ໂດຍປະຕິບັດຕາມການເຊື້ອເຊີນຈາກກະຊວງການເງິນ ຟີລີປິນ ໃນລະຫວ່າງວັນທີ 25-28 ມີນາ 2025 ຄະນະຜູ້ແທນທີ່ຖືກແຕ່ງຕັ້ງຈາກກະຊວງການເງິນ ສປປ ລາວ ຈຳນວນ 5 ທ່ານ ຈາກກົມສ່ວຍສາອາກອນ ນຳໂດຍ ທ່ານ ສາຍມະໂນລິນ ສິນບັນດິດ, ຮອງຫົວໜ້າກົມສ່ວຍສາອາກອນ ໄດ້ເດີນທາງເຂົ້າຮ່ວມ ກອງປະຊຸມເຈລະຈາ ສົນທິສັນຍາ ເພື່ອຫຼີກເວັ້ນການເກັບອາກອນຊ້ຳຊ້ອນ ແລະ ສະກັດກັ້ນການຫຼົບຫຼີກການເສຍອາກອນລາຍໄດ້ (DTA) ຮອບທີ 2 ຈັດຂຶ້ນທີ່ ເຂດເສດຖະກິດພີເສດ ຄຣາກ, ປາມປານກາ ປະເທດຟີລີປິນ ຈຸດປະສົງຂອງກອງປະຊຸມໃນຄັ້ງນີ້ ແມ່ນ ເຈລະຈາສົນທິສັນຍາເພື່ອຫຼີກເວັ້ນການເກັບອາກອນຊ້ຳຊ້ອນ ແລະ ສະກັດກັ້ນການຫຼົບຫຼີກເສຍອາກອນຈາກການເກັບອາກອນລາຍໄດ້ ພ້ອມທັງເປັນ ການສົ່ງເສີມການຮ່ວມມືທາງດ້ານການຄ້າ ແລະ ການລົງທຶນລະຫວ່າງ 02 ປະເທດຄູ່ສັນຍາ, ຮັບປະກັນ ຄວາມສອດຄ່ອງຕາມກົດໝາຍ ແລະ ຄວາມຍຸຕິທຳແກ່ຜູ້ເສຍອາກອນໃນການປະຕິບັດພັນທະ ເພື່ອຫຼີກເວັ້ນການເກັບອາກອນຊ້ຳຊ້ອນ. ປະຈຸບັນ ສປປ ລາວ ໄດ້ມີສົນທິສັນຍາອາກອນຊ້ຳຊ້ອນ ກັບ 09 ປະເທດໃນອາຊຽນ ແລະ ປະເທດຟີລີປິນເປັນປະເທດສຸດທ້າຍໃນກຸ່ມປະເທດອາຊຽນ. ການເຈລະຈາສົນທິສັນຍາອາກອນຊ້ຳຊ້ອນໃນຮອບທີ 1 ແມ່ນໄດ້ສຳເລັດໃນທ້າຍເດືອນທັນວາ 2024 ທີ່ ແຂວງຫຼວງພະບາງ, ສປປ ລາວ. ການເຈລະຈາສົນທິສັນຍາອາກອນຊ້ຳຊ້ອນ ໃນຮອບທີ 2 ຄັ້ງນີ້ ແມ່ນໄດ້ດຳເນີນໄປເປັນເວລາ 03 ວັນ ດ້ວຍບັນຍາກາດອັນຟົດຟື້ນ, ແຫ່ງຄວາມສາມັກຄີ, ການໃຫ້ການຮ່ວມມື ແລະ ມີລັກສະນະສ້າງສັນ ພາຍໃຕ້ຄວາມເຂົ້າໃຈ ຊື່ງກັນ ແລະ ກັນ ພ້ອມກັນແລກປ່ຽນຂໍ້ມູນ ແລະ ຄວາມຄິດເຫັນຢ່າງກົງໄປກົງມາ. ຜ່ານການເຈລະຈາໃນຄັ້ງນີ້ ເຫັນວ່າ ມີຄວາມຄືບໜ້າ ແລະ ເອກະພາບ ດ້ານເນື້ອໃນ ໂດຍສ່ວນໃຫຍ່ ແລະ ຍັງມີບາງຈຸດທີ່ຈະຕ້ອງໄດ້ມີການທົບທວນ, ຄົ້ນຄວ້າ ພິຈາລະນາ ຄືນຕື່ມ ເພື່ອນຳສະເໜີໃນການເຈລະຈາໃນຮອບຕໍ່ໄປ. ພາຍຫຼັງສຳເລັດການເຈລະຈາ, ຫົວໜ້າຄະນະຜູ້ແທນ ຈາກກົມສ່ວຍສາອາກອນ, ກະຊວງການເງິນ ສປປ ລາວ ກໍໄດ້ ສະແດງຄວາມ ຂອບໃຈມາຍັງ ຄະນະຜູ້ແທນຈາກປະເທດຟີລິປິນ ທີ່ໄດ້ໃຫ້ການຕ້ອນຮັບຢ່າງອົບອຸ່ນ ແລະ ເປັນກັນເອງ, ພ້ອມທັງສະແດງຄວາມເຊື່ອໝັ້ນວ່າ ຜົນສຳເລັດການເຈລະຈາສົນທິສັນຍາລະຫວ່າງ 02 ປະເທດ ຈະເປັນຂີດໝາຍອັນສຳຄັນ ໃນການເສີມຂະຫຍາຍການຮ່ວມມື ເຊິ່ງກັນ ແລະ ກັນ ໃນອະນາຄົດ ໂດຍສະເພາະແມ່ນ ຂົງເຂດສ່ວຍສາອາກອນ ໃຫ້ນັບມື້ນັບຫຼາຍຂຶ້ນ. 
