• ກົມງົບປະມານແຫ່ງລັດ
  • |
  • 2025-08-28
  • |
  • ວຽກງານພັກ-ພະນັກງານ

        ໃນວັນທີ 28 ສິງຫາ 2025 ໜ່ວຍພັກຮາກຖານກົມງົບປະມານແຫ່ງລັດ ກະຊວງການເງິນ ໄດ້ຈັດກອງປະຊຸມເລືອກຕັ້ງຜູ້ແທນສົມບູນ, ສຳຮອງ ເພື່ອເຂົ້າຮ່ວມກອງປະຊຸມໃຫຍ່ຜູ້ແທນອົງຄະນະພັກກະຊວງການເງິນ ສະໄໝທີ IV ໂດຍການເປັນປະທານຂອງສະຫາຍ ພູວົງ ກິດຕະວົງ ກຳມະການຄະນະປະຈຳພັກກະຊວງ,​ ຮອງລັດຖະມົນຕີ ກະຊວງການເງິນ, ມີບັນດາສະຫາຍເລຂາໜ່ວຍພັກ, ຮອງເລຂາໜ່ວຍພັກ, ຄະນະພັກ, ສະຫາຍຜູ້ຕາງໜ້າກົມຈັດຕັ້ງ ແລະ ພະນັກງານ, ກົມກວດກາລັດ ແລະ ສະມາຊິກພັກສົມບູນ, ສຳຮອງເຂົ້າຮ່ວມ.

        ສະຫາຍ ໜູເຊີຍ ພົມສີຈັນ ເລຂາໜ່ວຍພັກຮາກຖານ, ຫົວໜ້າກົມງົບປະມານແຫ່ງລັດ ໄດ້ເປີດກອງປະຊຸມ ໂດຍໃຫ້ຮູ້ວ່າ: ກອງປະຊຸມຄັ້ງນີ້ ແມ່ນມີຄວາມໝາຍຄວາມສຳຄັນຢ່າງຍິ່ງ ໃນຊິວິດການເມືອງຂອງສະຊິກພັກຮາກຖານກົມງົບປະມານແຫ່ງລັດ ແມ່ນຈະໄດ້ສຸມໃສ່ຈັດຕັ້ງຜັນຂະຫຍາຍ ເນື້ອໃນມະຕິກອງປະຊຸມໃຫ່ຍ ຄັ້ງທີ XI ຂອງພັກ, ການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດການເງິນ ໂດຍສະເພາະແມ່ນການຈັດຕັ້ງປະຕິບັດແຜນງົບປະມານແຫ່ງລັດ ປະຈໍາປີ 2025 ໃຫ້ບັນລຸຕາມແຜນການທີ່ກຳນົດໄວ້ ແລະ ຕິດພັນກັບການຈັດຕັ້ງ ປະຕິບັດທິດຊີ້ນໍາຂອງກົມການເມືອງສູນກາງພັກ ວ່າດ້ວຍການສ້າງເສດຖະກິດ ເອກະລາດ ເປັນເຈົ້າຕົນເອງ (ສອຈ) ສະບັບເລກທີ 004/ກມສພ, ລົງວັທີ 11 ເມສາ 2024 ໃຫ້ປະກົດຜົນເປັນຈິງ ຢ່າງຕັ້ງໜ້າ.

        ໃນກອງປະຊຸມ ໄດ້ມີການປ່ອນບັດເລືອກຕັ້ງຜູ້ເອົາແທນສົມບູນ, ສຳຮອງ ເພື່ອເຂົ້າຮ່ວມກອງປະຊຸມໃຫຍ່ອົງຄະນະພັກກະຊວງການເງິນ ສະໄໝ IV ບົນພື້ນຖານຫຼັກການລວມສູນປະຊາທິປະໄຕ ແລະ ຖືກຕ້ອງສອດຄ່ອງກັບມາດຕະການ, ເງື່ອນໄຂ ທີ່ກຳນົດໄວ້ ເຊິ່ງມີຜູ້ແທນສົມບູນທັງໝົດ 32 ສະຫາຍ, ໃນນັ້ນ ລົງສະໝັກເລືອກຕັ້ງຜູ້ແທນ 19 ສະຫາຍ ເລືອກເອົາ 15 ສະຫາຍ, ສຳຮອງ 2 ສະຫາຍ.

        ໃນຕອນທ້າຍຂອງກອງປະຊຸມ ສະຫາຍ ພູວົງ ກິດຕະວົງ ໄດ້ໃຫ້ກຽດໂອ້ລົມ ແລະ ສະແດງຄວາມຊົມເຊີຍຕໍ່ຜົນສຳເລັດຂອງກອງປະຊຸມໃນຄັ້ງນີ້ ທັງເນັ້ນໃຫ້ບັນດາສະຫາຍຜູ້ແທນສົມບູນ, ສຳຮອງ ທີ່ໄດ້ຮັບການຄັດເລືອກຜູ້ແທນຂອງໜ່ວຍພັກຮາກຖານກົມງົບປະມານແຫ່ງລັດ ຕ້ອງຍົກສູງຄວາມຮັບຜິດຊອບໃນການເຂົ້າຮ່ວມກອງປະຊຸມ ແລະ ໃຊ້ສິດຂອງຕົນຢ່າງເຕັມສ່ວນບົນພື້ນຖານຖືກຕ້ອງຕາມລະບຽບ ຫຼັກການກຳນົດ, ເຊື່ອມຊຶມ ກຳແໜ້ນບັນດາຂໍ້ຫ້າມ (10 ຂໍ້ຫ້າມ) ທີ່ຄະນະຮັບຜິດຊອບໄດ້ສະເໜີ ແລະ ຜູ້ແທນສົມບູນຕ້ອງເອົາໃຈໃສ່ຕິດຕາມວາລະການດໍາເນີນກອງປະຊຸມໃຫຍ່ຂອງອົງຄະນະພັກກະຊວງການເງິນ ຢ່າງເປັນປົກກະຕິ.

© 2025 Copyright: ກະຊວງການເງິນ, ສປປ ລາວ