ໃນວັນທີ 27 ສິງຫາ 2025, ໜ່ວຍພັກຮາກຖານກົມປະເມີນຜົນ ແລະ ການຈັດຊື້-ຈັດຈ້າງ ກະຊວງການເງິນ ໄດ້ຈັດກອງປະຊຸມເລືອກຕັ້ງຜູ້ແທນສົມບູນ, ສຳຮອງ ເພື່ອເຂົ້າຮ່ວມກອງປະຊຸມໃຫຍ່ຜູ້ແທນອົງຄະນະພັກກະຊວງການເງິນ ສະໄໝທີ IV ໂດຍການເປັນປະທານຂອງ ສະຫາຍ ນາງ ພອນວັນ ອຸທະວົງ ຮອງເລຂາຄະນະບໍລິຫານງານພັກ, ຮອງລັດຖະມົນຕີ ກະຊວງການເງິນ, ມີບັນດາສະຫາຍເລຂາໜ່ວຍພັກ, ຮອງເລຂາໜ່ວຍພັກ, ຄະນະພັກ, ສະຫາຍຜູ້ຕາງໜ້າກົມຈັດຕັ້ງ ແລະ ພະນັກງານ, ກົມກວດກາລັດ ແລະ ສະມາຊິກພັກສົມບູນ, ສຳຮອງຂອງກົມເຂົ້າຮ່ວມ.
ສະຫາຍ ອຸຕະແກ້ວ ແກ້ວດວງສິນ ເລຂາໜ່ວຍພັກຮາກຖານ, ຫົວໜ້າກົມປະເມີນຜົນ ແລະ ການຈັດຊື້-ຈັດຈ້າງ ໄດ້ເປີດກອງປະຊຸມ ໂດຍໄດ້ໃຫ້ຮູ້ວ່າ: ກອງປະຊຸມຄັ້ງນີ້ ແມ່ນມີຄວາມໜາຍຄວາມສຳຄັນຢ່າງຍິ່ງ ໃນຊິວິດການເມືອງທີ່ບັນດາສະມາຊິກພັກສົມບູນ, ສຳຮອງ ຈະໄດ້ໃຊ້ສິດລົງຄະແນນສຽງເພື່ອຄັດເລືອກເອົາຜູ້ແທນສົມບູນ ແລະ ສຳຮອງ ເຂົ້າຮ່ວມກອງປະຊຸມອົງຄະນະພັກ ກະຊວງການເງິນ ສະໄໝທີ IV ບັນດາສະຫາຍສະມາຊິກພັກຮາກຖານ ໂດຍສຸ່ມໃສ່ຄົ້ນຄວ້າຄັດເລືອກເອົາຜູ້ທີ່ມີຄຸນທາດການເມືອງທີ່ໜັກແໜ້ນ, ມີຄຸນສົມບັດສິນທຳປະຕິວັດ, ຊື່ສັດບໍລິສຸດ ແລະ ມີຄວາມຈົງຮັກພັກດີຕໍ່ປະເທດຊາດ ກໍຄືພາລະກິດປ່ຽນແປງໃໝ່ຂອງພັກ ແລະ ປະຕິບັດໜ້າທີ່ການເມືອງທີ່ໄດ້ຮັບມອບໝາຍດ້ວຍຜົນສຳເລັດ. 
ໃນກອງປະຊຸມ ໄດ້ມີການປ່ອນບັດເລືອກຕັ້ງຜູ້ແທນສົມບູນ, ສຳຮອງ ເພື່ອເຂົ້າຮ່ວມກອງປະຊຸມໃຫຍ່ຜູ້ແທນ ອົງຄະນະພັກກະຊວງການເງິນ ສະໄໝທີ IV ບົນພື້ນຖານຫຼັກການລວມສູນປະຊາທິປະໄຕ ແລະ ຖືກຕ້ອງສອດຄ່ອງກັບມາດຕະຖານ, ເງື່ອນໄຂ ທີ່ກຳນົດໄວ້ ເຊິ່ງມີຜູ້ສະໝັກເລືອກຕັ້ງທັງໝົດ 19 ສະຫາຍ ເລືອກເອົາຜູ້ແທນສົມບູນ 15 ສະຫາຍ, ສຳຮອງ 2 ສະຫາຍ. ໃນຕອນທ້າຍຂອງກອງປະຊຸມ ສະຫາຍ ນາງ ພອນວັນ ອຸທະວົງ ໄດ້ໃຫ້ກຽດໂອ້ລົມ ແລະ ສະແດງຄວາມຊົມເຊີຍຕໍ່ຜົນສຳເລັດຂອງກອງປະຊຸມໃນຄັ້ງນີ້ ທັງເນັ້ນໃຫ້ບັນດາສະຫາຍສະມາຊິກ ພັກຮາກຖານກົມປະເມີນຜົນ ແລະ ການຈັດຊື້-ຈັດຈ້າງ ເຊື່ອມຊຶມບັນດາແນວທາງນະໂຍບາຍຂອງພັກ-ລັດ ເປັນຕົ້ນແມ່ນ ກົດໝາຍ, ມະຕິ, ຄໍາສັ່ງ, ແຈ້ງການ, ບົດແນະນໍາ, ການນໍາພາ-ຊີ້ນໍາຂອງຄະນະໜ່ວຍພັກເອົາໃຈໃສ່ຕໍ່ວຽກງານແນວຄິດ,ມີການຊຸກຍູ້, ຕິດຕາມ, ກວດກາ ການຈັດຕັ້ງປະຕິບັດວຽກງານ ແລະ ການເຄື່ອນໄຫວຂອງສະມາຊິກພັກ-ພະນັກງານໃຫ້ເປັນປົກກະຕິ ຜ່ານກົນໄກ ການຮ່ວມຊີວິດການເມືອງໃນໜ່ວຍພັກ, ການຄົ້ນຄ້ວາການຫັນເປັນ ທັນສະໃໝຕ້ອງພັດທະນາລະບົບໃຫ້ສາມາດນໍາໃຊ້ເຂົ້າໃນການຄຸ້ມຄອງການຈັດຊື້-ຈັດຈ້າງ ໃຫ້ເປັນລະບົບຄົບວົງຈອນ ແລະ ເຊື່ອມຈອດກັບພາກສວ່ນຕ່າງໆ ໃຫ້ວ່ອງໄວ ແລະ ມີຖານຂໍ້ມູນທີ່ເອກະພາບ.
