ໃນວັນທີ 28 ພະຈິກ 2025 ໜ່ວຍພັກຮາກຖານກົມງົບປະມານແຫ່ງລັດ ໄດ້ເປີດກອງປະຊຸມໃຫຍ່ສະມາຊິກພັກ ຄັ້ງທີ V ຂຶ້ນນຢ່າງເປັນທາງການ ໃຫ້ກຽດເຂົ້າຮ່ວມເປັນປະທານຂອງສະຫາຍ ພູວົງ ກິດຕະວົງ ກໍາມະການປະຈໍາພັກກະຊວງ, ປະທານກວດກາພັກ, ຮອງລັດຖະມົນຕີກະຊວງການເງິນ; ສະຫາຍ ອຸບັນ ສຸພິດາ ກໍາມະການປະຈໍາພັກກະຊວງ, ຫົວໜ້າກົມຈັດຕັ້ງ ແລະ ສະຫາຍ ໜູເຊີຍ ພົມສີຈັນ ເລຂາໜ່ວຍພັກຮາກຖານກົມງົບປະມານແຫ່ງລັດ, ມີຄະນະໜ່ວຍພັກຮາກຖານ, ສະມາຊິກພັກພາຍໃນໜ່ວຍພັກ ພ້ອມດ້ວຍແຂກທີ່ຖືກເຊີນເຂົ້າຮ່ວມ.
ໃນກອງປະຊຸມ ໄດ້ຜ່ານຮ່າງບົດລາຍງານການເມືອງ, ແຜນພັດທະນາຂະແໜງງົບປະມານ ແລະ ບົດສໍາຫຼວດການນໍາພາລວມ ເພື່ອເປັນການຢັ້ງຢືນຄືນເຖິງຜົນງານການເຄື່ອນໄຫວໃນໄລຍະ 5 ປີ ຜ່ານມາ. ທັງເປັນການຕີລາຄາຄືນ ການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ IV ຂອງໜ່ວຍພັກ ໃນ 05 ປີຜ່ານມາ (2021-2025), ຍົກໃຫ້ເຫັນຜົນສໍາເລັດອັນພົ້ນເດັ່ນ, ຂໍ້ຄົງຄ້າງ ແລະ ບົດຮຽນທີ່ຖອນຖອນໄດ້, ພ້ອມດຽວກັນນັ້ນ ກໍ່ໄດ້ກໍານົດທິດທາງ, ຄາດໝາຍສູ້ຊົນ ແລະ ມາດຕະການວຽກງານຈຸດສຸມໃນແຕ່ລະດ້ານໃນ 5 ປີຕໍ່ໜ້າ (2026-2030) ທີ່ເປັນສິ່ງທ້າທາຍພໍສົມຄວນ, ຊຶ່ງຮຽກຮ້ອງໃຫ້ຄະນະໜ່ວຍພັກ ແລະ ສະມາຊິກພັກທຸກສະຫາຍ ພ້ອມກັນຕັດສິນໃຈ ເຊີດຊູຄວາມເປັນເຈົ້າການ ແລະ ຄວາມຮັບຜິດຊອບຂອງຕົນ ໃນການປະກອບສ່ວນເຫື່ອແຮງ ແລະ ອຸທິດສະຕິປັນຍາຂອງຕົນ ບົນຈິດໃຈບຸກທະລຸທາງດ້ານແນວຄິດ ແລະ ຈິນຕະນາການ ໃນການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ V ຂອງໜ່ວຍພັກຮາກຖານກົມງົບປະມານແຫ່ງລັດ ເຂົ້າໃນການຈັດຕັ້ງປະຕິບັດວຽກງານຕົວຈິງ ໃຫ້ມີຜົນສໍາເລັດຕາມຄາດໝາຍທີ່ໄດ້ກໍານົດ.
ພ້ອມກັນນັ້ນ, ໃນກອງປະຊຸມ ຍັງໄດ້ຮັບຟັງການປະກອບຄໍາເຫັນຂອງບັນດາສະຫາຍສະມາຊິກພັກພາຍໃນໜ່ວຍພັກ ເພື່ອເຮັດໃຫ້ຮ່າງບົດລາຍງານການເມືອງ, ແຜນພັດທະນາຂະແໜງງົບປະມານ ແລະ ບົດສໍາຫຼວດການນໍາພາລວມມີເນື້ອໃນຄົບຖ້ວນ ແລະ ຖືກຕ້ອງກັບການຈັດຕັ້ງປະຕິບັດຕົວຈິງ ທັງເປັນການຢັ້ງຢືນເຖິງຜົນງານທີ່ຍາດມາໄດ້ໃນໄລຍະຜ່ານມາ. ຈາກນັ້ນ, ບັນດາສະຫາຍສະມາຊິກພັກ ທີ່ເຂົ້າຮ່ວມກອງປະຊຸມ ຍັງໄດ້ໃຊ້ສິດປະຊາທິປະໄຕຂອງຕົນ ປ່ອນບັດຄັດເລືອກເອົາເລຂາໜ່ວຍພັກຮາກຖານ, ຮອງເລຂາໜ່ວຍພັກ ແລະ ຄະນະໜ່ວຍພັກຮາກຖານກົມງົບປະມານແຫ່ງລັດ ຊຸດໃໝ່ ແລະ ຜ່ານກອງປະຊຸມຄັ້ງປະຖົມມະລຶກ ສາມາດເລືອກໄດ້ບັນດາສະຫາຍດັ່ງນີ້: 
- ສະຫາຍ ໜູເຊີຍ ພົມສີຈັນ ເປັນເລຂາໜ່ວຍພັກຮາກຖານກົມງົບປະມານແຫ່ງລັດ;
- ສະຫາຍ ສຸພາວັນ ພັນທະວິໄລ ເປັນຮອງເລຂາ, ປະທານກວດກາພັກ;
- ສະຫາຍ ນາງ ວຽງຄອນ ຈິນດາວົງ ກໍາມະການໜ່ວຍພັກ, ຮອງປະທານກວດກາໜ່ວຍພັກ;
- ສະຫາຍ ສຸກຂີວັນ ດວງດີ ກໍາມະການໜ່ວຍພັກ;
- ສະຫາຍ ປອ ສຸວັນຄໍາ ຊຸມພົນພັກດີ ກໍາມະການໜ່ວຍພັກ.
ເພື່ອສືບຕໍ່ ນໍາພາ-ຊີ້ນໍາ ໃນການຈັດຕັ້ງປະຕິບັດ ມະຕິກອງປະຊຸມໃຫຍ່ ຄັ້ງທີ IV ຂອງໜ່ວຍພັກຮາກຖານກົມງົບປະມານແຫ່ງລັດ ໃຫ້ບັນລຸຜົນສໍາເລັດ ຕາມລະດັບຄາດໝາຍໃຫ້ປະກົດຜົນເປັນຈິງ.
ໂອກາດດັ່ງກ່າວ, ສະຫາຍ ພູວົງ ກິດຕະວົງ ໄດ້ໃຫ້ກຽດໂອ້ລົມຕໍ່ໜ່ວຍພັກກົມງົບປະມານແຫ່ງລັດ ເພື່ອເປັນທິດເຍືອງທາງ ໃນການປັບປຸງວຽກງານການນໍາພາ, ຊີ້ນໍາຂອງໜ່ວຍພັກຮາກຖານກົມງົບປະມານແຫ່ງລັດໃນຕໍ່ໜ້າ ໂດຍໄດ້ເນັ້ນໃຫ້ຄະນະໜ່ວຍພັກ, ສະມາຊິກພັກ ຕ້ອງໄດ້ພ້ອມກັນຕັດສິນໃຈແກ້ໄຂ, ປັບປຸງ-ປ່ຽນແປງ, ເພື່ອສ້າງບາດກ້າວປ່ຽນແປງໃໝ່ຂອງ ໜ່ວຍພັກໃຫ້ມີການພັດທະນາຂຶ້ນເລື້ອຍໆ ໃຫ້ສາມາດຕອບສະໜອງໄດ້ກັບຄວາມຮຽກຮ້ອງຕ້ອງການຂອງວຽກງານໃນໄລຍະໃໝ່, ເພື່ອສືບຕໍ່ເສີມຂະຫຍາຍຜົນງານທີ່ສ້າງມາໄດ້ ແລະ ພ້ອມທັງແກ້ໄຂຈຸດອ່ອນຂໍ້ຄົງຄ້າງຂອງການນຳພາໃນໄລຍະຜ່ານມາ, ເຮັດໃຫ້ການກໍ່ສ້າງ ແລະ ເສີມຂະຫາຍກຳລັງແຮງ ຂອງໜ່ວຍພັກ, ໃຫ້ຖືກຕ້ອງ, ປອດໃສ ແລະ ຂາວສະອາດ. ສ້າງໃຫ້ໜ່ວຍພັກເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນ, ຮູ້ນໍາພາຮອບດ້ານ ຕາມທິດທາງທີ່ໜ່ວຍພັກ ໄດ້ວາງຄາດໝາຍໄວ້ນັ້ນ. 
ພ້ອມນັ້ນ, ສະຫາຍຍັງໄດ້ເນັ້ນໃຫ້ ພາຍຫຼັງກອງປະຊຸມໃຫຍ່ຄັ້ງນີ້ສໍາເລັດລົງ ໃຫ້ຮີບຮ້ອນນໍາເອົາທິດທາງແຜນການທີ່ກຳນົດໄວ້ໃນມະຕິກອງປະຊຸມ ຜັນຂະຫຍາຍເປັນແຜນວຽກ, ແຜນງານ ແລະ ແບ່ງຄວາມຮັບຜິດຊອບ ໃນຄະນະພັກ, ສະມາຊິກພັກ ຢ່າງຈະແຈ້ງ. ຄະນະໜ່ວຍພັກ ຕ້ອງເປັນເຈົ້າການນຳພາປະຕິບັດ ແລະ ກວດກາຕິດຕາມ ຢ່າງເປັນປົກກະຕິ ແລະ ຕໍ່ເນື່ອງ ຕໍ່ກັບບັນດາໜ້າວຽກທີ່ມອບໝາຍໃຫ້ສະມາຊິກພັກແຕ່ລະສະຫາຍ ເພື່ອເຮັດໃຫ້ການປະຕິບັດໜ້າທີ່ໃຫ້ສຳເລັດຕາມຄາດໝາຍທີ່ວາງໄວ້. 
