ເຈົ້າໜ້າທີ່ອາວຸໂສ ລາວ-ຫວຽດນາມ ຫາລືກະກຽມເນື້ອໃນກອງປະຊຸມຄັ້ງທີ 48
ຂອງຄະນະກຳມະການຮ່ວມມືທະວິພາຄີ ປະຈຳປີ 2026
ໃນວັນທີ 1 ທັນວາ 2025, ໄດ້ມີກອງປະຊຸມລະດັບເຈົ້າໜ້າທີ່ອາວຸໂສ ກະກຽມເນື້ອໃນກອງປະຊຸມຄັ້ງທີ 48 ຂອງຄະນະກຳມະການຮ່ວມມືທະວິພາຄີ ປະຈຳປີ 2026, ໂດຍການເປັນປະທານ ຂອງທ່ານ ສຸລິວັດ ສຸວັນນະຈູມຄຳ ຮອງລັດຖະ ມົນຕີກະຊວງການເງິນ ແລະ ທ່ານ ເຈິ່ນ ກັວກ ເຟືອງ , ຮອງລັດຖະມົນຕີກະຊວງການເງິນ, ຮອງປະທານຄະນະກຳມະການຮ່ວມມື ຫວຽດນາມ-ລາວ ພ້ອມດ້ວຍຄະນະທັງສອງຝ່າຍເຂົ້າຮ່ວມ.
ໃນກອງປະຊຸມສອງຝ່າຍໄດ້ທົບທວນຕີລາຄາຄືນ ສະພາບການຈັດຕັ້ງຜັນຂະຫຍາຍ ຄໍາເຫັນຊີ້ນໍາຂອງສອງກົມການເມືອງສູນກາງພັກ, ຂໍ້ຕົກລົງ ຂອງສອງລັດຖະບານປະຈຳປີ 2025 ກໍ່ຄືໝາກຜົນຂອງການຮ່ວມມືໄລຍະ 2021-2025, ອັນໃດທີ່ປະ ຕິບັດໄດ້, ອັນໃດທີ່ຍັງປະຕິບັດບໍ່ທັນໄດ້ດີ ແລະ ພ້ອມກັນປຶກສາຫາລື ກ່ຽວກັບ ທິດທາງແຜນການຮ່ວມມື ປະຈຳປີ 2026 ແລະ ໃນໄລຍະ 2026-2030 ຕໍ່ໜ້າ ເພື່ອນໍາສະເໜີຕໍ່ສອງລັດຖະບານ ພິຈາລະນາ ໃນກອງປະຊຸມ ຄັ້ງທີ 48 ຂອງຄະນະກໍາມະການຮ່ວມມືທະວິພາຄີ ລະຫວ່າງ ລັດຖະບານສອງປະເທດ, ດ້ວຍໄມຕີຈິດ ມິດຕະພາບອັນເປັນມູນເຊື້ອ, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງປະເທດ ເຊື່ອໝັ້ນຢ່າງໜັກແໜ້ນວ່າ ຜ່ານການປຶກສາຫາລືກັນຢ່າງເປີດເຜີຍ, ກົງໄປກົງມາ, ແທດຕົວຈິງ ແລະ ດ້ວຍຄວາມຮັບຜິດຊອບສູງຂອງສອງຝ່າຍ ກອງປະຊຸມຈະມີຜົນສຳເລັດຢ່າງຈົບງາມ.
ກອງປະຊຸມດັ່ງກ່າວແມ່ນເປັນຂີດໝາຍສຳຄັນ ໃນການສືບຕໍ່ເພີ່ມທະວີ ການພົວພັນຕາມແຜນຍຸດທະສາດລວມ ຂອງສອງພັກ ສອງລັດ ໃຫ້ນັບມື້ ນັບດີຂຶ້ນເປັນກ້າວໆ ພາຍໃຕ້ການຊີ້ນຳນຳພາຢ່າງໃກ້ສິດຂອງ ສອງພັກ ສອງລັດ ລາວ-ຫວຽດນາມ ບວກກັບຄວາມສາມາດ ບົດຮຽນປະສົບການ ຂອງຄະນະຜູ້ແທນເຂົ້າຮ່ວມຄັ້ງນີ້ ເຊື່ອໝັ້ນວ່າ ກອງປະຊຸມຈະສາມາດບັນລຸໄດ້ຕາມລະດັບຄາດໝາຍຂອງກອງປະຊຸມ ຢ່າງມີປະສິດທິຜົນສູງສຸດ.
ໃນວາລະກອງປະຊຸມ ໄດ້ລາຍງານສະພາບການຈັດຕັ້ງຜັນຂະຫຍາຍ ຂໍ້ຕົກລົງຂອງສອງລັດຖະບານ ປະຈຳປີ 2025 ກໍ່ຄື ໝາກຜົນຂອງການຮ່ວມມື ໄລຍະ 2021-2025; ສ່ວນລາຍລະອຽດ ຂອງທິດທາງແຜນການຮ່ວມມືປີ 2026 ກໍ່ຄື ໃນໄລຍະຕໍ່ ໜ້າ, ໂດຍໄດ້ລົງເລິກ, ສົນທະນາ, ປຶກສາຫາລື, ແລກປ່ຽນຄຳຄິດເຫັນໃສ່ບົດລາວງານດັ່ງກ່າວ ແລະ ແຜນຮ່ວມມືຮອບດ້ານຢ່າງກົງໄປ ກົງໄປມາ, ພ້ອມທັງ ເອກະພາບບັນດາເອກະສານທີ່ຈະເຊັນ ໃນກອງປະຊຸມ ຄັ້ງທີ 48 ປະຈຳປີ 2026 ອີກດ້ວຍ.
