ທ່ານ ປອ ບຸນເຫຼືອ ສິໄຊວໍຣະວົງ ຕ້ອນຮັບການຢ້ຽມຂໍ່ານັບ ຫົວໜ້າຫ້ອງການຜູ້ຕາງໜ້າອົງການໄຈກາປະຈຳລາວຄົນໃໝ່

ໃນວັນທີ 10 ພຶດສະພາ 2021 ທີ່ກະຊວງການເງິນ, ທ່ານ ປອ ບຸນເຫຼືອ ສິໄຊວໍຣະວົງ ຮອງລັດຖະມົນຕີກະຊວງການເງິນ, ໄດ້ຕ້ອນຮັບການເຂົ້າຢ້ຽມຂໍ່ານັບຂອງທ່ານ ໂຕຊິໂອະ ນາກາເຊະ (Toshio NAGASE) ຫົວໜ້າຫ້ອງການຜູ້ຕາງໜ້າອົງການໄຈກາ (Chief Representative of JICA Lao PDR Office) ເນື່ອງໃນໂອກາດມາດໍາລົງຕໍາແໜ່ງເປັນຫົວໜ້າຫ້ອງການຜູ້ຕາງໜ້າອົງການໄຈກາປະຈຳ ສປປ ລາວ ຄົນໃໝ່.

ໂອກາດດັ່ງກ່າວ,ທ່ານ ປອ ບຸນເຫຼືອ ສິໄຊວໍຣະວົງ ໄດ້ສະແດງຄວາມຍິນດີ ແລະ ຕ້ອນຮັບການມາປະຈໍາການຂອງທ່ານ ໂຕຊິໂອະ ນາກາເຊະ ເປັນຫົວໜ້າຫ້ອງການຜູ້ຕາງໜ້າອົງການໄຈກາປະຈຳ ສປປ ລາວ ຄົນໃໝ່, ພ້ອມທັງສະແດງຄວາມຂອບໃຈລັດຖະບານຍີ່ປຸ່ນໃຫ້ການຊ່ວຍເຫຼືອ ສປປ ລາວ ໄລຍະຜ່ານມາທາງດ້ານສະຖຽນລະພາບທາງດ້ານການເງິນ ແລະ ຈະສືບຕໍ່ຈັດຕັ້ງປະຕິບັດວຽກງານດັ່ງກ່າວ. ເຊິ່ງໃນໄລຍະຜ່ານມາລັດຖະບານຍີ່ປຸ່ນໄດ້ໃຫ້ການຊ່ວຍເຫຼືອທາງການເພື່ອການພັດທະນາສປປ ລາວໃນຫຼາຍຂະແໜງການ ແລະ ປັດຈຸບັນປະເທດຍີ່ປຸ່ນຈັດຢູ່ໃນອັນດັບ 1 ຂອງບັນດາປະເທດທີ່ໃຫ້ການຊ່ວຍເຫຼືອແກ່ສປປ ລາວ, ເຊິ່ງການຊ່ວຍເຫຼືອມີສອງຮູບແບບຄື: ໃນຂອບສອງຝ່າຍ ແລະ ຫຼາຍຝ່າຍ, ລວມທັງການຊ່ວຍເຫຼືອລ້າ (Grant Aid), ການຮ່ວມມືທາງດ້ານເຕັກນິກ (Technical Cooperation) ແລະ ກູ້ຢືມດອກເບັ້ຍຕໍ່າ (Yen Loan), ເຊິ່ງເປັນການຊ່ວຍເຫຼືອລ້ານອກໂຄງການມູນຄ່າ 4.000 ລ້ານເຢັນ (ປະມານ 32,8 ລ້ານໂດລາສະຫະລັດ) ໂດຍເນັ້ນໃສ່ການຊ່ວຍເຫຼືອທາງດ້ານເຕັກນິກວິຊາການ

ໂອກາດດຽວກັນ, ທັງສອງຝ່າຍກໍໄດ້ແລກປ່ຽນກ່ຽວກັບສະພາບເສດຖະກິດ ແລະ ການປະຕິຮູບການເງິນຂອງສປປ ລາວ ເຊິ່ງທ່ານຮອງລັດຖະມົນຕີກໍໄດ້ແຈ້ງເຖິງເປົ້າໝາຍການປະຕິຮູບການເງິນ,ການເພີ່ມອັດຕາສ່ວນຂອງລາຍຮັບລັດຖະບານຕໍ່ GDP ແລະ ການຫັນລະບົບການເງິນເປັນທັນສະໄໝ; ຄວາມຄືບໜ້າການຈັດຕັ້ງປະຕິບັດ ໂດຍໄດ້ລົງເລິກແຕ່ລະວຽກງານເປັນຕົ້ນວຽກງານພາສີ, ອາກອນ, ລວມເຖິງຜົນກະທົບຂອງ COVID-19  ຕໍ່ຂະ    ແໜງການເງິນ ແລະ ຄວາມທ້າທາຍໃນການຈັດການໜີ້ສິນສາທາລະນະ ແລະ ອື່ນໆ.

ພາບ/ຂ່າວ:
ວັນທີອອກຂ່າວ:
ວັນທີເກິດຂ່າວ:
Close Menu
Top