ຮອງລັດຖະມົນຕີກະຊວງການເງິນ ຕ້ອນຮັບ ເລຂານຸການເອກ, ສະຖານເອກອັກຄະລັດຖະທູດ ນິວຊີແລນ ປະຈຳບາງກອກ, ຣາຊະອານາຈັກໄທ

        ຕອນບ່າຍຂອງວັນທີ 25 ກັນຍາ 2025, ທ່ານ ສຸລິວັດ ສຸວັນນະຈຸມຄໍາ ຮອງລັດຖະມົນຕີ ກະຊວງການເງິນ ຕ້ອນຮັບການເຂົ້າຢ້ຽມຂໍ່ານັບ ຂອງທ່ານ ນາງ Dana Avram ເລຂານຸການເອກ, ຮັບຜິດຊອບ ວຽກງານການພັດທະນາ ໃນຂົງເຂດອາຊີຕາເວັນອອກສ່ຽງໃຕ້, ສະຖານເອກອັກຄະລັດຖະທູດ ນິວຊີແລນ ປະຈໍາບາງກອກ, ຣາຊະອານາຈັກໄທ ພ້ອມດ້ວຍຄະນະ.

         ໃນການປຶກສາຫາລືການຮ່ວມມືສອງຝ່າຍ ລາວ-ນິວຊີແລນ ເຊິ່ງໃນໄລຍະ ຜ່ານມາລັດຖະບານທັງສອງປະເທດ ໄດ້ເປັນຄູ່ຮ່ວມການພັດທະນາ ແລະ ສາຍພົວພັນທາງດ້ານການທູດຢ່າງແໜ້ນແຟ້ນຕະຫຼອດມາລັດຖະບານນີວຊີແລນ ໄດ້ໃຫ້ການຊ່ວຍເຫຼືອ ສປປ ລາວ ໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດໃນແຕ່ລະໄລຍະ ເປັນຕົ້ນແມ່ນການສະໜັບສະໜູນການຈະເລີນເຕີບໂຕທາງດ້ານເສດຖະກິດ, ການພັດທະນາຊັບພະຍາກອນມະນຸດ ແລະ ການສ້າງຄວາມເຂັ້ມແຂງໃຫ້ແກ່ພາກລັດ, ການປ່ຽນແປງດິນຟ້າອາກາດ, ການປົກປ້ອງທາງດ້ານສິ່ງແວດລ້ອມ, ການເກັບກູ້ລະເບີດທີ່ບໍ່ທັນແຕກ, ການຄໍ້າປະກັນສະບຽງອາຫານ ແລະ ກະສິກຳແບບຍືນຍົງເຊິ່ງທັງສອງຝ່າຍໄດ້ສົນທະນາແລກປ່ຽນກັນຕໍ່ກັບນະໂຍບາຍຂອງລັດຖະບານໃນການກະກຽມຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ ຄັ້ງທີ X ຂອງລັດຖະບານລາວ, ການຊຸກຍູ້ສົ່ງເສີມການສ້າງຄວາມເຂັ້ມແຂງໃຫ້ແກ່ດ້ານອຸດສາຫະກຳພະລັງງານໂດຍສະເພາະແມ່ນການສົ່ງເສີມພະລັງງານທົດແທນເພື່ອສ້າງມູນຄ່າເພີ່ມ ແລະ ລາຍ ຮັບໃຫ້ແກ່ລັດຖະບານ ສປປ ລາວ ໃນອານາຄົດອັນໃກ້ນີ້ພ້ອມດຽວກັນ ທ່ານ ນາງ Dana Avram ໄດ້ເຮັດວຽກທາງດ້ານວິຊາການຮ່ວມກັບກົມຮ່ວມມື ແລະ ການເງິນສາກົນ, ກະຊວງການເງິນເພື່ອປຶກສາຫາລືການຍົກສູງການຮ່ວມມືໃນຕໍ່ໜ້າລະຫວ່າງລັດຖະບານຂອງສອງປະເທດ ໂດຍສະເພາະແມ່ນການຊຸກຍູ້ສົ່ງເສີມການສ້າງຄວາມເຂັ້ມແຂງວຽກງານ ເສດຖະກິດ-ການເງິນ.

        ລັດຖະບານນິວຊີແລນໃຫ້ການຊ່ວຍເຫຼືອແກ່ ສປປ ລາວ ເປັນຈຳນວນຫຼາຍຊຶ່ງການຊ່ວຍເຫຼືອດັ່ງກ່າວແມ່ນ ຖືກກັບຄວາມຕ້ອງການ ແລະ ສອດຄ່ອງກັບແຜນພັດທະນາເສດຖະ ກິດ-ສັງຄົມ ຂອງ ສປປ ລາວ ພ້ອມນັ້ນ ກໍ່ໄດ້ໃຫ້ຄຳໝັ້ນສັນຍາວ່າຈະສືບຕໍ່ຍົກລະດັບການຮ່ວມມື ເພື່ອການພັດທະນາ ສປປ ລາວ ແລະ ສ້າງຄວາມເຂັ້ມແຂງທາງດ້ານຊັບພະຍາກອນມະນຸດໃຫ້ແກ່ພະນັກງານລັດຖະກອນໃນອານາຄົດອັນໃກ້ນີ້.