ສະຫາຍ ປອ ແສນສັກ ສຸລິສັກ ເປັນເລຂາຄະນະພັກຮາກຖານພະແນກການເງິນແຂວງສະຫວັນນະເຂດຊຸດໃໝ່

ກອງປະຊຸມໃຫຍ່ສະມາຊິກພັກ ຄັ້ງທີ VII ຂອງຄະນະພັກຮາກຖານພະແນກການເງິນແຂວງສະຫວັນນະເຂດ, ໄດ້ຈັດຂຶ້ນເປັນທາການໃນວັນທີ 25 ມິຖຸນາ 2021 ທີ່ສະໂມສອນຫ້ອງວ່າການປົກ ຄອງແຂວງ, ໂດຍການເປັນກຽດເຂົ້າຮ່ວມເປັນປະທານຂອງສະຫາຍ ພູວັງ ເກດແກ້ວພົມພອນ ຮອງເລຂາພັກແຂວງ ຜູ້ຊີ້ນຳວຽກງານການເມືອງແນວຄິດ, ພັກພະນັກງານ, ສະຫາຍ ປອ ແສນສັກ ສຸລິສັກ ກຳມະການພັກແຂວງ ເລຂາຄະນະພັກຮາກຖານ ຫົວໜ້າພະແນກການເງິນແຂວງ, ມີສະຫາຍຮອງຫົວໜ້າຄະນະຈັດຕັ້ງແຂວງ, ຮອງປະທານກວດກາພັກລັດແຂວງ, ແຂກຖືກເຊີນ ແລະ ບັນດາສະຫາຍ ຜູ້ແທນສົມບູນຈຳນວນ 163 ສະ ຫາຍ, ຍິງ 62 ສະຫາຍເຂົ້າຮ່ວມ.

ໂອກາດນີ້, ສະຫາຍ ປອ ແສນສັກ ສຸລິສັກ ໄດ້ຂຶ້ນກ່າວໄຂກອງປະຊຸມຢ່າງເປັນທາງການພ້ອມທັງຜ່ານຮ່າງບົດລາຍງານການເມືອງພາກທີ I ແລະພາກທີ II ເພື່ອຕີລາຄາຄືນການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ VI ຂອງຄະນະພັກຮາກຖານພະແນກການເງິນແຂວງໃນໄລຍະ 5 ປີ (20162021) ຜ່ານມາພ້ອມທັງກຳນົດທິດທາງລວມ, ບັນດາຄາດໝາຍສູ້ຊົນ ແລະ ວຽກງານຈຸດສຸມແຕ່ລະດ້ານຂອງຄະນະພັກຮາກຖານໃນ 5 ປີຕໍ່ໜ້າແນໃສ່ເພື່ອເຮັດໃຫ້ວຽກງານການເງິນງົບປະມານຂອງແຂວງສະຫວັນນະເຂດມີສະຖຽນລະ ພາບ, ສູ້ຊົນເກັບລາຍຮັບໃຫ້ໄດ້ຕາມແຜນການ, ເກີນແຜນເພື່ອ ຫັນໄປສູ່ແຂວງກຸ້ມຕົນເອງດ້ານງົບປະມານ ແລະຄຸຸ້ມຄອງລາຍຈ່າຍໃຫ້ຖືກຕ້ອງຕາມລະບຽບກົດໝາຍກຳນົດ, ຖືກກັບບຸລິມະສິດລາຍຈ່າຍ ແລະ ມີຄວາມສະດວກວ່ອງໄວຂຶ້ນກວ່າເກ່ົາ.

ໃນໄລຍະ 5 ປີຜ່ານມານີ້, ຄະນະພັກຮາກຖານພະແນກການເງິນ ແຂວງໄດ້ຖືເອົາວຽກງານການເມືອງແນວຄິດເປັນບັນຫາສຳຄັນຕົ້ນຕໍ ແລະ ສອດຫ້ອຍເຂົ້າໃນທຸກຂົງເຂດວຽກງານເຮັດໃຫ້ ສະມາຊິກພັກພະນັກງານຈຳນວນສ່ວນໃຫຍ່ມີຄວາມຮັບຮູ້ ແລະ ເຂົ້າໃຈແນວທາງນະໂຍບາຍປ່ຽນແປງ ໃໝ່ຂອງພັກ, ລະບຽບກົດໝາຍຂອງລັດ, ມີຄວາມຕື່ນຕົວເປັນເຈົ້າການໃນການປົກປ້ອງພັກພະນັກງານສູງຂຶ້ນກວ່າເກົ່າ, ມີຫຼາຍສະຫາຍສະມາຊິກພັກໄດ້ສ້າງຕົນເອງໃຫ້ກາຍເປັນແບບຢ່າງນຳໜ້າໃນດ້ານວຽກງານຕ່າງໆ, ເປັນຜູ້ທີ່ມີຄຸນທາດການເມືອງທີ່ໜັກແໜ້ນ, ມີຄວາມຈົງຮັກພັກດີຕໍ່ພັກ, ມີສະຕິຕໍ່ການຈັດຕັ້ງ, ມີລະບຽບວິໄນ, ເຄົາລົບ ແລະ ປະຕິບັດລະບຽບກົດໝາຍຢ່າງເຂັ້ມງວດ.

ນັບແຕ່ປີ 20162021 ການຈັດເກັບລາຍຮັບເຂົ້າງົບປະມານໃນທົ່ວແຂວງສາມາດປະຕິບັດໄດ້ທັງໝົດ 6.619,66 ຕື້ກີບ, ເທົ່າກັບ 84,11% ຂອງແຜນການ 5 ປີ, ສ່ວນທາງດ້ານລາຍຈ່າຍງົບປະມານປະຕິບັດໄດ້ທັງໝົດ 3.994,86 ຕື້ກີບ, ເທົ່າກັບ 167,96% ແລະ ດ້ານການດຸ່ນດ່ຽງງົບປະມານໃນໄລຍະ 5 ປີ, ສູນກາງໄດ້ດຸ່ນດ່ຽງງົບປະມານໃຫ້ແຂວງຈຳນວນທັງໝົດ 90,74 ຕື້ກີບ, ເທົ່າກັບ 183,89%.

ໂອກາດນີ້, ບັນດາສະຫາຍຜູ້ແທນສົມບູນທີ່ເຂົ້າຮ່ວມໃນກອງປະຊຸມໄດ້ພ້ອມກັນໃຊ້ສິດ ປະ ຊາທິປະໄຕຢ່າງເຕັມສ່ວນໃນການລົງຄະແນນສຽງປ່ອນບັດ ຄັດເລືອກເອົາຄະນະພັກຮາກຖານ ພະແນກການເງິນແຂວງຊຸດໃໝ່, ຊຶ່ງມີຜູ້ລົງຮັບສະໝັກເລືອກຕັ້ງທັງໝົດ 9 ສະຫາຍ, ຍິງ 2 ສະຫາຍ, ຜ່ານການປ່ອນບັດລົງ ຄະແນນສຽງ ແລະ ຜົນຂອງກອງປະຊຸມຄັ້ງປະຖົມມະລຶກໄດ້ມີຄວາມເປັນເອກະພາບເລືອກເອົາສະຫາຍ ປອ ແສນສັກ ສຸລິສັກ ເປັນເລຂາຄະນະພັກຮາກຖານພະແນກການເງິນແຂວງສະຫວັນນະເຂດຊຸດໃໝ່, ສະຫາຍ ນາງ ບົວສະຫວັນ ລຸຍບົວທອງ ເປັນຮອງເລຂາ, ສະຫາຍ ພູຄຳ ອານົນທະວົງ ເປັນປະທານກວດກາພັກ ແລະ ໄດ້ເລືອກເອົາສະຫາຍ ຄຳກອງ ພິມມະໂນສັກ, ສະຫາຍ ເພັດດາລາ ແກ້ວສາລີ, ສະຫາຍ ພົມມະຈັກ ສີພັນດອນ ແລະ ສະຫາຍ ໄພສານ ຈັນສີນາ ເປັນກຳມະການ.

ພາບ/ຂ່າວ:
ວັນທີອອກຂ່າວ:

28/06/2021

ວັນທີເກິດຂ່າວ:
Close Menu
Top