ໃນລະຫວ່າງ ວັນທີ 26-29 ຕຸລາ 2025, ທ່ານ ຈັນທະພອນ ຄຳມະນີຈັນ ຫົວໜ້າຫ້ອງການ ຄະນະກຳມະການຮ່ວມມື ລາວ-ຫວຽດນາມ ກະຊວງການເງິນ ສປປ ລາວ ໄດ້ພົບປະ ແລະ ເຮັດວຽກ ກັບຜູ້ແທນຫ້ອງການຄະນະກໍາມະການຮ່ວມມືຫວຽດນາມ-ລາວ ນໍາໂດຍ ທ່ານ ເຢືອງ ຮຸ່ງ ເກື່ອງ ຮອງຫົວໜ້າກົມໜີ້ສິນ ແລະ ເສກຖະກິດຕ່າງປະເທດ ກະຊວງການເງິນ ສສ ຫວຽດນາມ ພ້ອມດ້ວຍຜູ້ຕາງໜ້າຈາກບັນດາກະຊວງ ແລະ ຂະແໜງການກ່ຽວຂ້ອງທັງສອງຝ່າຍເຂົ້າຮ່ວມ. 
ກອງປະຊຸມຄັ້ງນີ້, ສອງຝ່າຍ ໄດ້ປຶກສາຫາລື ເປັນເອກະພາບກັບແຜນການເຄື່ອນໄຫວ ແລະ ກະກຽມເນື້ອໃນເອກະສານໃຫ້ແກ່ກອງປະຊຸມ ຄັ້ງທີ 48 ຂອງຄະນະກຳມະການຮ່ວມມືທະວິພາຄີ ລະຫວ່າງ ລັດຖະບານ ລາວ ແລະ ລັດຖະບານ ຫວຽດນາມ ປະຈຳປີ 2026 ໂດຍໄດ້ມອບໃຫ້ບັນດາກະຊວງ, ຂະແໜງການຂອງທັງສອງຝ່າຍລົງເລິກຕີລາຄາຜົນການຈັດຕັ້ງປະຕິບັດຜົນສໍາເລັດຂອງກອງປະຊຸມ ຄັ້ງທີ 47 ຜ່ານມາ ແລະ ສະເໜີທິດທາງ, ແຜນການຮ່ວມມືໃນປີ 2026. ພ້ອມກັນນັ້ນ, ສອງຝ່າຍ ໄດ້ສະຫຼຸບ-ສັງລວມເປັນຮ່າງບົດບັນທຶກ ແລະ ແຜນການຮ່ວມມືໃນປີ 2026 ລະຫວ່າງ ລັດຖະບານ ແຫ່ງ ສປປ ລາວ ແລະ ລັດຖະບານ ແຫ່ງ ສສ ຫວຽດນາມ ອີກດ້ວຍ. 
ໂອກາດນີ້, ຄະນະຜູ້ແທນຈາກສອງຫ້ອງການ ໄດ້ພ້ອມກັນລົງໄປກວດກາຄວາມຄືບໜ້າຕົວຈິງ ຂອງໂຄງການກໍ່ສ້າງສວນສາທາລະນະມິດຕະພາບ ລາວ-ຫວຽດນາມ ຢູ່ເຂດ ບ້ານດົງໝາກຄາຍ, ເມືອງໄຊທານີ, ນະຄອນຫຼວງວຽງຈັນ ຊຶ່ງເປັນໂຄງການທີ່ມີຄວາມໝາຍສໍາຄັນ ແລະ ເປັນສັນຍາລັກພິເສດໃນການພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ລາວ-ຫວຽດນາມ, ຫວຽດນາມ-ລາວ ໂດຍຈະກໍ່ສ້າງໃຫ້ສໍາເລັດ ແລະ ເປີດການນໍາໃຊ້ໃນໂອກາດສະເຫຼີມສະຫຼອງວັນສ້າງຕັ້ງ ສປປ ລາວ ຄົບຮອບ 50 ປີ ໃນວັນທີ 2 ທັນວາ 2025 ນີ້.
