ກອງປະຊຸມໄດ້ຮັບຟັງ, ແລກປ່ຽນ ແລະ ປະກອບຄຳຄິດຄຳເຫັນຕໍ່ກັບເນື້ອໃນການນຳສະເໜີ ຂອງ ທີມງານຊ່ຽວຊານປະເມີນກາງສະໄໝ ແຜນງານ/ໂຄງການ ICP V ທີ່ຕິດພັນກັບກົນໄກ, ວິທີການ ແລະ ຂະບວນການ ທີ່ຈະນຳມາຈັດຕັ້ງປະຕິບັດໃນຊ່ວງໄລຍະການປະເມີນ. ພ້ອມນີ້, ຍັງໃຫ້ບັນດາຄະນະກໍາມະທິການຮ່ວມມື ລາວ-ລຸກຊໍາບວກໄດ້ພົບປະ ແລະ ປຶກສາລືກ່ຽວກັບຄວາມຄຶບໜ້າ ຂອງການຈັດຕັ້ງປະຕິບັດແຜນຍຸດທະສາດການຮ່ວມມື ICP V ຢູ່ໃນລະດັບສູນກາງ ແລະ ທ້ອງຖິ່ນ; ນອກຈາກນັ້ນ ພວກເຮົາຈະໄດ້ພ້ອມກັນກວດກາຄືນບັນດາວຽກງານການຮ່ວມມືລາວ-ລຸກຊໍາບວກ ໃນໄລຍະຜ່ານມາເປັນຕົ້ນ ແມ່ນຄວາມຄືບໜ້າ, ສິ່ງທ້າທາຍ ແລະ ລວມທັງແຜນການຮ່ວມມືໃນຕໍ່ໜ້າ. ລັດຖະບານລຸກຊໍາບວກ ໄດ້ເລີ່ມໃຫ້ການຊ່ວຍເຫຼືອແກ່ ສປປ ລາວ ດ້ວຍມູນຄ່າປະມານ 2 ລ້ານ ໂດລາສະຫະລັດ ຕໍ່ປີ. ສິ່ງທີ່ພົ້ນເດັ່ນທີ່ສຸດແມ່ນໃນປີ 2001, ລັດຖະບານລຸກຊໍາບວກ ໄດ້ເອົາລາວເຂົ້າເປັນປະເທດເປົ້າໝາຍໃຫ້ການຊ່ວຍເຫຼືອ (Target Country). ທັງສອງປະເທດໄດ້ລົງນາມໃນແຜນງານການຮ່ວມມື ລະຫວ່າງ ສອງລັດຖະບານ (Indicative Cooperation Programme, ICP) ເຊິ່ງເຮັດໃຫ້ການຊ່ວຍເຫຼືອຈາກລຸກຊໍາບວກ ໃຫ້ແກ່ການພັດທະນາໃນ ສປປ ລາວ ນັບມື້ນັບເພີ່ມຂຶ້ນ, ລວມມູນຄ່າການຊ່ວຍເຫຼືອທັງໝົດ ນັບແຕ່ (ICP I) ຮອດ (ICP V) ປະມານເກືອບຮອດ 300 ລ້ານ ເອີໂຣ. ໃນປັດຈຸບັນການຮ່ວມມື ລະຫວ່າງ ສປປ ລາວ ແລະ ລຸກຊໍາບວກ ກຳລັງດຳເນີນການຈັດຕັ້ງປະຕິບັດແຜນງານການຮ່ວມມື ໄລຍະ (ICP V) ໂດຍໄດ້ແນ່ໃສ່ສ້າງຄວາມເຂັ້ມແຂງຂອງການມີສ່ວນຮ່ວມຂອງລັດຖະບານ ສປປ ລາວ ເພື່ອການພັດທະນາຊັບພະຍາກອນມະນຸດແບບຍືນຍົງ, ຮັບປະກັນການສ້າງໂອກາດໃຫ້ທຸກພາກສ່ວນໄດ້ຮັບການປັບປຸງລາຍຮັບ ແລະ ຊີວິດການເປັນຢູ່ທີ່ດີຂຶ້ນ ໂດຍສະເພາະໄດ້ສຸມໃສ່ຂົງເຂດສາທາລະນະສຸກ, ພັດທະນາທ້ອງຖິ່ນ, ອາຊີວະສຶກສາ ແລະ ການປົກຄອງທີ່ດີ, ອັນສອດຄ່ອງກັບແຜນພັດທະນາເສດຖະກິດ-ສັງຄົມ 5 ປີ ຄັ້ງທີ IX (2021-2025) ແລະ ຍັງຈະໄດ້ສືບຕໍ່ປຶກສາຫາລືສໍາລັບແຜນພັດທະນາເສດຖະກິດ-ສັງຄົມ 5 ປີ ຄັ້ງທີ X (2026-2030). ໂອກາດດັ່ງກ່າວ ທັງສອງຝ່າຍໄດ້ສືບຕໍ່ ຈັດກອງປະຊຸມພົບປະສອງຝ່າຍ ເພື່ອປຶກສາຫາລື ແລະ ລາຍງານການຈັດຕັ້ງປະຕິບັດ ຂອງ ບັນດາແຜນງານ/ໂຄງການ ພາຍໃຕ້ ICP V, ພ້ອມທັງວາງແຜນການຮ່ວມມືສອງຝ່າຍໃນຕໍ່ໜ້າ ໂດຍສະເພາະການກະກຽມຈັດກອງປະຊຸມຄະນະກໍາມາທິການຮ່ວມມື ລາວ-ລຸກຊຳບວກ ຄັ້ງທີ 17 ທີ່ ສປປ ລາວ ພາຍໃນປີ 2026 ທີ່ຈະມາເຖິງນີ້. ພ້ອມດ່ຽວກັນນີ້, ທ່ານ ຮອງລັດຖະມົນຕີ ກະຊວງການເງິນ ໄດ້ສະແດງຄວາມຂອບໃຈຕໍ່ ລັດຖະບານ ລຸກຊຳບວກ ສຳລັບການຊ່ວຍເຫຼືອ ແລະ ສະໜັບສະໜູນ ໃຫ້ແກ່ ສປປ ລາວ ໂດຍຜ່ານອົງການ LuxDev ແລະ ພ້ອມທີ່ຈະໃຫ້ການຮ່ວມມື-ສະໜັບສະໜູນ ໃຫ້ວຽກງານການຮ່ວມມື ຂອງ ສອງປະເທດນັບມື້ນັບແຕກດອກອອກຜົນຍິ່ງຂຶີ້ນຕະຫຼອດໄປ.
