ງນີ້, ບັນດາຜູ້ແທນໄດ້ໃຊ້ສິດປະຊາທິປະໄຕຂອງຕົນຢ່າງເຕັມສ່ວນ ເລືອກເອົາຄະນະພັກຮາກຖານພະແນກການເງິນ ປະຈຳແຂວງສະຫວັນນະເຂດ ຊຸດໃໝ່ ເຊິ່ງໃນນີ້ໄດ້ມີຄວາມເປັນເອກະພາບສູງ ເລືອກເອົາເລຂາ, ຮອງເລຂາ, ປະທານກວດກາໜ່ວຍພັກ ແລະ ກຳມະການຄະນະພັກຮາກຖານ ສາມາດເລືອກໄດ້ດັ່ງນີ້:
- ສະຫາຍ ນາງ ບົວສະຫວັນ ລຸຍບົວທອງ ເປັນເລຂາຄະນະພັກຮາກຖານພະແນກ,
- ສະຫາຍ ປອ ບຸນເພັງ ເຂັມມາລາ ເປັນຮອງເລຂາຄະນະພັກຮາກຖານພະແນກ,
- ສະຫາຍ ໄພສານ ຈັນສີນາ ເປັນກຳມະການພັກ ພ້ອມທັງເປັນປະທານກວດກາຄະນະພັກຮາກຖານ,
- ສະຫາຍ ແກ້ວປະເສີດ ສຸຣິນພູມີ ກຳມະການຄະນະພັກຮາກຖານ
- ສະຫາຍ ໝອນຄຳ ສຸລິນພູມີ ກຳມະການຄະນະພັກຮາກຖານ
- ສະຫາຍ ໄຊດວງວັນ ບຸນລາວົງ ກຳມະການຄະນະພັກຮາກຖານ
- ສະຫາຍ ນາງ ລະອອງທິບ ແສງພະເກດ ກຳມະການຄະນະພັກຮາກຖານ
- ນາງ ເພັດສະໝອນ ແກ້ວວົງເງິນ ຮອງປະທານກວດກາພັກ
- ສະຫາຍ ເດດປະຊາ ພົມມະສອນ ຮອງປະທານກວດກາພັກ.
ໂອກາດດັ່ງກ່າວ, ຍັງໄດ້ຮັບຟັງການໂອ້ລົມ ໃຫ້ທິດຊີ້ນໍາ ຈາກສະຫາຍ ບຸນໂຈມ ອຸບົນປະເສີດ ກຳມະການສູນກາງພັກ ເລຂາພັກແຂວງ, ເຈົ້າແຂວງສະຫວັນນະເຂດ ເພື່ອເປັນທິດທາງ ໃນການຈັດຕັ້ງປະຕິບັດວຽກງານ ກໍຄື ການປະຕິບັດໜ້າທີ່ການເມືອງ ທີ່ໄດ້ຮັບມອບໝາຍ ໃນຕໍ່ໜ້າ ຂອງຄະນະພັກຮາກຖານ ພະແນກການເງິນ ປະຈຳແຂວງສະຫວັນນະເຂດ ໃຫ້ມີຜົນສໍາເລັດເປັນກ້າວໆ.
