ປະກາດ-ສັບຊ້ອນພະນັກງານສ່ວຍສາອາກອນ, ຄັງເງິນ ປະຈໍາ ນວ ແລະ ປະຈໍາເມືອງ

ໃນວັນທີ 10 ມັງກອນ 2022 ທີ່ສໍານັກງານອົງການປົກຄອງ ນະຄອນຫຼວງວຽງຈັນ, ໄດ້ຈັດພິທີປະກາດການຈັດຕັ້ງຂອງສ່ວຍສາອາກອນ ແລະ ຄັງເງິນ ປະຈໍານະຄອນຫຼວງວຽງຈັນ (ນວ) ແລະ ປະຈໍາເມືອງຂຶ້ນ, ໂດຍການເຂົ້າຮ່ວມເປັນປະທານຂອງທ່ານ ປອ ບຸນເຫຼືອ ສິນໄຊວໍລະວົງ ຮອງລັດຖະມົນຕີກະຊວງການເງິນ ແລະ ທ່ານ ປອ ອາດສະພັງທອງ ສີພັນດອນ ເຈົ້າຄອງນະຄອນຫຼວງວຽງຈັນ, ມີບັນດາຫົວໜ້າກົມຂອງກະຊວງການເງິນ, ຫົວໜ້າຄະນະຈັດຕັ້ງ, ຫົວໜ້າຫ້ອງວ່າການ, ຫົວໜ້າພະແນກພາຍໃນ ນະຄອນຫຼວງວຽງຈັນ ແລະ ບັນດາເຈົ້າເມືອງ-ຮອງເຈົ້າເມືອງ, ຫົວໜ້າພະແນກການເງິນ, ຫ້ອງການ-ການເງິນເມືອງ, ຂະແໜງສາຍຕັ້ງ, ພະນັກງານຫຼັກແຫຼ່ງເຂົ້າຮ່ວມ.

ໃນພິທີດັ່ງກ່າວ,ທ່ານ ກົງຄໍາ ສິດທິວໍລະດາ ຫົວໜ້າກົມຈັດຕັ້ງ ແລະ ພະນັກງານ ກະຊວງການເງິນ ໄດ້ຜ່ານຂໍ້ຕົກລົງຂອງລັດຖະມົນຕີ ກະຊວງການເງິນ ໂດຍອີງຕາມກົດໝາຍວ່າດ້ວຍພະນັກງານ-ລັດຖະກອນ ສະບັບເລກທີ 74/ສພຊ, ລົງວັນທີ 18 ທັນວາ 2015, ອີງຕາມດໍາລັດຂອງນາຍຍົກລັດຖະມົນຕີ ວ່າດ້ວຍການຈັດຕັ້ງ ແລະ ການເຄື່ອນໄຫວຂອງກະຊວງການເງິນ, ອີງຕາມການຕົກລົງເຫັນດີເປັນເອກະພາບ ລະຫວ່າງກະຊວງການເງິນ ຮ່ວມກັບອົງການປົກຄອງນະຄອນຫຼວງວຽງຈັນ, ອີງຕາມການເຫັນດີເປັນເອກະພາບຂອງກອງປະຊຸມຄະນະປະຈໍາພັກກະຊວງການເງິນ ລັດຖະມົນຕີກະຊວງການເງິນ ຕົກລົງເຫັນດີແຕ່ງຕັ້ງຫົວໜ້າສ່ວຍສາອາກອນ ປະຈໍາເມືອງຈັນທະບູລີ ເປັນຮອງຫົວໜ້າສ່ວຍສາອາກອນ ປະຈໍານະຄອນຫຼວງວຽງຈັນ, ຍົກຍ້າຍພະນັກງານກົມສ່ວຍສາອາກອນໄປຮັບໜ້າທີ່ໃໝ່ສ່ວຍສາອາກອນປະຈໍານະຄອນຫຼວງວຽງຈັນຈໍານວນ 6 ທ່ານ, ຍົກຍ້າຍພະນັກງານສ່ວຍສາອາກອນ ປະຈໍານະຄອນຫຼວງວຽງຈັນ ໄປສັງກັດຢູ່ກົມສ່ວຍສາອາກອນ ຈໍານວນ 9 ທ່ານ, ຍົກຍ້າຍພະນັກງານສ່ວຍສາອາກອນ ປະຈໍານະຄອນຫຼວງວຽງຈັນ ໄປສັງກັດຢູ່ພະແນກການເງິນ ນະຄອນຫຼວງວຽງຈັນ ຈໍານວນ 7 ທ່ານ, ຍົກຍ້າຍ ແລະ ແຕ່ງຕັ້ງ ພະນັກງານຮັບໜ້າທີ່ໃໝ່ຢູ່ສ່ວຍສາອາກອນ ປະຈໍານະຄອນຫຼວງວຽງຈັນໃນຂະແໜງບໍລິຫານ ແລະ ການເງິນ 3 ທ່ານ, ຂະແໜງກວດກາພາຍໃນ, ຂະແໜງຄຸ້ມຄອງລາຍຮັບອາກອນ, ຂະແໜງຄຸ້ມຄອງອາກອນມູນຄ່າເພີ່ມ ແລະ ຂະແໜງບໍລິຫານຄວາມສ່ຽງ ແລະ ກວດກາຂະແໜງລະ  4 ທ່ານ, ພ້ອມທັງປະກາດຫົວໜ້າ, ຮອງຫົວໜ້າສ່ວຍສາອາກອນປະຈໍາເມືອງ 9 ເມືອງໃນນະຄອນຫຼວງວຽງຈັນ.

      ພ້ອມກັນນັ້ນ,ກໍ່ຍັງໄດ້ມີການປະກາດຍົກຍ້າຍພະນັກງານພະນັກງານຄັງເງິນ ປະຈໍາເມືອງປາກງື່ມ ມາສັງກັດຢູ່ຄັງເງິນ ປະຈໍານະຄອນຫຼວງວຽງຈັນ, ຍົກຍ້າຍ ແລະ ແຕ່ງຕັ້ງຫົວໜ້າ ຮອງຫົວໜ້າຂອງຄັງເງິນປະຈໍານະຄອນຫຼວງວຽງຈັນ ໃນຂະແໜງ ບັນຊີ ແລະ ກວດກາ, ຂະແໜງບໍລິການຄັງເງິນ ແລະ ຂະແໜງກວດກາລາຍຈ່າຍງົບປະມານ, ຍົກຍ້າຍ ແລະ ແຕ່ງຕັ້ງ ຫົວໜ້າ, ຮອງຫົວໜ້າຄັງເງິນປະຈໍາເມືອງ 9 ຕົວເມືອງຂອງນະຄອນຫຼວງວຽງຈັນຕາມຄວາມເໝາະສົມຂອງໜ້າທີ່ວຽກງານໃນໄລຍະໃໝ່

ໂອກາດດັ່ງກ່າວ, ທ່ານ ປອ ບຸນເຫຼືອ ສິນໄຊວໍລະວົງ ໃຫ້ຮູ້ວ່າ: ການປັບປຸງໂຄງປະກອບກົງຈັກການຈັດຕັ້ງດັ່ງກ່າວ ເປັນການການປັບປຸງ ໃຫ້ສອດຄ່ອງກັບສະພາບວຽກງານຕົວຈິງ ຕາມທິດຊີ້ນໍາຂອງລັດຖະບານ ໃຫ້ກະທັດຮັດ, ສົມເຫດສົມຜົນ, ວຽກງານບໍ່ກ້າວກ່າຍຊໍ້າຊ້ອນກັນ ແລະ ເຄື່ອນໄຫວ ມີປະສິດທິພາບ, ປະຕິບັດ ຕາມຄໍາແນະນໍາ ຂອງລັດຖະມົນຕີກະຊວງການເງິນ ກ່ຽວກັບການຄຸ້ມຄອງວຽກງານ ພາສີ, ສ່ວຍສາອາກອນ ແລະ ຄັງເງິນ ຊຶ່ງໄດ້ມີການປະສານສົມທົບກັນ ລະຫວ່າງ ກະ ຊວງການເງິນ ຮ່ວມກັບ ອົງການປົກຄອງນະຄອນຫຼວງວຽງຈັນ ແລະ ບັນດາເມືອງ ຖືກຕ້ອງສອດຄ່ອງ ກັບລະບຽບການ ໄດ້ກໍານົດ. ຈໍານວນໜຶ່ງເປັນການຍົກຍ້າຍຈາກກົມສ່ວຍສາອາກອນ ໄປຮັບໜ້າທີ່ໃໝ່ຢູ່ນະຄອນຫຼວງ, ຈໍານວນໜຶ່ງເປັນການຍົກຍ້າຍ ຈາກນະຄອນຫຼວງ ແລະ ບັນດາເມືອງ ໄປຮັບໜ້າທີ່ໃໝ່ ຢູ່ກົມສ່ວຍສາອາກອນ, ຈໍານວນໜຶ່ງເປັນການຍົກຍ້າຍ ໄປຮັບໜ້າທີ່ໃໝ່ ຢູ່ພະແນກການເງິນນະຄອນຫຼວງ ແລະ ການຍົກຍ້າຍດັ່ງກ່າວ ແມ່ນອີງຕາມຄວາມຮຽກຕ້ອງ ການຂອງໜ້າທີ່ວຽກງານ ໃນໄລຍະໃໝ່ ແລ ທັງເພື່ອເປັນການແລກປ່ຽນບົດຮຽນໃນການຈັດຕັ້ງປະຕິບັດວຽກງານ ໃນແຕ່ລະຂັ້ນ ເພື່ອໃຫ້ເຫັນໄດ້ບັນຫາຕ່າງໆທີ່ຫຍຸ້ງຍາກ ແລະ ຮ່ວມກັນແກ້ໄຂໃຫ້ໄດ້ຮັບຜົນສໍາເລັດ

ພ້ອມກັນນັ້ນ,ທ່ານ ປອ ອາດສະພັງທອງ ສີພັນດອນ ໃຫ້ຮູ້ວ່າ: ການຈັດຕັ້ງປະຕິບັດວຽກງານໃນປີ 2021  ມີຫຼາຍອັນທີ່ເປັນລັກສະນະພົ້ນເດັ່ນ ເປັນຕົ້ນການແກ້ໄຂບັນຫາຢາເສບຕິດ ໄດ້ຮັບການແກ້ໄຂດີຂຶ້ນ, ທາງດ້ານເສດຖະກິດ ກໍ່ມີການພັດທະນາຂະຫຍາຍຕົວດີຂຶ້ນ ສ່ອງແສງໃຫ້ເຫັນການຈັດຕັ້ງປະຕິບັດແຜນງົບປະມານປີ 2021 ນະຄອນຫຼວງວຽງຈັນສາມາດຈັດເກັບລາຍຮັບໄດ້ລື່ນແຜນການທີ່ກໍານົດໄວ້ສະແດງເຖິງຄວາມເອົາໃຈໃສ່ຂອງຂະແໜງການເງິນທ້ອງຖິ່ນບວກກັບກໍາລັງແຮງ ແລະ ການຕັດສິນໃຈຂອງເຈົ້າໜ້າທີ່ ເຮັດໃຫ້ສາມາດແກ້ໄຂໄດ້ຫຼາຍບັນຫາ, ການປັບປຸງກົນໄກ, ບຸກຄະລາກອນ ແມ່ນເປັນການປັບປຸງໃຫ້ມີຄວາມສອດຄ່ອງໃນການປະຕິບັດໜ້າທີ່ວຽກງານ ແລະ ຕາມຄວາມຮຽກຮ້ອງຕ້ອງການຕົວຈິງຂອງວຽກ ແລະ ເນັ້ນໃຫ້ຜູ້ທີ່ໄດ້ຮັບການແຕ່ງຕັ້ງ ຍົກຍ້າຍໃນຄັ້ງນີ້ ຕ້ອງມີຈິດໃຈບຸກທະລຸທາງດ້ານແນວຄິດ ຈິນຕະນາການ, ມີທັດສະນະທີ່ຖືກຕ້ອງຕາມກົດໝາຍ ແລະ ວິຊາສະເພາະຂອງແຕ່ລະຂະແໜງການ ມີຄວາມຕັດສິນໃຈເດັດຂາດ, ມີການກະຕຸກຊຸກຍູ້ ຕິດຕາມກວດກາໃຫ້ມີລັກສະນະກວ້າງຂວາງ, ກໍາໄດ້ບັນຫາຕ່າງໆ ແລະ ແກ້ໄຂໃຫ້ນັບມື້ນັບດີຂຶ້ນເລື້ອຍໆ. 

ພາບ/ຂ່າວ:
ວັນທີອອກຂ່າວ:

12/01/2022

ວັນທີເກິດຂ່າວ:

10/01/2022

Close Menu
Top