ໃນລະຫວ່າງວັນທີ 28-30 ພຶດສະພາ 2025 ກົມພາສີ ຮ່ວມກັບອົງການໄຈກາ ປະຈຳ ສປປ ລາວ ໄດ້ເປີດຊຸດຝຶກອົບຮົມ “ການຄຸ້ມຄອງຝຶກອົບຮົມ ແລະ ພັດທະນາບຸກຄະລາກອນ” ໃຫ້ແກ່ເຈົ້າໜ້າທີ່ພາສີ ຈາກ ພະແນກອ້ອມຂ້າງ ແລະ ເຈົ້າໜ້າທີ່ພາສີປະຈຳແຂວງ ໃນຂອບເຂດທົ່ວປະເທດ ໂດຍການເຂົ້າຮ່ວມເປັນປະທານ ຂອງ ທ່ານ ພຸດທະນີກອນ ເຄນນະວົງ ຮອງຫົວໜ້າກົມພາສີ ກະຊວງການເງິນ ສປປ ລາວ, ມີທ່ານ ຢາມະໂມໂຕ ອາກິສຶກຸ, ຊ່ຽວຊານປະຈຳສູນ AEO ພາສີຍີ່ປຸ່ນ, ທ່ານ ຟຸກຸໂຊໂນ ອາກິຮິໂກະ, ຮອງຫົວໜ້າພະແນກ, ກົມພາສີຍີ່ປຸ່ນ; ທ່ານ ໂນໂບຣຸ ຄູຣີຕະ, ພ້ອມດ້ວຍພະນັກງານພາສີປະຈຳແຂວງ ໃນຂອບເຂດທົ່ວປະເທດ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ. ໃນກອງປະຊຸມທ່ານ ພຸດທະນີກອນ ເຄນນະວົງ ໃຫ້ຮູ້ວ່າ: ຂະແໜງການພາສີ ແມ່ນຂະແໜງການໜຶ່ງ ທີ່ມີບົດບາດສຳຄັນໃນການປະກອບສ່ວນໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ, ໂດຍສະເພາະ ແມ່ນການຈັດເກັບລາຍຮັບເຂົ້າງົບປະມານ ທີ່ຂັ້ນເທິງໄດ້ມອບໝາຍ ໃຫ້; ປະຈຸບັນ ວຽກງານໃນຂົງເຂດພາສີ ພວມໄດ້ຮັບການປັບປຸງ ແລະ ພັດທະນາຢ່າງຕໍ່ເນື່ອງ ເພື່ອຕອບສະໜອງຕາມຄວາມຮຽກຮ້ອງຕ້ອງການຂອງວຽກງານໃນໄລຍະໃໝ່ ແລະ ການເຊື່ອມໂຍງກັບສາກົນ ຕາມນະໂຍບາຍ ຂອງພັກ-ລັດຖະບານ ວາງອອກ. ການຈັດຝຶກອົບຮົມຂຶ້ນໃນຄັ້ງນີ້ ຈຸດປະສົງເພື່ອຍົກລະດັບຄວາມຮູ້ ແລະ ຄວາມສາມາດຂອງພະນັກງານທາງດ້ານການຄຸ້ມຄອງການຈັດຝຶກອົບຮົມໃນລະບົບພາຍໃນ ບໍ່ວ່າຈະເປັນການວາງແຜນການຝຶກອົບຮົມ, ການຈັດຕັ້ງປະຕິບັດ, ການຕິດຕາມ ແລະ ການປະເມີນການຝຶກອົບຮົມໃຫ້ມີປະສິດທິຜົນ. ພ້ອມນັ້ນ, ທ່ານຍັງໄດ້ເນັ້ນໃຫ້ຜູ້ເຂົ້າຮ່ວມ ຄົ້ນຄວ້າ ສົນທະນາແລກປ່ຽນບົດຮຽນເຊິ່ງກັນ ແລະ ກັນ ຕາມການປະຕິບັດຕົວຈິງໃນຂົງເຂດວຽກງານຂອງແຕ່ລະທ່ານ ເພື່ອໄດ້ຮັບບົດຮຽນ ແລະ ຜົນປະໂຫຍດສູງສຸດ.
