ບົ່ງຕົວແຕ່ງຕັ້ງເລຂາໜ່ວຍພັກ ແລະ ປະກາດການຈັດຕັ້ງຂັ້ນຮອງຫົວໜ້າກົມ-ພະແນກ

ໃນວັນທີ 7 ມັງກອນ 2022 ທີ່ຫ້ອງປະຊຸມກົມສ່ວຍສາອາກອນ ກະຊວງການເງິນ, ໄດ້ມີພິທີປະກາດບົ່ງຕົວແຕ່ງຕັ້ງເລຂາໜ່ວຍພັກ ກົມການເງິນຕ່າງປະເທດ, ກົມຄຸ້ມຄອງໜີ້ສິນສາທາທລະນະ ແລະ ປະກາດການຈັດຕັ້ງຂັ້ນຮອງຫົວໜ້າກົມ, ຫົວໜ້າພະແນກ, ຮອງຫົວໜ້າພະແນກຂອງ 2 ກົມດັ່ງກ່າວ, ໂດຍການເປັນປະທານຂອງ ທ່ານ ບຸນໂຈມ ອຸບົນປະເສີດ ກໍາມະການສູນກາງພັກ ເລຂາຄະນະບໍລິຫານງານພັກ ລັດຖະມົນຕີກະຊວງການເງິນ, ມີບັນດາສະຫາຍຮອງເລຂາຄະນະພັກ, ຄະນະປະຈໍາພັກ, ກໍາມະການຄະນະພັກ, ຄະນະພັກ-ຄະນະນໍາແຕ່ລະຂັ້ນຂອງກະຊວງການເງິນເຂົ້າຮ່ວມ.

ທ່ານ ກົງຄໍາ ສິດທິວໍລະດາ ກໍາມະການພັກກະຊວງ, ຫົວໜ້າກົມຈັດຕັ້ງ ແລະ ພະນັກງານ ກະຊວງການເງິນ ໄດ້ຜ່ານມະຕິຕົກລົງວ່າດ້ວຍການບົ່ງຕົວແຕ່ງຕັ້ງເລຂາໜ່ວຍພັກກົມການເງິນຕ່າງປະເທດ, ໂດຍອີງຕາມກົດລະບຽບຂອງພັກປະຊາຊົນປະຕິວັດລາວ ສະໄໝທີ XI, ອີງຕາມດໍາລັດວ່າດ້ວຍການບົ່ງຕົວແຕ່ງຕັ້ງຫົວໜ້າກົມການເງິນຕ່າງປະເທດ ກະຊວງການເງິນ ສະບັບເລກທີ 668/ນຍ, ລົງວັນທີ 21 ທັນວາ 2021, ອີງຕາມດໍາລັດວ່າດ້ວຍການບົ່ງຕົວແຕ່ງຕັ້ງຫົວໜ້າກົມຄຸ້ມຄອງໜີ້ສິນສາທາລະນະ ສະບັບເລກທີ 667/ນຍ, ລົງວັນທີ 30 ທັນວາ 2021, ອີງຕາມການຕົກລົງເຫັນດີໃນກອງປະຊຸມຄະນະປະຈໍາພັກກະຊວງການເງິນ ຄັ້ງວັນທີ 30 ທັນວາ 2021.

ຄະນະປະຈໍາພັກ ກະຊວງການເງິນ ອອກມະຕິຕົກລົງບົ່ງຕົວແຕ່ງຕັ້ງສະຫາຍ ວົງຄໍາແຫງ ວົງທະຈັກ ເປັນເລຂາໜ່ວຍພັກ ກົມການເງິນຕ່າງປະເທດ, ບົ່ງຕົວແຕ່ງຕັ້ງ ສະຫາຍ ພະນົມພອນ ແກ້ວວົງວິຈິດ ເປັນຮອງເລຂາໜ່ວຍພັກ ແລະ ປະທານກວດກາພັກ ແລະ ສະຫາຍ ນາງ ແພງຄ່ຽມ ໄຊຍະແກ້ວ ເປັນກໍາມະການໜ່ວຍພັກ; ບົ່ງຕົວແຕ່ງຕັ້ງສະຫາຍ ສຸລິວັດ ສຸວັນນະຈູມຄໍາ ເປັນເລຂາໜ່ວຍພັກກົມຄຸ້ມຄອງໜີ້ສິນສາທາລະນະ, ບົ່ງຕົວແຕ່ງຕັ້ງ ສະຫາຍ ນາງ ໄມທິບ ລັດຕະນະບຸນຍັງ ເປັນຮອງເລຂາໜ່ວຍພັກ ແລະ ປະທານກວດກາພັກ ແລະ ສະຫາຍ ນາງ ມະນີວອນ ພົນອາມາດ ເປັນກໍາມະການໜ່ວຍພັກ.

ພ້ອມນັ້ນ, ຍັງໄດ້ມີການຜ່ານຂໍ້ຕົກລົງສະບັບເລກທີ 0029/0030/0031/0032/ກງ, ລົງວັນທີ 06 ມັງກອນ 2022 ລັດຖະມົນຕີກະຊວງການເງິນຕົກລົງຍົກຍ້າຍ ແລະ ແຕ່ງຕັ້ງ: ທ່ານ ນາງ ແພງຄ່ຽມ ໄຊຍະແກ້ວ ຮອງຫົວໜ້າກົມການເງິນຕ່າງປະເທດ ແລະ ຄຸ້ມຄອງໜີ້ສິນ ເປັນຮອງຫົວໜ້າກົມການເງິນຕ່າງປະເທດ; ແຕ່ງຕັ້ງ: ທ່ານ ພະນົມພອນ ແກ້ວວົງວິຈິດ ຫົວໜ້າພະແນກເຊື່ອມໂຍງເສດຖະກິດສາກົນ ເປັນຮອງຫົວໜ້າກົມການເງິນຕ່າງປະເທດ; ແຕ່ງຕັ້ງ: ທ່ານ ສາຍໃຈ ລິດຊະນະ ຮອງຫົວໜ້າພະແນກຮ່ວມມືການເງິນຫຼາຍຝ່າຍ ເປັນຫົວໜ້າພະແນກການເງິນຫຼາຍຝ່າຍ, ແຕ່ງຕັ້ງ: ທ່ານ ນາງ ພູມະລີ ພົນບຸນ ເປັນຫົວໜ້າພະແນກການເງິນສອງຝ່າຍ; ແຕ່ງຕັ້ງ: ທ່ານ ຈັນປະສິດ ແສງພະອາທິດ ຮອງຫົວໜ້າພະແນກເຊື່ອມໂຍງເສດຖະກິດສາກົນ ເປັນຫົວໜ້າພະແນກຮ່ວມມືອາຊຽນ; ຍົກຍ້າຍ ແລະ ແຕ່ງຕັ້ງ: ທ່ານ ນາງ ວຽງເພັດ ວົງມຸນຕີ ຮອງຫົວໜ້າພະແນກຄຸ້ມຄອງທຶນກູ້ຢືມ ແລະ ຊ່ວຍເຫຼືອລ້າ ເປັນຫົວໜ້າພະແນກຮ່ວມມືອານຸພາກພື້ນ ແລະ ສາກົນ; ຍົກຍ້າຍ ແລະ ແຕ່ງຕັ້ງ: ທ່ານ ນາງ ລັດຕະນະພອນ ທີແກ້ວ ຮອງຫົວໜ້າພະແນກເຊື່ອມໂຍງເສດຖະກິດສາກົນ ເປັນຮອງຫົວໜ້າພະແນກຮ່ວມມືອານຸພາກພື້ນ ແລະ ສາກົນ, ທັງຍົກຍ້າຍພະນັກງານວິຊາການຈໍານວນໜຶ່ງໄປສັງກັດຢູ່ກົມການເງິນຕ່າງປະເທດ.

        ພ້ອມກັນນັ້ນ, ລັດຖະມົນຕີກະຊວງການເງິນໄດ້ຕົກລົງຍົກຍ້າຍ ແລະ ແຕ່ງຕັ້ງ: ທ່ານ ນາງ ໄມທິບ ລັດຕະນະບຸນຍັງ ຮອງຫົວໜ້າກົມການເງິນຕ່າງປະເທດ ແລະ ຄຸ້ມຄອງໜີ້ສິນ ເປັນຮອງຫົວໜ້າກົມຄຸ້ມຄອງໜີ້ສິນສາທາລະນະ; ຍົກຍ້າຍ ແລະ ແຕ່ງຕັ້ງ: ທ່ານ ນາງ ມະນີວອນ ພົນອາມາດ ຮອງຫົວໜ້າກົມການເງິນຕ່າງປະເທດ ແລະ ຄຸ້ມຄອງໜີ້ສິນ ເປັນຮອງຫົວໜ້າກົມຄຸ້ມຄອງໜີ້ສິນສາທາລະນະ; ຍົກຍ້າຍທ່ານ ເທີດທູນ ສຸກອາລຸນ ຫົວໜ້າພະແນກຄຸ້ມຄອງໜີ້ສິນ ໄປຮັບໜ້າທີ່ໃໝ່ຢູ່ກົມຄຸ້ມຄອງໜີ້ສິນສາທາລະນະ; ຍົກຍ້າຍ ແລະ ແຕ່ງຕັ້ງ: ທ່ານ ບຸນປະເສີດ ສີສຸວັນ ຫົວໜ້າພະແນກຮ່ວມມືການເງິນຫຼາຍຝ່າຍ ແລະ ທ່ານ ສະໄໝຈິດ ບຸຜາ ຮອງຫົວໜ້າພະແນກຄຸ້ມຄອງໜີ້ສິນ ເປັນຫົວໜ້າພະແນກແຜນການ ແລະ ການປະເມີນຜົນ; ຍົກຍ້າຍ ແລະ ແຕ່ງຕັ້ງ: ທ່ານ ສະຫວັດດີ ໄຊມຸງຄຸນ ຮອງຫົວໜ້າພະແນກຮ່ວມມືການເງິນສອງຝ່າຍ ເປັນຜູ້ຮັກສາການຫົວໜ້າພະແນກຄຸ້ມຄອງການກູ້ຢືມຕໍ່ ແລະ ການຄໍ້າປະກັນ; ຍົກຍ້າຍ ແລະ ແຕ່ງຕັ້ງ: ທ່ານ ສຸກຂີວັນ ດວງດີ ຮອງຫົວໜ້າພະແນກຄຸ້ມຄອງໜີ້ສິນ ເປັນຫົວໜ້າພະແນກຄຸ້ມຄອງໂຄງການ; ຍົກຍ້າຍ ແລະ ແຕ່ງຕັ້ງ: ທ່ານ ວິລະກອນ ສູນດາລາ ຮອງຫົວໜ້າພະແນກຄຸ້ມຄອງທຶນກູ້ຢືມ ແລະ ຊ່ວຍເຫຼືອລ້າ ເປັນຮອງຫົວໜ້າພະແນກຄຸ້ມຄອງໂຄງການ; ຍົກຍ້າຍ ແລະ ແຕ່ງຕັ້ງ: ທ່ານ ພອນສະຫວັດ ແກ້ວພັນທຸວົງ ຫົວໜ້າພະແນກຄຸ້ມຄອງທຶນກູ້ຢືມ ແລະ ຊ່ວຍເຫຼືອລ້າ ເປັນຫົວໜ້າພະແນກຄຸ້ມຄອງບໍລິຫານໜີ້ສິນ ແລະ ທັງໄດ້ມີການຍົກຍ້າຍພະນັກງານວິຊາການຈໍານວນ 14 ທ່ານ ໄປສັງກັດຢູ່ກົມຄຸ້ມຄອງໜີ້ສິນສາທາລະນະ. 

        ໂອກາດດັ່ງກ່າວ,ທ່ານ ບຸນໂຈມ ອຸບົນປະເສີດ  ໄດ້ໃຫ້ທິດຊີ້ນໍາກ່ຽວກັບການປັບປຸງການຈັດຕັ້ງໃນຄັ້ງນີ້ ແມ່ນຍ້ອນຄວາມຮຽກຮ້ອງຕ້ອງການຂອງບັນດາໜ້າທີ່ວຽກງານ ຕ້ອງໄດ້ມີການປັບປຸງການຈັດຕັ້ງໃຫ້ມີປະສິດ ທິ ພາບໂລ່ງລ່ຽນໃນການປະຕິບັດວຽກງານ, ປັບປຸງກົງຈັກເພື່ອຮັບຮອງເອົາໜ້າທີ່ການເມືອງທີ່ສໍາຄັນເປັນຕົ້ນໃນນາມເປັນເສນາທິການໃຫ້ແກ່ລັດຖະບານໃນການບໍລິຫານໜີ້ສິນສາທາລະນະ ໃນເມື່ອກ່ອນວຽກງານດັ່ງກ່າວ ແມ່ນໂຮມຢູ່ນໍາກົມການເງິນຕ່າງປະເທດ ແລະ ຄຸ້ມຄອງໜີ້ສິນ ພາຍຫຼັງໄດ້ມີການປັບປຸງກົງຈັກການຈັດຕັ້ງ, ຈຶ່ງໄດ້ແບ່ງພາລະບົດບາດອອກເປັນສອງກົມ ຄືກົມການເງິນຕ່າງປະເທດ ແລະ ກົມຄຸ້ມຄອງໜີ້ສິນສາທາລະນະ, ເຫັນວ່າເປັນວຽກງານທີ່ສໍາຄັນການແຍກອອກເປັນວຽກງານສະເພາະ ເພື່ອໃຫ້ເຫັນໄດ້ບັນຫາທີ່ຕ້ອງໄດ້ມີການປັບປຸງແກ້ໄຂຢ່າງຈະ ແຈ້ງໃນແຕ່ລະຂອດຂັ້ນ, ຊຶ່ງຕ້ອງໄດ້ດໍາເນີນງານຢ່າງເປັນລະບົບ.

ພາບ/ຂ່າວ:
ວັນທີອອກຂ່າວ:

12/01/2022

ວັນທີເກິດຂ່າວ:

07/01/2022

Close Menu
Top