ໃນວັນທີ 26 ສິງຫາ 2025 ທີ່ກະຊວງການເງິນ ໜ່ວຍພັກຮາກຖານກົມຄຸ້ມຄອງວິສາຫະກິດການເງິນ ໄດ້ຈັດກອງປະຊຸມເລືອກຕັ້ງຜູ້ແທນສົມບູນ, ສຳຮອງ ເຂົ້າຮ່ວມກອງປະຊຸມໃຫຍ່ຜູ້ແທນອົງຄະນະພັກກະຊວງການເງິນ ສະໄໝທີ IV ໂດຍການເປັນປະທານຂອງສະຫາຍ ພູວົງ ກິດຕະວົງ ກຳມະການຄະນະປະຈຳພັກກະຊວງ, ຮອງລັດຖະມົນຕີ ກະຊວງການເງິນ, ມີສະຫາຍ ໄພທູນ ທ່ຽງລະໄມ ເລຂາໜ່ວຍພັກຮາກຖານກົມຄຸ້ມຄອງວິສາຫະກິດການເງິນ, ມີສະຫາຍ ຂັນຄຳ ໄຊຍະວົງ ເລຂາໜ່ວຍພັກຮາກຖານ, ຮັກສາການຫົວໜ້າກົມກວດກາລັດ, ຮອງເລຂາໜ່ວຍພັກ, ກຳມະການພັກ ແລະ ສະມາຊິກພັກສົມບູນ, ສຳຮອງ ຂອງໜ່ວຍພັກເຂົ້າຮ່ວມ.
ສະຫາຍ ໄພທູນ ທ່ຽງລະໄມ ໄດ້ກ່າວວ່າ: ກອງປະຊຸມເລືອກຕັ້ງຜູ້ແທນສົມບູນ, ສຳຮອງ ຄັ້ງນີ້ ໄດ້ໄຂຂື້ນຢ່າງເປັນທາງການໃນທ່າມກາງບັນຍາກາດທົ່ວຂະແໜງການເງິນ ພວມສະເຫຼີມສະຫຼອງວັນສຳຄັນຂອງຊາດ, ຂອງພັກ ຢ່າງເປັນຂະບວນຟົດຟື້ນ ເປັນຕົ້ນແມ່ນວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 70 ປີ, ຂະບວນການຮັບຕ້ອນກອງປະຊຸມໃຫຍ່ ຄັ້ງທີ IV ຂອງອົງຄະນະພັກກະຊວງການເງິນ, ຄະນະໜ່ວຍພັກຮາກຖານ ໄດ້ຈັດຕັ້ງຜັນຂະຫຍາຍເນື້ອໃນມະຕິກອງປະຊຸມໃຫຍ່ ຄັ້ງທີ XI ຂອງພັກ, ການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດການເງິນ, ເຊິ່ງຕິດພັນກັບການຈັດຕັ້ງປະຕິບັດທິດຊີ້ນຳຂອງກົມການເມືອງສູນກາງພັກ ວ່າດ້ວຍການສ້າງເສດຖະກິດ ເອກະລາດ ເປັນເຈົ້າຕົ້ນເອງ.
ພ້ອມນັ້ນ, ຜູ້ແທນກອງປະຊຸມໄດ້ພ້ອມກັນໃຊ້ສິດຂອງຕົນປ່ອນບັດເລືອກຕັ້ງເອົາຜູ້ແທນສົມບູນ, ສຳຮອງ ບົນພື້ນຖານຫຼັກການລວມສູນປະຊາທິປະໄຕ ແລະ ຖຶກຕ້ອງສອດຄ່ອງກັບມາດຕະຖານ, ເງື່ອນໄຂ ທີ່ກຳນົດໄວ້ ເຊິ່ງມີຜູ້ສະໝັກເລືອກຕັ້ງທັງໝົດ 30 ສະຫາຍ, ເລືອກເອົາຜູ້ແທນສົມບູນ 14 ສະຫາຍ ແລະ ສຳຮອງ 2 ສະຫາຍ.
ໂອກາດນີ້, ສະຫາຍ ພູວົງ ກິດຕະວົງ ໄດ້ໃຫ້ກຽດໂອລົມ ແລະ ສະແດງຄວາມຊົມເຊີຍ ຕໍ່ຜົນສຳເລັດຂອງກອງປະຊຸມໃນຄັ້ງນີ້ ແລະ ຍັງໄດ້ຮັບຮອງເອົາລາຍຊື່ຜູ້ແທນສົມບູນ 14 ສະຫາຍ ແລະ ຜູ້ແທນສຳຮອງ 2 ສະຫາຍ ຂອງໜ່ວຍພັກຮາກຖານກົມຄຸ້ມຄອງວິສາຫະກິດການເງິນ ເພື່ອເຂົ້າຮ່ວມກອງປະຊຸມໃຫຍ່ຜູ້ແທນອົງຄະນະພັກກະຊວງການເງິນ ສະໄໝທີ IV, ນອກນີ້; ປະທານກອງປະຊຸມຍັງໄດ້ເນັ້ນໜັກໃຫ້ບັນດາຜູ້ແທນສົມບູນ, ສຳຮອງ ທີ່ໄດ້ຮັບການຄັດເລືອກ ຕ້ອງເອົາໃຈໃສ່ສ້າງຂະບວນການຂໍ່ານັບຮັບຕ້ອນ ກອງປະຊຸມໃຫຍ່ ຄັ້ງທີ IV ຢ່າງຕັ້ງໜ້າ, ຕິດຕາມສະພາບຫາງສຽງສັງຄົມທີ່ຕິດພັນກັບວຽກງານຂະແໜງການເງິນ, ຕອບໂຕ້ທັນການ ແລະ ຮັບປະກັນໃຫ້ກອງປະຊຸມໃຫຍ່ຂອງພວກເຮົາດຳເນີນໄປຢ່າງມີຜົນສຳເລັດຈົບງານ, ທັງເປັນການປຸກລະດົມຈິດໃຈອັນໃຫຍ່ຫຼວງຕໍ່ຄະນະໜ່ວຍພັກຮາກຖານ ແລະ ສະມາຊິກພັກທັງໝົດ ເພື່ອພ້ອມກັນບຸກບືນສູ້ຊົນການຈັດຕັ້ງປະຕິບັດໜ້າທີ່ການເມືອງຂອງຕົນກ້າວຂຶ້ນສູ່ຜົນສຳເລັດອັນໃໝ່.
