ໃນວັນທີ 26 ສິງຫາ 2025 ຢູ່ທີ່ ແຂວງອັດຕະປື ໄດ້ຈັດພິທີໂຮມຊຸມນຸມປະກາດເປີດບັ້ນການສໍາຫຼວດພົນລະເມືອງ ແລະ ທີ່ຢູ່ອາໄສ ທົ່ວປະເທດ ຄັ້ງທີ V ປີ 2025 ຂື້ນ ໂດຍເຂົ້າຮ່ວມເປັນປະທານຂອງ ທ່ານ ພົນໂທ ວັນທອງ ກອງມະນີ ກຳມະການສູນກາງພັກ ເລຂາຄະນະບໍລິຫານງານພັກແຂວງ ເຈົ້າແຂວງ ແຂວງອັດຕະປື ແລະ ທ່ານ ນາງ ເພັດສະໝອນ ສອນ ຫົວໜ້າສູນສະຖິຕິແຫ່ງຊາດ, ກະຊວງການເງິນ, ມີຄະນະຊີ້ນໍາລະດັບຊາດ ການສຳຫຼວດພົນລະເມືອງ ແລະ ທີ່ຢູ່ອາໄສ ທົ່ວປະເທດ ພ້ອມດ້ວຍພະນັກງານຫຼັກແຫຼ່ງຂອງແຂວງ ແລະ ເມືອງ ເຂົ້າຮ່ວມ. | |
ໃນໂອກາດນີ້ ທ່ານ ພົນໂທ ວັນທອງ ກອງມະນີ ໄດ້ຮຽກຮ້ອງໃຫ້ປະຊາຊົນບັນດາເຜົ່າ, ຕະຫຼອດຮອດພະນັກງານ-ລັດຖະກອນ, ທະຫານ-ຕຳຫຼວດ, ຊາວຄ້າຂາຍ, ຊາວຕ່າງດ້າວ ແລະ ຊາວຕ່າງປະເທດ ທີ່ອາໄສຢູ່ແຂວງອັດຕະປື ໃນໄລຍະການດໍາເນີນການສໍາຫຼວດ ຈົ່ງໃຫ້ການສະໜັບສະໜູນ ໃຫ້ການຮ່ວມມືຢ່າງຈິງໃຈ ແລະ ປະກອບສ່ວນຢ່າງຕັ້ງໜ້າເຂົ້າໃນການສໍາຫຼວດໃນຄັ້ງນີ້. ພ້ອມນີ້ ກໍສະເໜີ ໃຫ້ບັນດາຄະນະຊີ້ນໍາ ຂັ້ນແຂວງ, ຂັ້ນເມືອງ ແລະ ອໍານາດການປົກຄອງທຸກຂັ້ນຈົ່ງເອົາໃຈໃສ່ ໃນການນໍາພາ-ຊີ້ນໍາ ໃຫ້ຄວາມສະດວກ ແລະ ປະສານສົມທົບ ຢ່າງໃກ້ສິດກັບກອງກຳລັງປ້ອງກັນຊາດ-ປ້ອງກັນຄວາມສະຫງົບ ເພື່ອໃຫ້ການຮ່ວມມື ແລະ ສ້າງເງື່ອນໄຂທີ່ເອື້ອອໍານວຍ ແລະ ປະກອບສ່ວນຢ່າງຕັ້ງໜ້າເຂົ້າໃນບັ້ນດໍາເນີນການສໍາຫຼວດພົນລະເມືອງ ແລະ ທີ່ຢູ່ອາໃສ່ ໃນຄັ້ງນີ້ ໃຫ້ປະສົບຜົນສໍາເລັດຕາມລະດັບຄາດໝາຍ ແລະ ຮັບປະກັນໃຫ້ໄດ້ຄວາມສະຫງົບ ຄວາມປອດໄພ 100%. | |
ໃນພິທີ ຍັງໄດ້ຜ່ານຂໍ້ຕົກລົງຂອງເຈົ້າແຂວງ ວ່າດ້ວຍການເປີດບັ້ນສໍາຫຼວດພົນລະເມືອງ ແລະ ທີ່ຢູ່ອາໄສ ທົ່ວປະເທດ ຄັ້ງທີ V ປີ 2025 ຂອງແຂວງອັດຕະປື, ຜ່ານບົດລາຍງານຄວາມຄືບໜ້າ ແລະ ຜົນສໍາເລັດ ການກະກຽມ ສໍາຫຼວດພົນລະເມືອງ ແລະ ທີ່ຢູ່ອາໄສ ຄັ້ງທີ V ປີ 2025 ຂັ້ນແຂວງ, ພ້ອມນັ້ນ ກໍ່ໄດ້ມີການເປີດປ້າຍ ແລະ ລັ້ນຄ້ອງ 9 ບາດ ເພື່ອເປັນການປະກາດເປີດບັ້ນສໍາຫຼວດພົນລະເມືອງ ແລະ ທີ່ຢູ່ອາໄສ ທົ່ວປະເທດຄັ້ງທີ V ປີ 2025 ຂອງແຂວງອັດຕະປື ຢ່າງເປັນທາງການ. | |
