ການຈັດຕັ້ງປະຕິບັດແຜນງົບປະມານແຫ່ງລັດ ຂອງແຂວງຄຳມ່ວນ ໃນປີ 2024 ສາມາດບັນລຸໄດ້ລື່ນແຜນການທີ່ກໍານົດໄວ້

          ໃນກອງກອງປະຊຸມສະຫຼຸບວຽກງານການເງິນ ປະຈຳປີ 2024 ແລະ ທິດທາງ ປະຈຳປີ 2025 ທ່ານ ຄໍາສິງ ໄຊສິດທິເດດ ຫົວໜ້າພະແນກການເງິນແຂວງຄໍາມ່ວນ ໄດ້ປະກອບຄໍາຄິດເຫັນຕໍ່ກອງປະຊຸມ ແລະ ໄດ້ລາຍງານໃຫ້ຮູ້ເຖິງການຈັດຕັ້ງປະຕິບັດວຽກງານຂອງແຂວງ ໃນປີ 2024 ແລະ ທິດທາງແຜນການ ປີ 2025. ເຊິ່ງໃນການຈັດຕັ້ງແຜນງົບປະມານແຫ່ງລັດ ຂອງແຂວງຄໍາມວ່ນ ແມ່ນໄດ້ປະຕິບັດຄຽງຄູ່ໄປກັບທິດທາງຜັນຂະຫຍາຍ ວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດການເງິນ ການແກ້ໄຂບັນຫາເຄັ້ງຮ້ອນຂອງລັດຖະບານ ຊຶ່ງສະພາບດັ່ງກ່າວໄດ້ສົ່ງຜົນກະທົບ ພໍສົມຄວນຕໍ່ການຈັດຕັ້ງປະຕິບັດແຜນງົບປະມານປະຈໍາປີຂອງແຂວງ.

          ແຕ່ຍ້ອນຄວາມເອົາໃຈໃສ່ຊີ້ນໍາ-ນໍາພາຢ່າງໄກ້ສິດຂອງການນໍາຂອງແຂວງ ບວກກັບການຮ່ວມມືເປັນຢ່າງດີຂອງພະແນກການທີ່ກ່ຽວຂ້ອງ, ການຂຸດຄົ້ນ ລາຍຮັບ ແລະ ຄຸ້ມຄອງລາຍຈ່າຍງົບປະມານ ທັງຂັ້ນແຂວງ ແລະ ເມືອງ, ສິ່ງສໍາຄັນແມ່ນຄວາມຮັບຜິດຊອບຕໍ່ໜ້າທີ່ ການເມືອງທີ່ການຈັດຕັ້ງມອບໝາຍຂອງພະນັກງານການເງິນ ໄດ້ພ້ອມກັນປະຕິໜ້າທີ່ດ້ວຍຄວາມເປັນເຈົ້າການ, ມີຄວາມຮັບຜິດຊອບສູງຄຽງຄູ່ກັບການ ເພີ່ມທະວີການຄຸ້ມຄອງ, ຕ້ານການຮົ່ວໄຫຼ ຂອງງົບປະມານແຫ່ງລັດ ແລະ ຄຸ້ມຄອງລາຍຈ່າຍຕາມນະໂຍບາຍການປະຢັດ, ຕ້ານການຟຸມເຟືອຍ ເປັນບັນຫາສໍາຄັນແມ່ນຂະແໜງການເງິນໄດ້ນໍາໃຊ້ເຄື່ອງມືທັນສະໄໝເຂົ້າໃນການຄຸ້ມຄອງການຈັດເກັບລາຍຮັບທັງຂັ້ນແຂວງ ແລະ ຂັ້ນເມືອງ ແນໃສ່ເພື່ອສູ້ຊົນຈັດຕັ້ງປະຕິບັດແຜນງົບປະມານແຫ່ງລັດ ໃຫ້ໄດ້ຕາມລະດັບຄາດໝາຍ ມີສ່ວນດຸ່ນດຽງໃຫ້ສູນກາງ ແລະ ກ້າວໄປເຖິງມີລາຍຮັບເກີນແຜນ ໃນປີ2024.

         ການປະຕິບັດແຜນການຈັດເກັບລາຍຮັບງົບປະມານໃນປີ 2024 ແຂວງຄໍາມ່ວນ ໄດ້ຮັບມອບໝາຍຈັດເກັບລາຍຮັບທັງໝົດຈໍານວນ 2,434 ຕຶ້ກີບ, ມາຮອດ ວັນທີ 23/12 ສາມາດຈັດເກັບໄດ້ 3,880 ຕື້ກີບ ເທົ່າກັບ 159.36% ຂອງແຜນປີ ເພີ່ມຂື້ນ 1,333 ຕື້ກີບ ເທົ່າກັບ 77.44%; ໃນນີ້, ລາຍຮັບສູນກາງ (ພາສີ) ປະຕິບັດໄດ້ 1,283 ຕື້ກີບ ເທົ່າກັບ 122.84% ຂອງແຜນການປີ; ລາຍຮັບພູດທ້ອງຖິ່ນ: ປະຕິບັດໄດ້ 2,596 ຕື້ກີບ, ເທົ່າກັບ 186.81% ຂອງແຜນການປີ, ໃນນີ້, ລາຍຮັບສ່ວຍສາອາກອນ ປະຕິບັດໄດ້ 1,431 ຕື້ກີບ ເທົ່າກັບ 140.25% ຂອງແຜນການປີ; ຄ່າຊັບພະຍາກອນ ແລະ ພາກຫຼວງ ປະຕິບັດໄດ້ 1,120 ຕື້ກີບ ເທົ່າກັບ 331.60% ຂອງແຜນປີ; ລາຍຮັບຄຸ້ມຄອງຊັບສິນຂອງລັດ ປະຕິບັດໄດ້ 45,049 ຕື້ກີບ ເທົ່າກັບ 143.70% ຂອງແຜນການປີ; ລາຍຮັບຄຸ້ມຄອງລັດວິສາຫະກິດ ແລະ ປະກັນໄພ ປະຕິບັດໄດ້ 265 ລ້ານກີບ, ເທົ່າກັບ 88.62 % ຂອງແຜນປີ; ສໍາລັບການຈັດເກັບລາຍຮັບ 20 ຫົວໜ່ວຍທີ່ສູນກາງ ມອບໃຫ້ແຂວງຄຸ້ມຄອງ ປະຕິບັດໄດ້ 1.391 ຕື້ກີບ (ແຜນ 960 ຕື້ກີບ) ເທົ່າກັບ 144.90% ຂອງແຜນການປີ.

         ພ້ອມນັ້ນ, ທ່ານຍັງໃຫ້ຮູ້ອີກວ່າ: ສຳລັບແຜນງົບປະມານຂອງແຂວງ ໃນປີ 2025, ຊຶ່ງອີງຕາມຂໍ້ມູນຖານລາຍຮັບ-ທ່າແຮງຕົວຈິງຂອງ ແຂວງຄຳມ່ວນ ດ້ານລາຍຮັບ ແຜນຄາດຄະເນ ຈະສາມາດປະຕິບັດໄດ້ ຈໍານວນ 2,897.97 ຕື້ກີບ ຖ້າທຽບໃສປີ 2024 ຈະເພີ່ມຂື້ນ 16,58%. ໃນນັ້ນ ລາຍຮັບສູນກາງ 1,150 ຕື້ກີບ ທຽບໃສປີຜ່ານມາ ເພີ່ມຂື້ນ 10%, ລາຍຮັບທອ້ງຖີ່ນ 1,852.86 ຕື້ກີບ ທຽບໃສປີ ຜ່ານມາ ເພີ່ມຂື້ນ 35,04%.

        ເພື່ອເຮັດໃຫ້ການຈັດຕັ້ງປະຕິບັດວຽກງານ ໃນປີ 2025 ບັນລຸໄດ້ຕາມລະດັບຄາດໝາຍທີ່ຄາດຄະເນໄວ້ ຍັງໄດ້ວາງບັນດາໜ້າວຽກຈຸດສຸມໃນການຈັດຕັ້ງປະຕິບັດແຜນງົບປະມານ ໂດຍເອົາໃຈໃສ່ຈັດຕັ້ງປະຕິບັດມະຕິເລກທີ 04/ກມ ສນ, ແລະ ມະຕິ 05/ລບ ວ່າດ້ວຍການສ້າງເສດຖະກິດເອກະລາດ ເປັນເຈົ້າຕົນເອງ ໃນໄລຍະໄໝໃຫ້ເຂົ້າສູ່ລວງເລິກ, ຈັດຕັ້ງປະຕິບັດຄໍາສັ່ງຂອງທ່ານນາຍົກລັດຖະມົນຕີ ສະບັບເລກທີ 18/ນຍ, ລົງວັນທີ 16 ກັນຍາ 2021 ວ່າດວ້ຍການເພີ່ມທະວີການຄຸ້ມຄອງ ແລະ ຕ້ານການຮົ່ວໄຫຼຂອງງົບປະມານແຫ່ງລັດ ໃຫ້ເປັນຮູບປະທຳ, ເອົາໃຈໃສ່ໃນການຕິດຕາມ ກວດກາ ແລະ ຄຸ້ມຄອງການນໍາເຂົ້າ-ສົ່ງອອກສິນຄ້າຜ່ານດ່ານຊາຍແດນຢ່າງເຂັ້ມງວດ, ເກັບພັນທະໃຫ້ຖືກຕ້ອງ ຄົບຖ້ວນ, ທັນຕາມກຳນົດເວລາ, ສ້າງ ແລະ ພັດທະນາລະບົບຂໍ້ມູນຖານລາຍຮັບແຕ່ລະເມືອງໃຫ້ທັນສະໄໝ, ທົ່ວແຂວງ ແລະ ເມືອງໃຫ້ສໍາເລັດທົ່ວແຂວງ, ສຸມໃສ່ເກັບລາຍຮັບນໍາຫົວໜ່ວຍທຸລະກິດທີ່ສູນກາງມອບໃຫ້ແຂວງຄຸ້ມຄອງໃຫ້ຄົບຖ້ວນ ແລະ ທັນກຳນົດເວລາ, ຕິດຕາມກວດກາຊຸກຍູ້ສົ່ງເສີມຜູ້ດໍາເນີນທຸລະກິດທີ່ຍັງບໍ່ທັນເຂົ້າສູ່ລະບົບອາກອນມູນຄ່າເພີ່ມ ແລະ ອື່ນໆ