ໝົດປີ 2021 ພະແນກການເງິນແຂວງຫຼວງນໍ້າທາ ຄາດຄະເນເກັບໄດ້ 394 ຕື້ກີບເທົ່າກັບ 116,29%

ໃນກອງປະຊຸມສະຫຼຸບການຈັດຕັ້ງປະຕິບັດ 5 ເດືອນຕົ້ນປີ ແລະ ຄາດຄະເນໝົດປີ 2021 ຂອງຂະແໜງ ການເງິນຜ່ານລະບົບກອງປະຊຸມທາງໄກ, ຊຶ່ງໄດ້ຈັດຂຶ້ນຫວ່າງບໍ່ດົນມານີ້, ທ່ານ ຄຳພັນ ໄຊສີ ຫົວໜ້າພະແນກການເງິນແຂວງຫຼວງນໍ້າທາ, ໄດ້ລາຍງານຈັດຕັ້ງປະຕິບັດແຜນງົບປະມານ 5 ເດືອນ, ແຜນຄາດຄະເນໝົດປີ 2021 ໃຫ້ຮູ້ວ່າ: ໝົດປີ 2021 ລວມລາຍຮັບສູນກາງ ແລະ ທ້ອງຖິ່ນຈະບັນລຸ 394,4 ຕື້ກີບ ຫຼືເທົ່າກັບ 116,29% ຂອງແຜນການປີ.

ໃນປີ 2021 ພະແນກການເງິນແຂວງຫຼວງນໍ້າທາ, ໄດ້ຮັບົວເລກຈັດເກັບລາຍຮັບທັງພູດສູນກາງ ແລະ ທ້ອງຖິ່ນທັງໝົດປີ 2021 ຈໍານວນ 468,7 ຕື້ກີບ, ແຕ່ຜ່ານການຈັດຕັ້ງປະຕິບັດ 5 ເດືອນ, ປະຕິບັດໄດ້ຈໍານວນ 183,6 ຕື້ກີບເທົ່າກັບ 39,18% ຂອງແຜນການປີ, ທຽບໃສ່ໄລຍະດຽວຂອງປີຜ່ານມາເພີ່ມຂຶ້ນ 49,82% ໃນນີ້:ລາຍຮັບພູດສູນກາງ, ແຜນການປີ 339 ຕື້ກີບ, 5 ເດືອນປະຕິບັດໄດ້ 158 ຕື້ກີບເທົ່າກັບ 46,60% ຂອງແຜນການປີ,ທຽບໃສໄລຍະດຽວຂອງປີຜ່ານມາເພີ່ມຂຶ້ນ 66%; ລາຍຮັບງົບປະມານທ້ອງຖິ່ນແຜນການປີ 129 ຕື້ກີບ, 5 ເດືອນປະຕິບັດໄດ້ 25 ຕື້ກີບເທົ່າກັບ 19,76% ຂອງແຜນການປີ, ທຽບໃສ່ໄລຍະດຽວຂອງປີຜ່ານມາຫຼຸດ 7% ຊຶ່ງໂດຍລວມແລ້ວການຈັດເກັບລາຍຮັບເຂົ້າງົບປະມານແຫ່ງລັດພູດຂອງສູນກາງບັນລຸໄດ້ຕາມຄາດໝາຍ,ສ່ວນລາຍຮັບພູດຂອງທ້ອງຖິ່ນແມ່ນບໍ່ສາມາດບັນລຸຕາມຄາດໝາຍ. ທັງນີ້, ກໍຍ້ອນການລະບາດຂອງພະຍາດໂຄວິດ-19, ການນໍຳເຂົ້າ-ສົ່ງອອກສິນຄ້າຢູ່ດ່ານສາກົນ, ດ່ານທ້ອງຖິ່ນ, ດ່ານປະເພນີມີຈໍາກັດ, ເຄື່ອງຂອງທີ່ມາແຈ້ງເສຍພາສີຫຼຸດລົງ, ການຂົນສົ່ງສິນຄ້າເຂົ້າ-ອອກດ່ານມີຄວາມຫຍຸ້ງຍາກ, ປະຕິບັດມາດຕະການຂອງແຕ່ລະປະເທດ, ການສົ່ງອອກແຮ່ທາດ,ຖານລາຍຮັບພາຍໃນແຂວງເປັນຖານລາຍຮັບບໍ່ໝັ້ນຄົງ, ເປັນຫົວໜ່ວຍທຸລະກິດຂະໜາດນ້ອຍ, ທຸລະກິດແບບເສຍພັນທະມອບເໝົາເປັນສ່ວນຫຼາຍ ແລະ ບັນຫາອື່ນໆ.

ເຖິງແນວໃດກໍແນວດີອີງຕາມແຜນການຄາດຄະເນໝົດປີ 2021 ລວມລາຍຮັບສູນກາງ ແລະ ທ້ອງຖິ່ນຈະບັນລຸ 394,4 ຕື້ກີບ ຫຼືເທົ່າກັບ 116,29% ຂອງແຜນການປີ. ໃນນີ້, ລາຍຮັບພາສີໝົດປີຈະບັນລຸ 389 ຕື້ກີບເທົ່າກັບ 124,01% ຂອງແຜນການປີ, ສ່ວຍສາອາກອນໝົດປີຈຳນວນ 70 ຕື້ກວ່າກີບເທົ່າກັບ 57,37% ຂອງແຜນການປີ, ຄຸ້ມຄອງຊັບສິນຂອງລັດໝົດປີຈໍານວນ 8,4 ຕື້ກວ່າກີບເທົ່າກັບ 111%ຂອງແຜນການປີ.

 

ເພື່ອເຮັດໃຫ້ການຈັດຕັ້ງປະຕິບັດແຜນງົບປະມານແຫ່ງລັດບັນລຸຕາມຄາດໝາຍຂະແໜງການເງິນ,ຈະສຶກສາອົບຮົມນໍາພາການເມືອງ-ແນວຄິດໃຫ້ແກ່ພະນັກງານ-ລັດຖະກອນ,ສະມາຊິກພັກພາຍໃນໃຫ້ມີຄວາມສະຫງົບ, ດ້ວຍການເຜີຍແຜ່ກົດໝາຍ, ລະບຽບການຕ່າງໆກ່ຽວກັບຂະແໜງການເງິນໃຫ້ກ້ວາງຂວາງເລິກເຊີ່ງ  ແລະ ທົ່ວເຖິງ, ສືບຕໍ່ປັບປຸງກົງຈັກການຈັດຕັ້ງຂອງພະແນກການເງິນ  ແລະ 3 ຂະແໜງສາຍຕັ້ງໃຫ້ສອດຄ່ອງກັບພາລະບົດບາດໃໝ່, ຕິດພັນກັບການກໍານົດຕໍາແໜ່ງ, ເອົາໃຈໃສ່ຄຸ້ມຄອງຖານລາຍຮັບທີ່ຂຶ້ນກັບແຂວງ ແລະ ບັນດາເມືອງໃຫ້ມີຄວາມຊັດເຈນ, ເລັ່ງທວງໜີ້ຄ້າງມອບພັນທະອາກອນ, ຊັບສິນ  ແລະ  ໜີ້ຄຸມເຄືອຢູ່ໃນລະບົບຄັງເງິນ,ຊຸກຍູ້ບັນດາຂະແໜງການ  ທີ່ມີລາຍຮັບວິຊາການຈົດຮັບ – ຈົດຈ່າຍ ຕາມລະບຽບການໃຫ້ທັນກັບເວລາ, ຫັນວຽກງານການເງິນໄປສູ່ທັນສະໄໝ  ໃນການຄຸ້ມຄອງລາຍຮັບ-ລາຍຈ່າຍງົບປະມານ,  ເພື່ອຮັບປະກັນຄວາມຖືກຕ້ອງ, ໂປ່ງໃສວ່ອງໄວ ແລະ ສາມາດກວດສອບໄດ້.

ພາບ/ຂ່າວ:
ວັນທີອອກຂ່າວ:

28/06/2021

ວັນທີເກິດຂ່າວ:
Close Menu
Top