ໃນວັນທີ 21 ຕຸລາ 2025, ກົມພາສີ ໄດ້ຈັດຝຶກອົບຮົມກ່ຽວກັບວຽກແຜນງານຜູ້ປະກອບການມາດຕະຖານເອອີໂອ (Authorized Economic Operator (AEO)) ຂື້ນ ເປັນເວລາ 3 ວັນ ແຕ່ວັນທີ 21 ຫາ 23 ຕຸລາ 2025. ໂດຍການເປັນປະທານ ຂອງທ່ານ ວົງວັນເພັງ ພູມສະຫວັນ ຮອງຫົວໜ້າກົມພາສີ, ມີຫົວໜ້າພະແນກ, ຮອງຫົວໜ້າພະແນກ, ຫົວໜ້າພາສີປະຈໍາແຂວງ, ຫົວໜ້າດ່ານພາສີສາກົນ, ຜູ້ຕາງໜ້າຄະນະຮັບຜິດຊອບວຽກງານໂຄງການ ຜູ້ປະກອບການມາດຕະຖານ ເອອີໂອ, ຫົວໜ້າຂະແໜງ, ພ້ອມດ້ວຍພະນັກງານວິຊາການກົມພາສີ ເຂົ້າຮ່ວມ. ທ່ານ ວົງວັນເພັງ ພູມສະຫວັນ ໄດ້ໃຫ້ຄຳເຫັນວ່າ: ການຝຶກອົບຮົມຄັ້ງນີ້ ແມ່ນມີຄວາມໝາຍຄວາມສຳຄັນຫຼາຍ ເນື່ອງຈາກ ວຽກງານການອຳນວຍຄວາມສະດວກ ທາງດ້ານການຄ້າ ເປັນວຽກງານທີ່ມີຄວາມໝາຍຄວາມສຳຄັນ ຕໍ່ການຂະຫຍາຍຕົວຂອງລະບົບເສດຖະກິດ ໃນຍຸກຂອງການຄ້າເສລີໃນປະຈຸບັນ ຊຶ່ງກໍ່ເປັນພັນທະຂອງລັດຖະບານ ສປປ ລາວ ທີ່ມີຕໍ່ອົງການການຄ້າໂລກ ແລະ ສາກົນ, ແຜນງານຜູ້ປະກອບການມາດຕະຖານເອອີໂອ ເປັນການຮ່ວມມືກັນລະຫວ່າງ ພາກລັດ ແລະ ພາກຜູ້ປະກອບການ ເພື່ອຍົກສູງການຈັດຕັ້ງປະຕິບັດລະບຽບກົດໝາຍ, ຮັບປະກັນຄວາມປອດໄພທາງດ້ານການຄ້າສາກົນ ແລະ ເພີ່ມທະວີການອໍານວຍຄວາມສະດວກທາງດ້ານການຄ້າ ເຊິ່ງເປັນລະບຽບການທີ່ອົງການພາສີໂລກ ສ້າງຂຶ້ນ ໃນຂອບມາດຕະຖານການຮັກສາຄວາມປອດໄພ ແລະ ການອຳນວຍຄວາມສະດວກທາງການຄ້າ ລະຫວ່າງປະເທດ ( SAFE Framework of Standards ) ແລະ ແນະນໍາໃຫ້ບັນດາປະເທດສະມາຊິກທົ່ວໂລກຈັດຕັ້ງປະຕິບັດ. ບົດຮຽນທີ່ຝຶກອົບຮົມ ໃນຄັ້ງນີ້ ປະກອບມີ: ຄວາມຄືບໜ້າການຈັດຕັ້ງປະຕິບັດແຜນງານເອອີໂອຂອງກົມພາສີ; ການຈັດຕັ້ງປະຕິບັດແຜນງານເອອີໂອຂອງພາສີຍີ່ປຸ່ນ; ມາດຕະຖານສາກົນ ແລະ ກິດຈະກໍາຂອງແຜນງານເອອີໂອ;ການກວດສອບມາດຕະຖານ ແລະ ຈຸດສໍາຄັນຂອງເອອີໂອແຕ່ລະປະເພດ; ລົງເລີກກິດຈະກໍາໃນການສ້າງຄູ່ມື SAQ ການປະເມີນເອອີໂອ ສໍາລັບປະເພດຜູ້ສົ່ງອອກ, ຜູ້ບໍລິການແຈ້ງພາສີ._1761039647.jpeg)
_1761039674.jpeg)
_1761039712.jpeg)
_1761039712.jpeg)
