ໃນວັນທີ 11 ພະຈິກ 2025 ທີ່ ນະຄອນຫລວງວຽງຈັນ, ສປປ ລາວ. ກົມພາສີ ກະຊວງການເງິນ ຈັດກອງປະຊຸມຄະນະກໍາມາທິການປະສານງານດ້ານພາສີອາຊຽນ ຄັ້ງທີ 43 ຂື້ນ(43rd ASEAN Customs Coordinating Committee Meeting (CCC)) ໂດຍເຂົ້າຮ່ວມເປັນປະທານຂອງທ່ານ ພຸດທະນີກອນ ເຄນນະວົງ ຮອງຫົວໜ້າກົມພາສີ ກະຊວງການເງິນ ແລະ ທ່ານ ຮາຈິ ໂມຮາມັດ ມູ ອິນຸດດິນຈິນ ອັບດຸນ ລາມັດ ຮອງຫົວໜ້າພະແນກ ພາສີ ບຣູໄນ ພ້ອມດ້ວຍ ບັນດາຜູ້ຕາງໜ້າພາສີ ຈາກປະເທດອາຊຽນ ເຂົ້າຮ່ວມ.
 |  |
ກອງປະຊຸມຄະນະກໍາມາທິການປະສານງານດ້ານພາສີອາຊຽນ ຄັ້ງທີ 42 ຜ່ານມາ ທີ່ຈັດຂຶ້ນຢູ່ນະຄອນ ໂຮ່ຈິມິນ, ສສ ຫວຽດນາມ. ເຊິ່ງໄດ້ບັນລຸຄວາມຄືບຫນ້າທີ່ສໍາຄັນໃນບາງຂົງເຂດສໍາຄັນ ເຊັ່ນ ການສືບຕໍ່ຈັດຕັ້ງປະຕິບັດລະບົບການຂົນສົ່ງຜ່ານແດນພາສີອາຊຽນ (ACTS), ເພີ່ມທະວີການຮ່ວມມືດ້ານການຄຸ້ມຄອງ ຄວາມສ່ຽງ, ການກວດສອບຫຼັງການແຈ້ງພາສີ, ການພັດທະນາລະບົບການກໍານົດອັດຕາພາສີ ລະບົບເອກະພາບອາຊຽນ ແລະ ລະບຽບການພາສີອື່ນໆທີ່ກ່ຽວຂ້ອງ.
ກອງປະຊຸມ ຄັ້ງທີ 43 ນີ້ ໄດ້ເນັ້ນເຖິງຄວາມສຳຄັນຂອງການເພີ່ມທະວີການເຊື່ອມໂຍງອາຊຽນ ແລະ ຄວາມຢືດຢຸ່ນຂອງຕ່ອງໂສ້ການສະໜອງ ໂດຍການຮ່ວມມືກັນ, ຮັດແໜ້ນສາຍພົວພັນລະຫວ່າງເຈົ້າໜ້າທີ່ພາສີອາຊຽນ, ສ້າງສະພາບແວດລ້ອມດ້ານພາສີຂອງພາກພື້ນທີ່ມີປະສິດທິຜົນ ສິ່ງດັ່ງກ່າວບໍ່ພຽງແຕ່ຈະຊຸກຍູ້ການຄ້າລະຫວ່າງສອງປະເທດຢ່າງສະໜິດແໜ້ນເທົ່ານັ້ນ, ຫາກຍັງປະກອບສ່ວນເຂົ້າໃນການເຊື່ອມໂຍງເສດຖະກິດ ຢ່າງກວ້າງຂວາງ, ສະຖຽນລະພາບ ແລະ ຄວາມຈະເລີນຮຸ່ງເຮືອງພາຍໃນອາຊຽນ.
ໂອກາດນີ້ ທ່ານ ພຸດທະນີກອນ ເຄນນະວົງ ມີຄຳເຫັນວ່າ ການສ້າງແຜນຍຸດທະສາດດ້ານພາສີອາຊຽນ 2026-2030 (SPCDs 2026-2030) ເປັນແຜນຜັງຂອງການຈັດຕັ້ງປະຕິບັດໃນ 5 ປີ ຂ້າງໜ້າ, ໂດຍຊີ້ແຈງບັນດາບຸລິມະສິດ ແລະ ຊີ້ນຳຄວາມພະຍາຍາມລວມ ປັບປຸງການປະຕິບັດງານດ້ານພາສີໃຫ້ທັນສະໄໝ, ຮັບເອົາການຫັນເປັນດິຈິຕອນແລະ ສະຫນັບສະໜູນເປົ້າໝາຍຂອງປະຊາຄົມເສດຖະກິດອາຊຽນ ການແລກປ່ຽນຄຳຄິດເຫັນ ຄັ້ງນີ້ ຈະຊ່ວຍສ້າງແຜນຍຸດທະສາດທີ່ມຸ່ງໄປເຖິງການຕອບໂຕ້ຕໍ່ສິ່ງທ້າທາຍທີ່ພົ້ນເດັ່ນ ຈາກການຄ້າທາງອິເລັກໂທນິກ ໄປສູ່ຄວາມໝັ້ນຄົງຂອງຕ່ອງໂສ້ການສະໜອງຄວາມຕ້ອງການ, ເພີ່ມທະວີຄວາມໄວ້ເນື້ອເຊື່ອໃຈເຊິ່ງກັນ ແລະ ກັນ, ແບ່ງປັນວິທີປະຕິບັດທີ່ດີທີ່ສຸດແລະ ລົງທຶນເຂົ້າໃນການສ້າງຄວາມສາມາດ ເພື່ອຮັບປະກັນໃຫ້ບັນດາປະເທດສະມາຊິກໄດ້ຮັບຜົນປະໂຫຍດເທົ່າທຽມກັນຈາກການຮ່ວມມື.
