ໃນຕອນບ່າຍ ວັນທີ 26 ສິງຫາ 2025 ຢູ່ທີ່ ແຂວງອັດຕະປື ໄດ້ຈັດກອງປະຊຸມ ປະກາດນໍາໃຊ້ປີຖານການຄິດໄລ່ GDP ໃໝ່ (ປີຖານ 2012) ແລະ ຜົນການຄາດຄະເນ GDP ຄືນຫຼັງ ຕາມລະບົບໂຄງສ້າງປີຖານໃໝ່ (2012-2024) ເພື່ອຮັບໃຊ້ໃຫ້ແກ່ການສ້າງແຜນພັດທະນາເສດຖະກິດ-ສັງຄົມ ຄັ້ງທີ X (2026-2023) ຂອງແຂວງອັດຕະປື. ໂດຍເປັນກຽດເຂົ້າຮ່ວມຂອງ ທ່ານ ນາງ ເພັດສະໝອນ ສອນ, ຫົວໜ້າສູນສະຖິຕິແຫ່ງຊາດ ກະຊວງການເງິນ ແລະ ທ່ານ ສຸລິວົງ ອະໄພວົງ ຫົວໜ້າພະແນກການເງິນແຂວງອັດຕະປື ມີບັນດາພະແນກການອ້ອມຂ້າງແຂວງ, ເມືອງ, ຕາງຫນ້າຈາກ 4 ແຂວງ ພາກໃຕ້, ລັດວິສາຫະກິດ ແລະ ຫົວຫນ່ວຍວິສາຫະກິດ ເຂົ້າຮ່ວມ. ໃນກອງປະຊຸມ ແມ່ນໄດ້ຜ່ານຂໍ້ຕົກລົງຂອງທ່ານເຈົ້າແຂວງ ວ່າດ້ວຍການຮັບຮອງ ແລະ ປະກາດນໍາໃຊ້ລະບົບ ປີຖານໃໝ່ການຄິດໄລ່ GDP ຂອງ ແຂວງ ອັດຕະປື ແລະ ມອບຮັບໃບຢັ້ງຢືນ ຜົນສຳເລັດການປັບປຸງປີຖານ ການຄິດໄລ່ GDP ຂອງແຂວງ ທີ່ໄດ້ປະຕິບັດຕາມປື້ມຄູ່ມືການຄິດໄລ່ GDP ຂັ້ນແຂວງ ແລະ ລະບົບບັນຊີແຫ່ງຊາດ (SNA 2008). ໃນຕອນທ້າຍ ປະທານ ກອງປະຊຸມ ໄດ້ເນັ້ນຕື່ມບາງຈຸດການຈັດຕັ້ງປະຕິບັດໃນຕໍ່ຫນ້າແມ່ນ: ໃຫ້ແຂວງ ສືບຕໍ່ນໍາໃຊ້ລະບົບດັ່ງກ່າວ ເຂົ້າໃນການຄາດຄະເນ GDP ປະຈໍາປີ ຂອງແຂວງ ເພື່ອລາຍງານໃຫ້ຄະນະນໍາຂອງແຂວງ ໃຫ້ເປັນປົກກະຕິ ແລະ ທັນເວລາ, ນຳໃຊ້ຖານດັ່ງກ່າວ ເພືອເປັນບ່ອນອີງ ໃນການຄາດຄະເນແຜນພັດທະນາ ເສດຖະກິດ-ສັງຄົມ ຂອງ ແຂວງ (2026-2030), ສືບຕໍ່ສ້າງແຜນການເຊື່ອມໂຍງລະບົບຖານຂໍ້ມູນ ລະຫວ່າງເມືອງ, ແຂວງ ແລະ ສູນກາງ ໃຫ້ເປັນລະບົບຖານຂໍ້ມູນດຽວກັນ ແລະ ສ້າງກົນໄກການປະສານງານຮ່ວມລະຫວ່າງ ພະແນກການເງິນ ກັບບັນດາພະແນການອ້ອມຂ້າງໃຫ້ເປັນປົກກະຕິ.
