ໃນວັນທີ 27 ສິງຫາ 2025 ໜ່ວຍພັກຮາກຖານກົມພາສີ ໄດ້ຈັດກອງປະຊຸມ ເລືອກຕັ້ງຜູ້ແທນສົມບູນ, ສຳຮອງ ເຂົ້າຮ່ວມກອງປະຊຸມໃຫຍ່ຜູ້ແທນອົງຄະນະພັກ ກະຊວງການເງິນ ສະໄໝທີ IV ຂື້ນ ໂດຍການເປັນປະທານຂອງ ສະຫາຍ ສັນຕິພາບ ພົມວິຫານ ເລຂາຄະນະບໍລິຫານງານພັກ, ລັດຖະມົນຕີກະຊວງການເງິນ, ມີກໍາມະການຄະນະບໍລິຫານງານພັກພັກກະຊວງການເງິນ, ຄະນະຮັບຜິດຊອບຕິດຕາມກອງປະຊຸມ, ສະມາຊິກພັກສົມບູນ, ສຳຮອງ ໜ່ວຍ ພັກຮາກຖານກົມພາສີ ແລະ ແຂກຖືກເຊີນເຂົ້າຮ່ວມ. ໃນກອງປະຊຸມ ສະຫາຍ ປອ. ພູເຂົາຄໍາ ວັນນະວົງໄຊ, ກໍາມະການຄະນະບໍລິຫານງານພັກກະຊວງການເງິນ, ເລຂາໜ່ວຍພັກຮາກຖານກົມພາສີ ໄດ້ເປີດກອງປະຊຸມ ເຊິ່ງສະຫາຍໄດ້ກ່າວວ່າ: ໃນທ່າມກາງບັນຍາກາດ ທົ່ວຂະແໜງການເງິນພວກເຮົາ ພວມສະເຫຼີມສະຫຼອງວັນສໍາຄັນຂອງພັກ, ຂອງຊາດ ແລະ ວັນສາກົນອື່ນໆ ຢ່າງເປັນຂະບວນຟົດຟື້ນ. ຄະນະໜ່ວຍພັກຮາກຖານ ແລະ ສະມາຊິກພັກຂອງກົມພາສີ ໄດ້ຈັດຕັ້ງຜັນຂະຫຍາຍເນື້ອໃນມະຕິກອງປະຊຸມໃຫ່ຍ ສະໄໝທີ XI ຂອງພັກ, ການຈັດຕັ້ງປະຕິບັດ ວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດການເງິນ, ເຊິ່ງຕິດພັນກັບການຈັດຕັ້ງປະຕິບັດທິດຊີ້ນໍາຂອງກົມການເມືອງສູນກາງພັກວ່າດ້ວຍການສ້າງເສດຖະກິດເອກະລາດເປັນເຈົ້າຕົ້ນເອງ ສະບັບເລກທີ 004/ກມສພ, ລົງວັນທີ 11 ເມສາ 2024 ທີ່ມີລັກສະນະ ຕັ້ງໜ້າ. ສະນັ້ນ, ກອງປະຊຸມໃນຄັ້ງນີ້ ໜ່ວຍພັກຮາກຖານກົມພາສີມີຄວາມເອກອ້າງທະນົງໃຈ ແລະ ມີກຽດສະຫງ່າ ທີ່ບັນດາສະຫາຍ ສະມາຊິກພັກຮາກຖານກົມພາສີ ໄດ້ປະຕິບັດຕາມມະຕິ, ຄໍາສັ່ງ, ຂໍ້ກຳນົດກົດລະບຽບຕ່າງໆ ທີ່ຂັ້ນເທິງໄດ້ວາງອອກຢ່າງແຂງແຮງ ແລະ ມີລັກສະນະຕັ້ງໜ້າ. ພ້ອມກັນນັ້ນ ສະມາຊິກພັກທຸກສະຫາຍ ຍັງໄດ້ຕັ້ງໜ້າປະກອບສ່ວນເຂົ້າໃນການຈັດຕັ້ງປະຕິບັດວຽກງານວິຊາສະເພາະ ທີ່ສໍາຄັນ ໃນວຽກງານຂອງກົມ ເປັນຕົ້ນປະກອບສ່ວນເຂົ້າໃນການ ຄົ້ນຄ້ວາ, ສ້າງ, ປັບປຸງກົດໝາຍ, ເພື່ອເປັນເຄື່ອງມືເກັບລາຍຮັບພາສີເຂົ້າງົບປະມານດ້ວຍຄວາມຮັບຜິດຊອບສູງ ຄຽງຄູ່ກັບການຫັນເປັນທັນສະໄໝຢ່າງແຂງແຮງ. ໃນກອງປະຊຸມ ໄດ້ມີການປ່ອນບັດເລືອກຕັ້ງຜູ້ແທນສົມບູນ, ສຳຮອງ ເພື່ອເຂົ້າຮ່ວມກອງປະຊຸມໃຫຍ່ຜູ້ແທນ ອົງຄະນະພັກກະຊວງການເງິນ ສະໄໝທີ IV ບົນພື້ນຖານຫຼັກການລວມສູນປະຊາທິປະໄຕ ແລະ ຖືກຕ້ອງສອດຄ່ອງກັບມາດຕະຖານ, ເງື່ອນໄຂ ທີ່ກຳນົດໄວ້ ເຊິ່ງມີຜູ້ສະໝັກເລືອກຕັ້ງທັງໝົດ 21 ສະຫາຍ ເລືອກເອົາຜູ້ແທນສົມບູນ 17 ສະຫາຍ.ໃນຕອນທ້າຍຂອງກອງປະຊຸມຍັງໄດ້ຮັບຟັງປະທານກອງປະຊຸມມີຄຳເຫັນໂອ້ລົມ ເຊິ່ງສະຫາຍມີຄໍາເຫັນເນັ້ນໜັກເພີ່ມເຕີມ ເພື່ອໃຫ້ບັນດາສະຫາຍສະມາຊິກໜ່ວຍພັກຮາກຖານກົມພາສີ ນຳໄປພິຈາລະນາຄົ້ນຄວ້າ ພ້ອມທັງຍົກສູງຄວາມເປັນເຈົ້າການປະຕິບັດໜ້າທີການເມືອງ ດ້ວຍຄວາມຮັບຜິດຊອບສູງ ແລະ ຜົນສຳເລັດຈົບງາມ._1756374629.png)
_1756374641.png)
_1756374679.png)
