ໃນວັນທີ 10 ກັນຍາ 2025, ໄດ້ຈັດກອງປະຊຸມ ແນະນຳວຽກງານບັນຊີວິສາຫະກິດຜ່ານທາງເອເລັກໂຕຣນິກ ແລະ ເຜີຍແຜ່ນິຕິກໍາຕ່າງໆກ່ຽວກັບວຽກສ່ວຍສາອາກອນ ໃຫ້ຫົວໜ່ວຍທຸລະກິດທີ່ຂຶ້ນກັບການຄຸ້ມຄອງທົ່ວເມືອງຫາດຊາຍຟອງ ນະຄອນຫຼວງວຽງຈັນ. ໂດຍການເຂົ້າຮ່ວມເປັນປະທານຂອງທ່ານ ທະນົງສິນ ແສງພະວົງ ປະທານຄະນະປົກຄອງເມືອງຫາດຊາຍຟອງ, ພ້ອມດ້ວຍພາກສ່ວນກ່ຽວຂ້ອງ ແລະ ນັກວິທະຍາກອນຈາກຂະແໜງຄຸ້ມຄອງການບັນຊີ ແລະ ສ່ວຍສາອາກອນ ປະຈໍານະຄອນຫຼວງ ເຂົ້າຮ່ວມ. ໂອກາດນີ້, ທ່ານ ທະນົງສິນ ແສງພະວົງ ຜູ້ຊີ້ນໍາວຽກງານຂົງເຂດເສດຖະກິດ ໄດ້ຍົກໃຫ້ເຫັນບົດບາດຄວາມສໍາຄັນໃນການຝຶກອົບຮົມ, ເພື່ອໃຫ້ບັນດາຫົວໜ່ວຍທຸລະກິດກໍຄືຜູ້ປະກອບການໄດ້ຮັບຮູ້ເຂົ້າໃຈຢ່າງລະອຽດ ໃນການປະຕິບັດລະບຽບກົດໝາຍທີ່່ໄດ້ກໍານົດໄວ້ ໂດຍສະເພາະວຽກງານການບັນຊີເປັນຕົ້ນ: ຂັ້ນຕອນ, ກົນໄກ, ວິທີການໃນການສົ່ງເອກະສານຜ່ານລະບົບເອເລັກໂຕຣນິກ ແລະ ຜູ້ເຂົ້າຮ່ວມຝຶກອົບຮົມໄດ້ຮັບຟັງເຜີຍແຜ່ກົດໝາຍວ່າດ້ວຍອາກອນມູນຄ່າເພີ່ມ (ສະບັບປັບປຸງ) ແລະ ດຳລັດວ່າດ້ວຍການຄຸ້ມຄອງໃບເກັບເງິນ, ເພື່ອສ້າງຄວາມຮັບຮູ້ກ່ຽວກັບການປ່ຽນແປງ ຂອງກົດໝາຍວ່າດ້ວຍອາກອນມູນຄ່າເພີ່ມ, ເພື່ອນຳໃຊ້ເປັນບ່ອນອີງໃນການເຄື່ອນໄຫວທຸລະກິດ ແລະ ການຈັດເກັບລາຍຮັບ ສາມາດນຳໄປຈັດຕັ້ງປະຕິບັດຢ່າງເປັນເອກະພາບ, ມີປະສິດທິຜົນ ສາມາດປະກອບສ່ວນໃນການມອບພັນທະອາກອນມູນຄ່າເພີ່ມ. ການຫັນເອົາບັນດາຫົວໜ່ວຍທຸລະກິດ ທີ່ໄດ້ຮັບການສ້າງຕັ້ງຈາກຂະແໜງການທີ່ກ່ຽວຂ້ອງ ແລະ ໄດ້ຮັບເລກປະຈຳຕົວຜູ້ເສຍອາກອນແລ້ວຕ້ອງໄດ້ເຂົ້າສູ່ລະບົບອາກອນມູນຄ່າເພີ່ມ, ຫົວໜ່ວຍທີ່ເຂົ້າສູ່ລະບົບອາກອນມູນຄ່າເພີ່ມ ຕ້ອງຮັບປະກັນໃຫ້ມີການຖືບັນຊີໃຫ້ສອດຄ່ອງກັບ ກົດໝາຍບັນຊີ ຂອງ ສປປ ລາວ, ຮັບປະກັນທຸກການຊື້-ຂາຍ ຕ້ອງມີການນໍາໃຊ້ໃບເກັບເງິນ ອມພ ຢ່າງຖືກຕ້ອງ, ເມື່ອມີການເກັບເງິນ ອມພ ມາແລ້ວ ກໍ່ຕ້ອງຮັບປະກັນວ່າຫົວໜ່ວຍທຸລະກິດ ໄດ້ນໍາເອົາເງິນ ອມພ ທີ່ເກັບໄດ້ນັ້ນມາແຈ້ງມອບ ຢ່າງຄົບຖ້ວນ, ລວມເຖິງອາກອນປະເພດອື່ນໆທີ່ຫົວໜ່ວຍ ທຸລະກິດເຂົ້າໃນລະບົບ ອາກອນມູນຄ່າເພີ່ມຕ້ອງໄດ້ແຈ້ງມອບ ເພື່ອເຮັດໃຫ້ຫົວໜ່ວຍທຸລະກິດ ພາຍໃນເມືອງຫາດຊາຍຟອງ ກໍຄືໃນທົ່ວນະຄອນຫຼວງວຽງຈັນ ສາມາດປະຕິບັດວຽກງານດັ່ງກ່າວຢ່າງຖືກຕ້ອງ ແລະ ເປັນເອກະພາບ ປະກອບສ່ວນສ້າງລາຍຮັບອາກອນມູນຄ່າເພີ່ມ ຂອງເມືອງກໍຄື ຂອງນະຄອນຫຼວງວຽງຈັນ ໃຫ້ນັບມື້ເພີ່ມຂຶ້ນເລື້ອຍໆ. ໃນຕອນທ້າຍຂອງການຝືກອົບຮົມບັນດານັກສໍາມະນາກອນໄດ້ມີການປະກອບຄໍາຄິດເຫັນ ແລກປ່ຽນບົດຮຽນໃນການຈັດຕັ້ງປະຕິບັດວຽກງານຕົວຈິງ ລວມທັງສະເໝີຂໍ້ຫຍຸ້ງຍາກທີ່ຕ້ອງໄດ້ຮັບການແກ້ໄຂ, ເພື່ອໃຫ້ຖືກຕ້ອງສອດຄ່ອງຕາມລະບຽບຫຼັກການ ເຊິ່ງວິທະຍາກອນກໍ່ໄດ້ແນະນໍາ ແລະ ໃຫ້ຄວາມກະຈ່າງແຈ້ງໃນວິທີການຂັ້ນຕອນໃນການແກ້ໄຂ ເພື່ອໃຫ້ມີຄວາມໂລ່ງລ່ຽນໃນການປະຕິບັດວຽກງານຂອງທັງພາກລັດ ແລະ ເອກະຊົນນໍາອີກດ້ວຍ.
