ໃນວັນທີ 29 ກໍລະກົດ 2025 ທີ່ ໂຮງແຮມ Double Tree by Hilton, ກະຊວງການເງິນ ແລະ ອົງການຕິດຕາມເສດຖະກິດມະຫາພາກອາຊຽນ+3 (AMRO) ໄດ້ຈັດກອງປະຊຸມສໍາມະນາແລກປ່ຽນດ້ານວິຊາການໃນຫົວຂໍ້: ການແຂ່ງຂັນດ້ານການສົ່ງອອກຂອງ ສປປ ລາວ ແລະ ການນໍາໃຊ້ນະໂຍບາຍດ້ານພາສີ-ອາກອນ ສຳລັບການລົງທຶນຈາກຕ່າງປະເທດ, ໃຫ້ກຽດເປັນປະທານໂດຍ ທ່ານ ປອ ວົງຄໍາແຫງ ວົງທະຈັກ ຫົວໜ້າກົມຮ່ວມມື ແລະ ການເງິນສາກົນ ມີຕາງໜ້າຈາກກົມກ່ຽວຂ້ອງກະຊວງການເງິນ, ທະນາຄານແຫ່ງ ສປປ ລາວ, ກະຊວງອຸດສາຫະກຳ ແລະ ການຄ້າ, ກົມສົ່ງເສີມການລົງທຶນ (ເຂດເສດຖະກິດພິເສດ), ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ພ້ອມດ້ວຍ ສະພາການຄ້າ ແລະ ອຸດສາຫະກຳແຫ່ງຊາດເຂົ້້າຮ່ວມ. ໃນກອງປະຊຸມ ທ່ານ ຊຶມິໂອ ອິຊິກະວະ, ທີ່ປຶກອາວຸໂສ ກ່າວຈຸດປະສົງຂອງກອງປະຊຸມສາສໍາມະນາຄັ້ງນີ້, ເຊິ່ງເນື້ອໃນທີ່ອົງການ AMRO ນໍາມາແລກປ່ຽນນັ້ນ ແມ່ນໄດ້ມາຈາກການຕິດຕາມ ແລະ ຄົ້ນຄວ້າດ້ານວິຊາການ, ໂດຍເຫັນໄດ້ບັນດາສິ່ງທ້າທາຍ, ນະໂຍບາຍທີ່ຕິດພັນກັບການສົ່ງອອກ ແລະ ການນຳໃຊ້ນະໂຍບາຍດ້ານພາສີ-ອາກອນ ເພື່ອດຶງດູດການລົງທຶນຈາກຕ່າງປະເທດແນ່ໃສ່ການເສີມຂະຫຍາຍຄວາມສາມາດແຂ່ງຂັນດ້ານການສົ່ງອອກຂອງ ສປປ ລາວ ແລະ ສົ່ງເສີມການລົງທຶນຈາກຕ່າງປະເທດໂດຍນໍາໃຊ້ນະໂຍບາຍດ້ານພາສີ-ອາກອນ ທັງຊຸກຍູ້ການລົງທຶນໃນໂຄງການທີ່ຍືນຍົງ ແລະ ການປ່ຽນແປງດິນຟ້າອາກາດ. ໃນການຄົ້ນຄວ້າຂອງ AMRO, ໄດ້ນໍາສະເໜີຂໍ້ດີ ແລະ ຂໍ້ເສຍຂອງການຊຸກຍູ້ການລົງທຶນດ້ວຍນະໂຍບາຍພາສີ-ອາກອນ, ປະສິດທິພາບຂອງນະໂຍບາຍເຫຼົ່ານີ້ໃນໄລຍະຜ່ານມາ, ຮູບແບບການລົງທຶນຈາກຕ່າງປະເທດ,ເຄື່ອງມືດ້ານພາສີ-ອາກອນ ແລະ ອົງປະກອບຂອງການສ້າງນະໂຍບາຍທີ່ມີປະສິດທິຜົນດ້ານການສົ່ງອອກ ພ້ອມນັ້ນ, ຍັງໄດ້ນໍາສະເໜີພາບລວມການສົ່ງອອກໃນໄລຍະຜ່ານມາ(2010-2021) ເຫັນວ່າສິນຄ້າໄດ້ຖືກສົ່ງອອກເພີ່ມຂຶ້ນ, ເພີ່ມຕາຂ່າຍການຄ້າຂອງ ສປປ ລາວ, ເພີ່ມຄວາມສາມາດແຂ່ງຂັນຂອງສິນຄ້າລາວ ແລະ ການສ້າງນະໂຍບາຍຈາກການສຶກສາເຫຼົ່ານີ້. ໂອກາດນີ້ ທ່ານ ຫົວໜ້າກົມຮ່ວມມື ແລະ ການເງິນສາກົນ ໄດ້ສະແດງຄວາມຊົມເຊີຍ ຕໍ່ ຄະນະ AMRO ທີ່ໄດ້ເອົາໃຈໃສ່ໃນການປະຕິບັດພາລະບົດບາດຂອງຕົນໃນການເສີມສ້າງຄວາມເຂັ້ມແຂງດ້ານເສດຖະກິດມະຫາພາກໃຫ້ປະເທດສະມາຊິກອາຊຽນ+3 ແລະ ສະແດງຄວາມຂອບໃຈ ສຳລັບການສະໜອງການຊ່ວຍເຫຼືອດ້ານວິຊາການ ດ້ວຍລາກຫຼາຍຮູບແບບ ເຊັ່ນ ການຈັດກອງປະຊຸມສຳມະນາ, ຝຶກອົບຮົມ ແລະ ຈັດສັນຊ່ຽວຊານ ມາຊ່ວຍສ້າງຄວາມເຂັ້ມແຂງໃຫ້ແກ່ວຽກງານດ້ານການເງິນ ໃຫ້ແກ່ກະຊວງການເງິນ.
