ທ່ານ ພູວົງ ກິດຕະວົງ ຮອງລັດຖະມົນຕີ ກະຊວງການເງິນ ນໍາພາຄະນະເຂົ້າຮ່ວມກອງປະຊຸມ ຢູ່ທີ່ສຳນັກງານໃຫຍ່ ສະຫະປະຊາຊາດ (UN), ນິວຢອກ, ສ. ອາເມລິກາ

ຄະນະຜູ້ແທນ ກະຊວງການເງິນ ນຳໂດຍ ທ່ານ ພູວົງ ກິດຕະວົງ, ຮອງລັດຖະມົນຕີ ກະຊວງການເງິນ ໄດ້ເຂົ້າຮ່ວມກອງປະຊຸມ ຄັ້ງທີ 2 ຂອງຄະນະກະກຽມເນື້ອໃນ (Preparation Committee) ລະຫວ່າງວັນທີ 2-6 ທັນວາ 2024 ທີ່ຜ່ານມາ ຢູ່ສຳນັກງານໃຫຍ່ ສະຫະປະຊາຊາດ (UN), ນິວຢອກ, ສ. ອາເມລິກາ. ເພື່ອລະດົມຄວາມຄິດ, ທັດສະນະ ແລະ ການຊີ້ນຳ ຈາກບັນດາການນຳ ກະຊວງການເງິນ ຂອງປະເທດສະມາຊິກ ສຳລັບການສ້າງບົດລາຍງານ ທີ່ຈະສະເໜີໃນກອງປະຊຸມສາກົນ ຄັ້ງທີ 4 ວ່າດ້ວຍການສະໜອງທຶນສຳລັບການພັດທະນາ (4th International Conference on Financing for Development) ທີ່ຈະຈັດຂຶ້ນໃນເດືອນ ກໍລະກົດ 2025 ຢູ່ ແອສປາຍ.

ກອງປະຊຸມ ໄດ້ປຶກສາຫາລື ໃນລວງເລິກ 7 ຫົວຂໍ້ ຄື: ແຫຼ່ງທຶນພາຍໃນຂອງພາກລັດ; ການເງິນ ແລະ ທຸລະກິດຂອງພາກເອກະຊົນພາຍໃນ ແລະ ສາກົນ; ການຮ່ວມມືສາກົນ; ວິທະຍາສາດ, ເຕັກໂນໂລຊີ ແລະ ນະວັດຕະກຳ; ໜີ້ສິນ ແລະ ຄວາມຍືນຍົງ; ການຄ້າສາກົນ ທີ່ເປັນໂຕຂັບເຄື່ອນການພັດທະນາ; ບັນຫາສະສົມ ແລະ ຊຳເຮື້ອ; ໂດຍໄດ້ຍົກໃຫ້ເຫັນ ສະພາບການປັບປຸງນະໂຍບາຍການສະໜອງທຶນ ຂອງແຕ່ລະປະເທດ ແລະ ຊ່ອງທາງການແກ້ໄຂໃນຕໍ່ໜ້າ ເພື່ອຮຽກຮ້ອງໃຫ້ ກອງປະຊຸມສາກົນຄັ້ງທີ 4 ມີທິດທາງການຈັດຕັ້ງປະຕິບັດທີ່ເປັນຮູບປະທຳຫຼາຍຂຶ້ນ.

ໃນນາມ ສປປ ລາວ ເປັນປະເທດດ້ອຍພັດທະນາ, ທ່ານ ຮອງລັດຖະມົນຕີ ໄດ້ມີຄຳເຫັນ ກ່ຽວກັບ ສະພາບການປ່ຽນແປງຂອງໂລກ ທີ່ເກີດມີຫຼາຍວິກິດການດ້ານສາທາລະນະສຸກ, ເສດຖະກິດ ແລະ ສິ່ງແວດລ້ອມ, ເຊິ່ງເປັນສາເຫດໃຫ້ບັນດາປະເທດດ້ອຍພັດທະນາບໍ່ສາມາດສ້າງຄວາມເຂັ້ມແຂງ ທົນທານ ແລະ ສ້າງລາຍຮັບພາຍໃນ ໄດ້ພຽງພໍ, ຮຽກຮ້ອງໃຫ້ການສະໜອງທຶນຄັ້ງ ທີ 4 ຕ້ອງມີມາດຕະການສະໜັບສະໜູນທີ່ເຂັ້ມຂຸ້ນຂຶ້ນກວ່າເກົ່າ ແລະ ຮັບປະກັນທຶນ ທີ່ຜ່ອນຜັນສູງ ແລະ ພຽງພໍ ສຳລັບຄວາມຕ້ອງການຂອງປະເທດດ້ອຍພັດທະນາ. ໄດ້ຍົກໃຫ້ເຫັນຂໍ້ຈຳກັດຂອງ ສປປ ລາວ ໃນການເຂົ້າເຖິງແຫຼ່ງທຶນ ຕະຫຼາດສາກົນ, ຄວາມເອົາໃຈໃສ່ ການປັບປຸງການຄຸ້ມຄອງການເງິນພາກລັດ ໂດຍສຸມໃສ່ການສ້າງຄວາມເຂັ້ມແຂງການຄຸ້ມຄອງລາຍຮັບ.

ຕະຫຼອດໄລຍະຜ່ານມາ ສປປ ລາວ ໄດ້ປັບປຸງລະບົບອາກອນ, ນະໂຍບາຍ, ນິຕິກຳ ແລະ ຄວາມອາດສາມາດສະຖາບັນອາກອນໃນຂອບເຂດທົ່ວປະເທດ ຢ່າງຕໍ່ເນື່ອງ. ໃນນັ້ນ ໄດ້ພະຍາຍາມແກ້ໄຂ ແລະ ຍົກເລີກການຍົກເວັ້ນອາກອນ   ແລະ ສົ່ງເສີມການປະຕິບັດພັນທະອາກອນ ຂອງບັນດາຫົວໜວຍທຸລະກິດ. ເຖິງແມ່ນວ່າ ການເກັບລາຍຮັບອາກອນຈະເພີ່ມຂຶ້ນ ແຕ່ກໍຍັງບໍ່ພຽງພໍສຳລັບລາຍຈ່າຍໃນພາກການລົງທຶນທີ່ຈຳເປັນ ແລະ ຍັງມີສິ່ງທ້າທາຍໃນການເພີ່ມລາຍຮັບຕໍ່ອັດຕາສ່ວນທີ່ເໝາະສົມກັບຍອດລວມຜະລິດຕະພັນພາຍໃນ (GDP).

ພ້ອມນັ້ນທ່ານໄດ້ຮຽກຮ້ອງໃຫ້ປະຊາຄົມສາກົນ ສືບຕໍ່ໃຫ້ການສະໜັບສະໜູນ ແລະ ຊ່ວຍເຫຼືອ ສປປ ລາວ ເພື່ອເສີມສ້າງຄວາມສາມາດການຄຸ້ມຄອງອາກອນ ແລະ ຄົ້ນຄວ້າອາກອນອື່ນໆ ລວມທັງ ຫຼຸດຜ່ອນ ຫຼື ຢຸດຕິ ການຂໍຍົກເວັ້ນອາກອນມູນຄ່າເພີ່ມ ແລະ ພາສີອາກອນການນຳເຂົ້າວັດຖຸ ອຸປະກອນ ຮັບໃຊ້ໂຄງການ ໃນຂອບການຊ່ວຍເຫຼືອສອງຝ່າຍ ກໍຄື ການຊ່ວຍເຫຼືອລັດຖະບານຕໍ່ລັດຖະບານ ເພື່ອຊ່ວຍສ້າງລາຍຮັບພາຍໃນເພີ່ມຂຶ້ນ ແລະ ສ້າງຄວາມຍືນຍົງໃຫ້ງົບປະມານແຫ່ງລັດ.