ຝຶກອົບຮົມວຽກງານບັນຊີວິສາຫະກິດ ຊຸດທີ 2 ໃຫ້ພະນັກງານ-ລັດຖະກອນ ຂະແໜງການເງິນ 8 ແຂວງພາກເໜືອ

       ​ໃນວັນທີ 5 ພຶດສະພາ 2025 ສະຖາບັນການເງິນ-ການບັນຊີ ຮ່ວມກັບ ກົມຈັດຕັ້ງ ແລະ ພະນັກງານ, ກົມຄຸ້ມຄອງການບັນຊີ ໄດ້ເປີດຝຶກອົບຮົມ ວຽກງານບັນຊີວິສາຫະກິດ ຊຸດທີ II ປະຈໍາປີ 2025 ຂຶ້ນທີ່ ວິທະຍາໄລການເງິນພາກເໜືອ(ແຂວງ ຫຼວງພະບາງ) ເຊິ່ງມີ ພະນັກງານ-ລັດຖະກອນ ຂະແໜງ ການເງິນ 8 ແຂວງພາກເໜືອ ຄື: ແຂວງ ຫຼວງພະບາງ, ແຂວງ ຫົວພັນ, ແຂວງ ໄຊຍະບູລີ, ແຂວງ ຊຽງຂວາງ, ແຂວງ ຜົ້ງສາລີ, ແຂວງ ຫຼວງນໍ້າທາ, ແຂວງ ອຸດົມໄຊ ແລະ ແຂວງ ບໍ່ແກ້ວ ມີພະນັກງານເຂົ້າຮ່ວມທັງໝົດ 50 ທ່ານ. ພາຍໃຕ້ການເປັນປະທານ ຂອງທ່ານ ຟອງສີສຸພັນ ພົມມະວົງ ຫົວໜ້າສະຖາບັນການເງິນ-ການບັນຊີ. 

        ໂອກາດດັ່ງກ່າວ, ທ່ານ ຟອງສີສຸພັນ ພົມມະວົງ ຫົວໜ້າສະຖາບັນການເງິນ-ການບັນຊີ ໄດ້ມີຄໍາເຫັນເນັ້ນໃຫ້ນັກສໍາມະນາກອນ ແລກປ່ຽນ ຍາດແຍ່ງເອົາບົດຮຽນ ແລະ ປະສົບການຕົວຈິງ ນໍາວິທະຍາກອນ ແລະ ນໍາຜູ້ເຂົ້າຮ່ວມຝຶກອົບດ້ວຍກັນ ໃຫ້ຫຼາຍທີ່ສຸດ; ປະຕິບັດລະບຽບ ແລະ ສອບເສັງທົດສອບ ໃຫ້ຜ່ານເກນຕາມມາດຕະຖານທີ່ກໍານົດໄວ້ໃນຫຼັກສູດຝຶກອົບຮົມ; ທັງໃຫ້ວິທະຍາກອນເນັ້ນພຶດຕິກໍາຕົວຈິງ ເປັນກໍລະນີສຶກສາ ທີ່ເກີດຂຶ້ນໃນຕົວຈິງ ໂດຍເອົາຜູ້ຮຽນເປັນໃຈກາງ, ສົມທົບກັບຄະນະຮັບຜິດຊອບ ເພື່ອຈັດຕັ້ງການສອບເສັງທົດສອບຜູ້ຄວາມຮັບຮູ້ຂອງຜູ້ຮຽນ ເພື່ອພິຈາລະນາອອກໃບຢັ້ງຢືນ; ຕ້ອງເອົາໃຈໃສ່ຕິດຕາມ ປະເມີນຜົນຊຸດຝຶກອົບຮົມ ໃຫ້ໄດ້ຮັບຜົນສໍາເລັດຕາມລະດັບຄາດໝາຍທີ່ວາງໄວ້.