ໃນວັນທີ 03 ຕຸລາ 2025 ຫ້ອງການ ກະຊວງການເງິນ ປິດຝຶກອົບຮົມວຽກງານການສ້າງແຜນງົບປະມານ, ຂັ້ນຕອນການປະກອບເອກະສານວຽກງານຄັງເງິນແຫ່ງລັດ, ວຽກງານປະເມີນຜົນ ແລະ ຈັດຊື້ຈັດຈ້າງ ໃຫ້ແກ່ພະນັກງານຂະແໜງການເງິນ ໂດຍການເປັນປະທານຂອງ ທ່ານ ພົງສະຫວັນ ລາດທິຈັກ ຮອງຫົວໜ້າຫ້ອງການ, ກະຊວງການເງິນ ມີ ຄະນະພະແນກ, ວິຊາການຈາກບັນດາກົມ ພ້ອມດ້ວຍ ນັກວິທະຍາກອນ ແລະ ນັກສຳມະນາກອນ ທີ່ຕາງໜ້າຈາກບັນດາກົມ ເຂົ້າຮ່ວມ.
 |
ຊຸດຝຶກອົບຮົມຄັ້ງນີ້ ດໍາເນີນເປັນເວລາ 02 ວັນ ດ້ວຍຄວາມຮັບຜິດຊອບສູງຂອງບັນດານັກວິທະຍາກອນ ແລະ ນັກສຳມະນາກອນ ຈາກບັນດາກົມ ທີ່ໄດ້ເຂົ້າຮ່ວມ, ໄດ້ຕັ້ງໜ້າປະຕິບັດຕາມວາລະທີ່ວາງໄວ້ ເອົາໃຈໃສ່ຕິດຕາມ, ຮັບຟັງ, ປະກອບສ່ວນ ແລກປ່ຽນຄໍາຄິດຄໍາເຫັນຢ່າງຕັ້ງໜ້າ, ຈິງໃຈ ແລະ ສ້າງສັນ ເຮັດໃຫ້ຊຸດຝຶກອົບຮົມ ບັນລຸຕາມລະດັບ ຄາດໝາຍທີ່ວາງໄວ້ ແລະ ໄດ້ຮັບຜົນສໍາເລັດ.
ໃນການດໍາເນີນຊຸດຝຶກອົບຮົມ ແມ່ນໄດ້ຮັບຟັງການນໍາສະເໜີກ່ຽວກັບ ວຽກງານການສ້າງແຜນງົບປະມານ, ຂັ້ນຕອນການປະກອບເອກະສານວຽກງານຄັງເງິນແຫ່ງລັດ, ວຽກງານປະເມີນຜົນ ແລະ ຈັດຊື້-ຈັດຈ້າງ, ໄດ້ຮັບຮູ້ ແລະ ເຂົ້າໃຈຕໍ່ກັບພາລະບົດບາດ ແລະ ຄວາມຮັບຜິດຊອບກ່ຽວກັບຂອບການຈັດຕັ້ງປະຕິບັດວຽກງານ ຫຼາຍຂື້ນ. ພ້ອມທັງ ໄດ້ມີການເຜີຍແຜ່ ແລະ ແນະນໍາລະບຽບການ ດັ່ງກ່າວ, ຊຶ່ງຈະເປັນການຍົກສູງຄວາມຮັບຮູ້ ແລະ ເຂົ້າໃຈຕໍ່ກັບເນື້ອໃນອັນສໍາຄັນເພື່ອເປັນຂໍ້ມູນໃນການສືບຕໍ່ຈັດ ຕັ້ງປະຕິບັດວຽກງານຂອງຕົນ ໂດຍສະເພາະ ໃນການປະກອບເອກະສານ, ຂັ້ນຕອນຕ່າງໆ, ໃຫ້ແທດເໝາະ ກັບສະພາບຄວາມເປັນຈິງໃນແຕ່ລະໄລຍະ ເພື່ອຫາວິທີທາງແກ້ໄຂໃນຕໍ່ໜ້າຈາກຜູ້ບັນຍາຍທີ່ມີປະສົບ ປະການ ແລະ ບົດຮຽນໃນການຈັດຕັ້ງປະຕິບັດວຽກງານຕົວຈິງ ພ້ອມທັງເປັນເວທີໃນການສົນທະນາ ແລະ ແລກປ່ຽນບົດຮຽນຮ່ວມກັນ.
 |
ໂອກາດນີ້ ທ່ານ ພົງສະຫວັນ ລາດທິຈັກ ສະແດງຄວາມຊົມເຊີຍ ຕໍ່ຜົນສຳເລັດຂອງຊຸດຝຶກອົບຮົມຄັ້ງນີ້, ຊົມເຊີຍ ຜູ້ບັນຍາຍ ແລະ ນັກສຳມະນາກອນ ທີ່ເອົາໃຈໃສ່ໃນການຕິດຕາມ ແຕ່ຕົ້ນຕະຫຼອດປາຍ ແລະ ມີສ່ວນຮ່ວມໃນການປະກອບຄໍາຄິດ ຄໍາເຫັນຢ່າງກົງໄປກົງມາ ແລະ ສ້າງສັນ ພ້ອມດ້ວຍຄະນະຮັບຜິດຊອບ ທີ່ໄດ້ຫ້າງຫາກະກຽມ ດ້ວຍຄວາມຮັບຜິດຊອບສູງ ແລະ ເຮັດໃຫ້ ຊຸດຝຶກອົບຮົມໄດ້ດໍາເນີນໄປດ້ວຍຜົນສໍາເລັດຢ່າງສະຫງ່າງາມ.
