_1744093880.jpeg)
ການຈັດຕັ້ງປະຕິບັດແຜນງົບປະມານແຫ່ງລັດ ປະຈຳປີ 2024 ດ້ານລາຍຮັບ-ລາຍຈ່າຍຂອງພະແນກການເງິນແຂວງໄຊຍະບູລີ, ສາມາດຕີລາຄາໄດ້ມີຫຼາຍວຽກທີ່ພົ້ນເດັ່ນທັງພູດສູນກາງ ແລະ ພູດທ້ອງຖິ່ນບັນລຸຕາມແຜນການ, ການຈັດເກັບລາຍຮັບໄດ້ລື່ນແຜນການ, ການຄຸ້ມຄອງລາຍຈ່າຍງົບປະມານໄປຕາມແຜນທີ່ສະພາແຫ່ງຊາດຮັບຮອງ.
ທ່ານ ປະຖົມ ບຸນຍາວົງ ຮອງຫົວໜ້າພະແນກການເງິນແຂວງໄຊຍະບູລີ ໄດ້ໃຫ້ສໍາພາດວ່າ: ການຈັດຕັ້ງປະຕິບັດແຜນງົບປະມານແຫ່ງລັດ, ໄດ້ສຸມໃສ່ການຈັດຕັ້ງປະຕິບັດວຽກງານການເງິນທີ່ຕິດພັນກັບການຈັດຕັ້ງຜັນຂະ ຫຍາຍວາລະແຫ່ງຊາດໃນການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນຂອງລັດຖະບານ, ແຜນຈັດຕັ້ງປະຕິບັດວາລະແຫ່ຊາດ, ບັນຫາເຄັ່ງຮ້ອນຂອງແຂວງ, ຜັນຂະຫາຍມະຕິວ່າດ້ວຍການສ້າງເສດຖະກິດເອກະລາດເປັນເຈົ້າຕົນເອງ ແລະ ໃນປີ 2024 ນີ້ເປັນປີທີສອງທີ່ກະຊວງການເງິນໄດ້ມອບໂຕເລກລາຍຮັບມາໃຫ້ແຂວງຈັດເກັບລາຍຮັບ, ເພື່ອສ້າງໃຫ້ແຂວງເປັນແຂວງກຸ້ມຕົນເອງທາງດ້ານການເງິນງົບປະມານ. ນອກນັ້ນ, ຍັງໄດ້ຍົກສູງຄວາມເອົາ ໃຈໃສ່ໃນການນໍາພາ-ຊີ້ນໍາສຸມໃສ່ການຊອກຄົ້ນທ່າແຮງ ແລະ ຂຸດຄົ້ນທຸກແຫຼ່ງລາຍຮັບທີ່ບົ່ມຊ້ອນພາຍໃນ, ສ້າງຖານລາຍຮັບເພີ່ມຂຶ້ນຕິດພັນກັບການປະຕິບັດວາລະແຫ່ງຊາດໃຫ້ບັນລຸຕາມແຜນທີ່ວາງໄວ້.
ປັດຈຸບັນທົ່ວແຂວງມີພະນັກງານ-ລັດຖະກອນຂະແໜງການເງິນທັງ ໝົດຈໍານວນ 318 ຄົນ, ຍິງ 118 ຄົນ, ຢູ່ ຂັ້ນແຂວງ 125 ຄົນ, ຍິງ 53 ຄົນ, ຢູ່ຂັ້ນເມືອງ 193 ຄົນ ຍິງ 65 ຄົນ,ມີກົງຈັກການຈັດຕັ້ງຂຶ້ນກັບ 4 ຂະແໜງການ,3 ຂະແໜງການສາຍຕັ້ງ ແລະ ຫ້ອງການ-ການເງິນເມືອງ 11 ເມືອງ, ດ້ານລາຍຮັບໃນປີ 2024 ແຂວງໄຊຍະບູລີ, ໄດ້ຮັບຕົວເລກແຜນເບື້ອງຕົ້ນ 2,092.29 ຕື້ກີບ,ແຜນດັດແກ້ເພີ່ມ 2,89 ຕື້ກີບ, ລວມແຜນດັດແກ້ທັງໝົດ 2,095.18 ຕື້ກີບ, ແຕ່ຜ່ານການຈັດຕັ້ງປະຕິບັດໝົດປີສາມາດຈັດເກັບລາຍຮັບໄດ້ 2,420.11 ຕື້ກີບເທົ່າກັບ 115,67% ຂອງແຜນການເບື້ອງຕົ້ນ ຫຼື ເທົ່າກັບ 115,51% ຂອງແຜນດັດແກ້ (ລື່ນແຜນ 15,51%, ເປັນເງິນ 324ຕື້ກວ່າກີບ).
_1744093948.jpeg)
ນອກນີ້,ໃນການຈັດຕັ້ງປະຕິວຽກງານໄລຍະ 1 ປີຜ່ານມາມີຫຼາຍວຽກທີ່ສາມາດຈັດຕັ້ງປະຕິບັດໄດ້ຢ່າງມີຜົນ ສຳເລັດ ແລະ ພົ້ນເດັ່ນເປັນຕົ້ນ: ດ້ານການເມືອງ-ແນວຄິດ, ວຽກການຈັດຕັ້ງ-ພະນັກງານ, ລາຍຮັບພູດສູນກາງ, ລາຍຮັບພາຍໃນແຂວງ, ລາຍຮັບທີ່ສູນກາງມອບໃຫ້ແຂວງ 15 ຫົວໝ່ວຍ, ດ້ານລາຍຈ່າຍ ດຸ່ນດ່ຽງງົບປະມານເກີນດຸນ, ວຽກງານການຫັນເປັນທັນສະໄໝ,ການຈັດຕັ້ງປະຕິບັດວຽກງານຕິດພັນກັບວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຫຍາກທາງດ້ານເສດຖະກິດການເງິນຂອງພະແນກການເງິນແຂວງ, ສະແດງໃຫ້ເຫັນເຖິງຄວາມເອົາໃຈໃສ່ຊີ້ນຳໆພາບັນ ດາຂະແໜງການຂຶ້ນກັບຕາມພາລະບົດບາດ, ສິດໜ້າທີ່ເຮັດໃຫ້ການຈັດເກັບລາຍຮັບງົບປະມານພູດສູນກາງ ແລະພູດທ້ອງຖິ່ນໃຫ້ບັນລຸຕາມແຜນການ, ລື່ນແຜນການ, ຄຸ້ມຄອງລາຍຈ່າຍງົບປະມານໄປຕາມແຜນທີ່ສະພາແຫ່ງຊາດຮັບຮອງຈໍາກັດລາຍຈ່າຍນອກແຜນ.
ທ່ານ ປະຖົມ ບຸນຍາວົງ ກ່າວຕື່ມອີກວ່າ: ຄາດໝາຍສູ້ຊົນ, ທິດທາງແຜນການ, ມາດຕະການປີ 2025 ແຂວງໄຊຍະບູລີ, ໄດ້ຮັບຕົວເລກແຜນການຈັດເກັບລາຍຮັບທັງໝົດຈໍານວນ 2,755.30 ຕື້ກີບ, ທຽບໃສ່ແຜນການປີຜ່ານມາເທົ່າກັບ 131,51%; ເພີ່ມຂຶ້ນ 31,51% ເປັນເງິນ 660 ຕື້ກວ່າກີບ. ໃນນີ້, ລາຍຮັບພຸດສູນກາງ 1,355.20 ຕື້ກີບ, ລາຍຮັບຂອງແຂວງ 1,400.10 ຕື້ກີບ; ສ່ວນແຜນລາຍຈ່າຍ 754 ຕື້ກວ່າກີບ. ໃນນີ້, ມີເງິນບໍລິຫານດ່ານສາກົນ 4 ດ່ານຈໍາວນ 1,50 ຕື້ກີບ. ພ້ອມທັງໄດ້ວາງແຜນວຽກຈຸກສຸມ ແລະ ບາງມາດຕະການຈັດຕັ້ງປະຕິບັດເພື່ອເຮັດການຈັດເກັບລາຍຮັບເຂົ້າງົບປະມານບັນລຸຕາມແຜນການ; ພາຍໃຕ້ຄໍາຂວັນຂອງກະຊວງການເງິນວາງອອກ “ລາຍຮັບພາຍໃນກຸ້ມລາຍຈ່າຍພາຍໃນມີສ່ວນສະສົມໄວ້ ແລະ ບຸກທະລຸການຄຸ້ມຄອງງົບປະມານແຫ່ງລັດ ເປັນທັນສະໄໝລວມສູນ”.
