ໃນວັນທີ 16 ທັນວາ 2025 ໜ່ວຍພັກຮາກຖານກົມນະໂຍບາຍເສດຖະກິດ ແລະ ການເງິນ ໄດ້ເປີດກອງປະຊຸມໃຫຍ່ ຄັ້ງທີ V ຂຶ້ນ ໂດຍການໃຫ້ກຽດເຂົ້າຮ່ວມເປັນປະທານຂອງ ສະຫາຍ ນາງ ພອນວັນ ອຸທະວົງ ຮອງເລຂາຄະນະບໍລິຫານງານພັກກະຊວງ, ຮອງລັດຖະມົນຕີກະຊວງການເງິນ, ສະຫາຍ ອຸບັນ ສຸພິດາ ຄະນະປະຈໍາພັກກະຊວງ ຫົວໜ້າກົມຈັດຕັ້ງ ແລະ ສະຫາຍ ປອ ສິດທິຣົດ ຣາຊະພົນ ກໍາມະການຄະນະບໍລິຫານງານພັກກະຊວງ ເລຂາໜ່ວຍພັກຮາກຖານກົມນະໂຍບາຍເສດຖະກິດ ແລະ ການເງິນ, ມີຄະນະໜ່ວຍພັກຮາກຖານ, ສະມາຊິກພາຍໃນໜ່ວຍພັກ ແລະ ບັນດາສະຫາຍຜູ້ຕາງໜ້າ 3 ອົງການຈັດຕັ້ງ ເຂົ້າຮ່ວມ.
 |  |
ໃນກອງປະຊຸມ ໄດ້ມີການຜ່ານຮ່າງບົດລາຍງານການເມືອງ, ບົດສຳຫຼວດ ການນໍາພາລວມໃນໜຶ່ງສະໄໝຜ່ານມາ ໄລຍະ (2020-2025) ແລະ ທິດທາງແຜນການ. ຄາດໝາຍສູ້ຊົນ ໃນຊຸມປີຕໍ່ໜ້າ ໄລຍະປີ (2026-2030) ແລະ ແຜນພັດທະນາວຽກງານຂອງກົມນະໂຍບາຍ ເສດຖະກິດ ແລະ ການເງິນ 5 ປີ ໄລຍະປີ (2026-2030). ໃນນັ້ນໄດ້ຕີລາຄາດ້ານດີ, ຈຸດອ່ອນຂໍ້ຄົງຄ້າງ, ສາເຫດ ແລະ ບົດຮຽນໃນການນໍາພາ-ຊີ້ນໍາ ແລະ ການຈັດຕັ້ງປະຕິບັດມະຕິກອງປະຊຸມໃຫຍ່ຂອງໜ່ວຍພັກກົມ ໃນໄລຍະ 5 ປີ ຫຼື ໜຶ່ງສະໄໝ ຜ່ານມາ, ພ້ອມນີ້ ຜູ້ແທນກອງປະຊຸມຍັງໄດ້ເປັນເອກະສັນກັນຮັບຮອງ ເອົາທິດທາງແຜນການ 5 ປີ ໃນຕໍ່ໜ້າ ໄລຍະປີ (2026-2030) ແລະ ພ້ອມທັງໃຊ້ສິດ ປະຊາທິປະໄຕຂອງຕົນ ປ່ອນບັດຄັດເລືອກ ເອົາຄະນະໜ່ວຍພັກຮາກຖານກົມນະໂຍບາຍເສດຖະກິດ ແລະ ການເງິນຊຸດໃໝ່ບົນພື້ນຖານຫຼັກການລວມ ສູນປະຊາທິປະໄຕ ຖືກຕ້ອງສອດຄ່ອງ ກັບມາດຖານເງື່ອນໄຂທີ່ໄດ້ກໍານົດໄວ້, ເຊິ່ງສາມາດເລືອກໄດ້ ເລຂາ, ຮອງເລຂາ-ປະທານກວດກາພັກ ແລະ ກໍາມະການໜ່ວຍພັກ ດັ່ງນີ້:
 |  |  |
- ສະຫາຍ ປອ ສິດທິຣົດ ຣາຊະພົນ ເປັນເລຂາໜ່ວຍພັກ;
- ສະຫາຍ ນາງ ສີສະຫວັນ ດີດາຣາວົງ ຮອງເລຂາໜ່ວຍພັກ, ປະທານກວດກາພັກ;
- ສະຫາຍ ດວງໃຈ ແກ້ວມີໄຊ ກໍາມະການໜ່ວຍພັກ;
- ສະຫາຍ ພະນົມພອນ ແກ້ວວົງວິຈິດ ກໍາມະການໜ່ວຍພັກ;
- ສະຫາຍ ນາງ ສຸລິທະ ແກ້ວປະເສີດ ກໍາມະການໜ່ວຍພັກ.
ໂອກາດດັ່ງກ່າວ, ສະຫາຍ ນາງ ພອນວັນ ອຸທະວົງ ຮອງເລຂາຄະນະບໍລິຫານງານພັກກະຊວງ, ຮອງລັດຖະມົນຕີກະຊວງການເງິນ ໄດ້ສະແດງຄວາມຊົມເຊີຍ ຕໍ່ຄະນະໜ່ວຍພັກຮາກຖານກົມ ໃນໄລຍະຜ່ານມາ ທີ່ໄດ້ນໍາພາ-ຊີ້ນໍາ ສະມາຊິກພັກ-ພະນັກງານ ປະຕິບັດໜ້າທີ່ການເມືອງຂອງຕົນ, ຍາດໄດ້ຜົນສໍາເລັດຫຼາຍດ້ານ, ພ້ອມກັນນັ້ນ ສະຫາຍຍັງໄດ້ສະແດງຄວາມເປັນຫ່ວງເປັນໃຍ ຕໍ່ຂໍ້ຄົງຄ້າງທີ່ທາງໜ່ວຍພັກ ຍັງບໍ່ທັນສາມາດບັນລຸໄດ້ ແລະ ຮຽກຮ້ອງໃຫ້ຄະນະພັກຊຸດໃໝ່ຕ້ອງສືບຕໍ່ປັບປຸງແກ້ໄຂ ແລະ ສະມາຊິກພັກ-ພະນັກງານທັງໝົດພາຍໃນໜ່ວຍພັກຮາກຖານກົມນະໂຍບາຍເສດຖະກິດ ແລະ ການເງິນ ຈົ່ງໄດ້ເຊີດຊູສະຕິ ແລະ ຄວາມຮັບຜິດຊອບໜ້າທີ່ການເມືອງຂອງຕົນ ໃຫ້ສູງຂຶ້ນເລື້ອຍໆ, ເຮັດໃຫ້ວຽກງານວິຊາສະເພາະ ຂອງກົມ ມີການຫັນປ່ຽນໃໝ່ທີ່ຕັ້ງໜ້າດີຂຶ້ນ, ເຮັດໃຫ້ຄະນະໜ່ວຍພັກ, ສະມາຊິກພັກມີຄວາມປອດໃສ, ເຂັ້ມແຂງ, ໜັກແໜ້ນ. 
