ການຈັດຕັ້ງປະຕິບັດວຽກງານຂະແໜງ ຄຸ້ມຄອງຊັບສິນແຫ່ງລັດຢູ່ແຂວງຫຼວງນໍ້າທາ

        ການຈັດຕັ້ງປະຕິບັດວຽກງານຂະແໜງຄຸ້ມຄອງຊັບສິນແຫ່ງລັດຢູ່ແຂວງຫຼວງນໍ້າທາປີ 2024 ຜ່ານມາມີທັງຂໍ້ສະດວກ, ຂໍ້ຫຍຸ້ງຍາກ ແລະ ບົດຮຽນທີ່ຖອດຖອນໄດ້, ໂດຍສະເພາະການຈັດຕັ້ງປະຕິບັດລາຍຮັບໝົດປີສາມາດປະຕິບັດໄດ້ທັງໝົດ 47.60 ຕື້ກີບ ຫຼື ເທົ່າກັບ 198.41% ຂອງແຜນການປີ, ເປັນເງິນເກີນແຜນ 23.61 ຕື້ກີບ.

        ທ່ານ ນ້ອຍ ລໍຫວັນເງີ ຫົວໜ້າຂະແໜງຄຸ້ມຄອງຊັບສິນແຫ່ງລັດ ໃຫ້ສໍາພາດກັບຂ່າວການເງິນວ່າງບໍ່ດົນນີ້ວ່າ: ການຈັດຕັ້ງປະຕິບັດວຽກງານຂະແໜງຄຸ້ມຄອງຊັບສິນແຫ່ງລັດ ປະຈໍາປີ 2024 ແລະ ທິດທາງແຜນການ ປະຈໍາປີ 2025 ຂອງຂະແໜງຄຸ້ມຄອງຊັບສິນແຫ່ງລັດຢູ່ແຂວງຫຼວງນໍ້າທາ, ປັດຈຸບັນຂະແໜງຄຸ້ມຄອງຊັບສິນແຫ່ງລັດ, ມີ  ພະນັກງານ-ລັດຖະກອນທັງໜົດ 35 ທ່ານ, ຍິງ 10 ທ່ານ.ໃນນີ້, ປະຈໍາຢູ່ຂັ້ນແຂວງ 11 ທ່ານ, ຍິງ 05 ທ່ານ, ຂັ້ນເມືອງ 24 ທ່ານ, ຍິງ 05 ທ່ານ; ມີຖານລາຍຮັບຈາກຄ່າເຊົ່າທີ່​ດິນ​ລັດທັງ​ໜົດ 246 ພື້ນຖານ, ຂັ້ນ​ແຂວງ​ຄຸ້ມ​ຄອງ 19 ພື້ນຖານ, ​ເມືອງ​ຄຸ້ມ​ຄອງ 227 ພື້ນຖານ; ຖານ​ລາຍ​ຮັບ​ຈາກຄ່າສໍາປະທານທີ່ດິນລັດທັງໝົດ 57 ພື້ນຖານ, ແຂວງ​ຄຸ້ມ​ຄອງ 38 ພື້ນຖານ, ເມືອງ​ຄຸ້ມ​ຄອງ 19 ພື້ນຖານ.

        ສໍາລັບການຈັດຕັງປະຕິບັດລາຍຮັບຄຸ້ມຄອງຊັບສິນຂອງລັດຕາມແຜນການປີ 2024 ທັງໝົດ 23.99 ຕື້ກີບ,ແຕ່ຜ່ານການຈັດຕັ້ງປະຕິບັດຕົວຈິງສາມາດປະຕິບັດໄດ້ທັງໝົດ 47.60 ຕື້ກີບເທົ່າກັບ 198.41% ຂອງແຜນການປີ, ເປັນເງິນເກີນແຜນ 23.61 ຕື້ກີບ. ນອກນີ້, ຍັງວຽກທີ່ພົ້ນເດັ່ນເປັນຕົ້ນ: ສໍາເລັດການເຜີຍແຜ່ດໍາລັດ ສະບັບເລກທີ 599/ລບ, ຂໍ້ຕົກລົງວ່າດ້ວຍການສະສາງລົດຂອງລັດ ເລກທີ 169/ນຍ ແລະ ນິຕິກໍາທີ່ກ່ຽວຂ້ອງຢູ່ຂັ້ນແຂວງ ແລະ ບັນດາເມືອງ,ສໍາເລັດການ​ຕິດ​ແຜ່ນ​ກາ​ໝາຍ​ນຳ​ໃຊ້ QR code, ສະສາງລົດຂອງພະນັກງານບໍານານ, ມອບເຂົ້າເປັນລາຍຮັບຊັບສິນຂອງລັດ, ການຈົດທະບຽນເອກະສານສົ່ງອອກ-ນໍາເຂົ້າສິນຄ້າເຄື່ອງຂອງຢູ່ສາງຄ່ຽນຖ່າຍສິນຄ້າ LS ແລະ ສາງຄ່ຽນຖ່າຍສິນຄ້າ LICD ແລະ ອື່ນໆ.

       ທັງນີ້, ກໍ່ຍ້ອນຄະນະນໍາພະແນກການເງິນແຂວງໃຫ້ການຊີ້ນໍາຢ່າງໃກ້ຊິດຕິດແທດ, ມີບັນດາກົດໝາຍ​ ແລະ ນິຕິກໍາຕ່າງໆທີ່ກ່ຽວຂ້ອງເປັນບ່ອນອີງໃນການຈັດຕັ້ງປະຕິບັດວຽກງານວິຊາສະເພາະໄປຄຽງຄູ່ກັບການເອົາໃຈໃສ່ໃນການຈັດເກັບລາຍຮັບນັບແຕ່ຂັ້ນແຂວງຮອດຂັ້ນເມືອງ ແລະ ມີແບບ​ແຜນ​ວິທີ​ເຮັດ​ວຽກ, ມີ​ການ​ຕິດຕາມ, ກວດກາ, ສະຫຼຸບ​​ລາຍ​ງານ, ຖອດຖອນບົດຮຽນ​ຢ່າງ​ເປັນ​ປົກກະຕິ.