ໃນວັນທີ 16 ພຶດສະພາ 2025, ໄດ້ມີພິທີ ປິດຊຸດຮຽນ ທິດສະດີການເມືອງ ຂັ້ນຕົ້ນ ໄລຍະ 03 ເດືອນ ຊຸດທີ III ປີ 2025 ໃຫ້ແກ່ພະນັກງານນຳພາ-ຄຸ້ມຄອງ ຂອງກະຊວງການເງິນ ໂດຍການເປັນປະທານ ຂອງທ່ານ ພູວົງ ກິດຕະວົງ ຮອງລັດຖະມົນຕີກະຊວງການເງິນ, ທ່ານ ພູວົງ ອຸ່ນຄຳແສນ ຫົວໜ້າສະຖາບັນການເມືອງ ແລະ ການປົກຄອງແຫ່ງຊາດ ມີຄະນະກົມກ່ຽວຂ້ອງ ພ້ອມດ້ວຍນັກສຳມະນາກອນ ເຂົ້າຮ່ວມ. ໂອກາດດັ່ງກ່າວ ທ່ານ ພູວົງ ກິດຕະວົງ ໄດ້ກ່າວຕໍ່ຊຸດປິດທິດສະດີຄັ້ງນີ້ສຸດທີ່ມີຄວາມໝາຍ, ຄວາມສຳຄັນຍິ່ງ ເພາະເປັນການສ້າງພະນັກງານນຳພາ-ຄຸ້ມຄອງ ສືບທອດ-ປ່ຽນແທນ ໃນອະນາຄົດ, ຮັບປະກັນ ໂຄງປະກອບບຸກຄະລາກອນ ໃຫ້ມີ 3 ລຸ້ນ: ລຸ້ນອາວຸໂສ, ລຸ້ນກາງ, ລຸ້ນໜຸ່ມ, ນອກນີ້ ກໍຕ້ອງເອົາໃຈໃສ່ ບັນຫາເພດ, ເຜົ່າ ແລະ ແມ່ຍິງ ເພື່ອສືບທອດປ່ຽນແທນ; ການຍົກລະດັບຄວາມຮູ້ ທາງດ້ານທິດສະດີການເມືອງ, ແນວທາງ, ແຜນນະໂຍບາຍຂອງພັກ, ເຊີດຊູທັດສະນະຊົນຊັ້ນ ຢ່າງຈະແຈ້ງ ໂດຍສະເພາະ ບັນດາສະຫາຍໃນຖານະ ທີ່ເປັນພະນັກງານການນຳລຸ້ນໜຸ່ມແໜ້ນ, ພະນັກງານຫຼັກແຫຼ່ງຂອງກະຊວງການເງິນ ທີ່ຈະສືບທອດພາລະກິດຂອງພັກ, ຂອງຊາດ. ສະນັ້ນ, ຍາມໃດທິດສະດີ, ແນວທາງແລະແຜນນະໂຍບາຍຂອງພັກ ກໍຕ້ອງຕິດພັນກັບການຈັດຕັ້ງປະຕິບັດ ແລະ ສະແດງອອກ ໃນພຶດຕິກຳຕົວຈິງ. ປັດຈຸບັນການຄຸ້ມຄອງເສດຖະກິດ-ສັງຄົມ ດ້ວຍກົດໝາຍ, ການປັບປຸງກົນໄກ, ລະບອບ ລະບຽບການ ໃນການຄຸ້ມຄອງເສດຖະກິດ ຍັງບໍ່ທັນຫັນປ່ຽນຢ່າງຕັ້ງໜ້າ, ຊ່ອງວ່າງບໍ່ທັນໄດ້ຮັບການແກ້ໄຂ, ສະພາບລະເມີດກົດໝາຍ ແລະ ລະບຽບການ ຂອງພະນັກງານລັດຈໍານວນໜຶ່ງຍັງມີເກີດຂຶ້ນ, ການເລືອກວຽກເຮັດ, ວຽກທີ່ຕ້ອງໄດ້ຄົ້ນຄິດ, ວຽກທີ່ບໍ່ຕິດພັນກັບຜົນປະໂຫຍດແມ່ນບໍ່ຢາກເອົາໃຈໃສ່ ຢ່າງເຕັມເມັດເຕັມໜ່ວຍ. ສະນັ້ນ, ໃນຖານະທີ່ບັນດາສະຫາຍ ເປັນພະນັກງານນຳພາ-ຄຸ້ມຄອງ, ເປັນກ້ອນກຳລັງອັນສຳຄັນຂອງກະຊວງການເງິນ ຕ້ອງພະຍາຍາມເຮັດແນວໃດ ໃຫ້ມີບາດລ້ຽວອັນໃໝ່, ປັບທັດສະນະ, ແນວຄິດຄວາມຕື່ນຕົວ ໃຫ້ຖືກຕ້ອງ, ພ້ອມກັນປັບປຸງການຈັດຕັ້ງຂອງຂະແໜງການເງິນ ພວກເຮົາ ໃຫ້ໜັກ ແໜ້ນ, ເຂັ້ມແຂງ ແລະ ປອດໃສ. 
.jpg)
