ກອງປະຊຸມ ສະຫຼຸບທົບທວນ ການລົງຕິດຕາມການຈັດຕັ້ງປະຕິບັດ ໂຄງການຄວບຄຸມຄວາມສ່ຽງໄພພິບັດທາງທຳມະຊາດໃນຂົງເຂດອາຊີຕາເວັນອອກສ່ຽງໃຕ້ ປະຈໍາ 6 ດືອນທ້າຍປີ 2025 ຮ່ວມກັບທະນາຄານໂລກ ໃນວັນທີ 17 ພະຈິກ 2025 ທີ່ນະຄອນຫຼວງວຽງຈັນ ໂດຍການເປັນປະທານຮ່ວມຂອງທ່ານ ນາງ ພອນວັນ ອຸທະວົງ ຮອງລັດຖະມົນຕີ ກະຊວງການເງິນ ທັງເປັນປະທານຄະນະຊີ້ນໍາໂຄງການ ເເລະ ທ່ານ ນາງ ວຽງສະໄໝ ສຣິດທິຣາດ ຮັກສາການ ຫົວໜ້າຫ້ອງການທະນາຄານໂລກ ປະຈໍາ ສປປ ລາວ, ມີຜູ້ຊ່ຽວຊານ ຈາກກະຊວງການເງິນ, ກະຊວງໂຍທາທິການ ແລະ ຂົນສົ່ງ, ກະຊວງກະສິກຳ ແລະ ສິ່ງແວດລ້ອມ ແລະ ທະນາຄານໂລກ ເຂົ້າຮ່ວມ.
ໃນກອງປະຊຸມ, ທ່ານ ນາງ ພອນວັນ ອຸທະວົງ ໄດ້ກ່າວວ່າ: “ກອງປະຊຸມຄັ້ງນີ້ ມີຄວາມສຳຄັນຫລາຍ ໃນການສະຫຼຸບລາຍງານການຈັດຕັ້ງປະຕິບັດບັນດາກິດຈະກຳ ແລະ ຕົວຊີ້ວັດຕ່າງໆ ຂອງໂຄງການທີ່ໄດ້ຈັດຕັ້ງປະຕິບັດໃນໄລຍະຜ່ານ ທັງນີ້ກໍເພື່ອສະແດງໃຫ້ເຫັນຜົນສໍາເລັດ ແລະ ສິ່ງທ້າທາຍໃນການຈັດຕັ້ງປະຕິບັດຜ່ານມາ ເພືຶ່ອສາມາດຖອດຖອນບົດຮຽນ ເເລະ ເເລກປ່ຽນບົດຮຽນຮ່ວມກັນ ເພື່ອໃຫ້ການຈັດຕັ້ງປະຕິບັດໂຄງການໃນໄລຍະ II ມີປະສິດຕິພາບ ເເລະ ມີຜົນສຳເລັດຍິ່ງຂຶ້ນ” ເຊິ່ງໂຄງການຄວບຄຸມຄວາມສ່ຽງໄພພິບັດທໍາມະຊາດໃນຂົງເຂດອາຊີຕາເວັນອອກສ່ຽງໃຕ້ ຈະສິ້ນສຸດລົງໃນທ້າຍເດືອນທັນວາ 2025 ນີ້.
ໂຄງການຄວບຄຸມຄວາມສ່ຽງຈາກໄພພິບັດທາງທຳມະຊາດໃນຂົງເຂດອາຊີຕາເວັນອອກສ່ຽງໃຕ້ ເປັນໂຄງການຊ່ວຍເຫລືອທາງການເພື່ອການພັດທະນາ ຈາກທະນາຄານໂລກ ມີມູນຄ່າລວມທັງໝົດຈໍານວນ 56 ລ້ານໂດລາສະຫະລັດ. ໃນນັ້ນ, ເປັນເງິນກູ້ຢືມ ຈໍານວນ 55 ລ້ານໂດລາສະຫະລັດ, ທຶນຊ່ວຍເຫລືອລ້າຈໍານວນ 1 ລ້ານໂດລາສະຫະລັດ, ມີໄລຍະຈັດຕັ້ງປະຕິບັດ 8 ປີ ແຕ່ປີ 2017-2025. 
ຜ່ານການລົງຕິດຕາມຂອງທະນາຄານໂລກ ໃນລະຫວ່າງ ວັນທີ 27 ຕຸລາ ຫາ 17 ພະຈິກ 2025 ເຫັນໄດ້ວ່າມີຜົນສຳເລັດ ເເລະ ສິ່ງທ້າທາຍຫລາຍຢ່າງ ໃນການຈັດຕັ້ງປະຕິບັດບັ້ນສຸດທ້າຍຂອງໂຄງການ. ປັດຈຸບັນ ການເບີກຈ່າຍງົບປະມານທັງໝົດຂອງໂຄງການໄດ້ສໍາເລັດ 93% ປະກອບມີ ບ້ວງເງິນກູ້ຢືມ ເບີກຈ່າຍທັງໝົດ 92.93%, ສຳລັບບ້ວງເງິນຊ່ວຍເຫຼືອລ້າ ເເມ່ນສຳເລັດການເບີກຈ່າຍ 100%. ເຊິ່ງໃນ 4 ອົງປະກອບຂອງໂຄງການ SEADRM ສະແດງໃຫ້ເຫັນຜົນໄດ້ຮັບທີ່ເປັນຮູບປະທໍາຄື:
1. ເນັ້ນໃສ່ການຄຸ້ມຄອງຄວາມສ່ຽງນໍ້າຖ້ວມດ້ານໂຄງສ້າງ ໄດ້ສຳເລັດການກໍ່ສ້າງພື້ນຖານໂຄງລ່າງ ກໍຄື ການກໍ່ສ້າງຕາຝັ່ງເຈື່ອນ ຢູ່ ແຂວງອຸດົມໄຊ ແລະ ແຂວງບໍລິຄໍາໄຊ ເເມ່ນສຳເລັດ 100%. ສໍາລັບແຂວງຫຼວງພະບາງ ເຖິງວ່າຈະມີຄວາມຊັກຊ້າ ເນື່ອງຈາກພາຍຸວິພາ (Wipha) ແຕ່ກຳລັງດຳເນີນການກໍ່ສ້າງຢ່າງຂຸ້ນຂ້ຽວເພື່ອໃຫ້ສຳເລັດຕາມກຳນົດການປິດສັນຍາ.
2. ໄດ້ມີການປັບປຸງ ເເລະ ຮັບການພັດທະນາຢ່າງຫຼວງຫຼາຍໃນວຽກງານການຫັນລະບົບອຸຕຸນິຍົມ ເເລະ ອຸທົກກະສາດ ເເລະ ການເເຈ້ງເຕືອນລ່ວງໜ້າເປັນທັນສະໄໝ ໂດຍການສ້າງສະຖານີວັດແທກອຸຕຸນິຍົມ-ອຸທົກກະສາດ ໄດ້ຖືກເຊື່ອມໂຍງເຂົ້າໃນລະບົບ Neo-Platform ແລ້ວ. ເຖິງວ່າຍັງມີສິ່ງທ້າທາຍໃນການສົ່ງຂໍ້ມູນບາງຈຸດ ແຕ່ຍັງສືບຕໍ່ແກ້ໄຂບັນຫາ ການບຳລຸງຮັກສາ ແລະ ການເຊື່ອມຕໍ່ຢ່າງເອົາໃຈໃສ່ ເພື່ອໃຫ້ມີຄວາມຍືນຍົງ.
3. ຜົນສໍາເລັດໃນການຊື້ປະກັນໄພ ດ້ານໄພພິບັດທາງທໍາມະຊາດ ໄດ້ສະແດງໃຫ້ເຫັນເຖິງຄວາມສຳຄັນໃນການຊອກຫາເເຫ່ງທຶນ ເພື່ອມາປັບປຸງ ເເລະ ເເກ້ໄຂສະພາບຄ່ອງດ້ານການເງິນ ໃນວຽກງານຄຸ້ມຄອງໄພພິບັດ.
4. ໄດ້ສໍາເສັດການສ້າງຍຸດທະສາດການຄຸ້ມຄອງ ແລະ ນໍາໃຊ້ງົບປະມານການລົງທຶນຂອງລັດ ເພື່ອຟື້ນຟູໂຄງລ່າງພື້ນຖານຫຼັງໄພພິບັດທາງທໍາມະຊາດ ຮອດປີ 2035 ແລະ ສຳເລັດການສ້າງລະບົບຄຸ້ມຄອງຕິດຕາມໂຄງການລົງທຶນຂອງລັດ ບ້ວງຟື້ນຟູໄພພິບັດ (MMSystem) ເຊິ່ງຈະເລີ່ມຈັດຕັ້ງປະຕິບັດໃນປີ 2026.
