ຮອງນາຍົກ ໂອ້ລົມກອງປະຊຸມເຊື່ອມຊຶມ ມະຕິກອງປະຊຸມໃຫຍ່ ຄັ້ງທີ XI ຂອງພັກ

ໃນວັນທີ 21 ເມສາ 2021 ນີ້, ຄະນະບໍລິຫານງານພັກກະຊວງການເງິນ, ໄດ້ຈັດກອງປະຊຸມເຜີຍແຜ່ຊື່ອມຊຶມມະຕິກອງປະຊຸມໃຫຍ່ ຄັ້ງທີ XI  ຂອງພັກປະຊາຊົນ ປະຕິວັດລາວ, ໂດຍໃຫ້ກຽດເຂົ້າຮ່ວມໂອ້ລົມຂອງສະຫາຍ ສອນໄຊ ສີພັນດອນ ກຳມະການກົມການເມືອງສູນກາງພັກ, ຮອງນາຍົກລັດຖະມົນຕີ, ລັດຖະມົນຕີກະຊວງແຜນການ ແລະ ການລົງທຶນ,ມີສະຫາຍ ບຸນໂຈມ ອຸບົນປະເສີດ ກຳມະການສູນກາງພັກ, ເລຂາຄະນະພັກກະຊວງ, ລັດຖະ ມົນຕີກະຊວງການເງິນ, ບັນດາສະຫາຍຄະນະບໍລິຫານງານພັກ, ເລຂາຄະນະພັກຮາກຖານ, ເລຂາໜ່ວຍພັກຮາກຖານ, ສຳມະຊິກພັກ-ພະນັກງານຫຼັກແຫຼ່ງນໍາພາຄຸ້ມຄອງອ້ອມຂ້າງກະຊວງການເງິນເຂົ້າຮ່ວມ.

ໂອກາດດັ່ງກ່າວ,ສະຫາຍ ບຸນໂຈມ ອຸບົນປະເສີດ ໄດ້ລາຍງານໂດຍສັງເຂບໃນກອງປະຊຸມຄັ້ງນີ້ໄດ້ມີການເຊື່ອມຊຶມບັນດາທິດນໍາ, ຈຸດປະສົງລະດັບຄາດໝາຍທີ່ຄະນະເລຂາທິການສູນກາງພັກໄດ້ກໍານົດອອກ ໂດຍເລັ່ງໃສ່ບັນຫາຕົ້ນຕໍຂອງມະຕິກອງປະຊຸມໃຫ່ຍຜູ້ແທນທົ່ວປະເທດ ຄັ້ງທີ XI  ຂອງພັກ, ບັນດາຫົວຂໍ້ທີ່ສໍາຄັນເປັນຕົ້ນ: ທິດຊີ້ນໍາລວມ, ຜົນສໍາເລັດ, ບັນດາຂໍ້ຄົງຄ້າງ ແລະ ສາເຫດທີ່ພາໃຫ້ມີຂໍ້ຄົງຄ້າງ, ບົດຮຽນທີ່ຖອດຖອນໄດ້, ພ້ອມທັງທິດທາງລວມຂອງມະຕິກອງປະຊຸມໃຫ່ຍ ຄັ້ງທີ XI  ຂອງພັກທີ່ໄດ້ກໍານົດໄວ້.

ພ້ອມກັນນັ້ນໃນການດໍາເນີນການປະກອບຄໍາຄິດເຫັນໄດ້ວາງທິດທາງ ແລະ ກໍານົດເປັນຫຼັກການໃຫ້ແຕ່ລະບັນດາສະຫາຍທີ່ເປັນຄະນະປະຈໍາສະເໜີບາງຫົວຂໍ້ທີ່ພົວພັນກັບມະຕິ XI ແລະ ໃຫ້ກໍານົດທິດທາງລວມ, ປະກອບຄໍາຄິດເຫັນໃສ່ການຫັນເອົາແຜນພັດທະນາເສດຖະກິດ-ສັງຄົມແຫ່ງຊາດ,ແຜນງົບປະມານແຫ່ງລັດ 5 ປີ ຄັ້ງທີ IX ຕາມມະຕິຂອງສະພາແຫ່ງຊາດວາງອອກໃຫ້ເປັນທິດທາງລະອຽດ, ສຸມໃສ່ການປັບປຸງເນື້ອໃນຄາດໝາຍຕ່າງໆໃຫ້ສອດ ຄ່ອງກັບວຽກງານຂອງຂະແໜງການເງິນ, ສອດຄ່ອງກັບມະຕິຂອງກອງປະຊຸມໃຫ່ຍຜູ້ແທນອົງຄະນະພັກກະຊວງການເງິນ ຄັ້ງທີ III, ແຜນພັດທະນາຂະແໜງການເງິນປີ 2021-2025 ແຜນພັດທະນາເສດຖະກິດ-ສັງຄົມ 5 ປີຄັ້ງທີ IX ແລະ ປະກອບຄໍາຄິດເຫັນໃສ່ແຜນປະຕິຮູບການຄຸ້ມຄອງວຽກງານລາຍຮັບແຕ່ສູນກາງຮອດທ້ອງຖິ່ນ.

ເພື່ອຂຸດຄົ້ນທຸກທ່າແຮງທີ່ບົ່ມຊ້ອນທີ່ມີໃນປັດຈຸບັນເຮັດໃຫ້ເກັບລາຍຮັບໄດ້ຄົບຖ້ວນ ແລະ ມີຄວາມໂປ່ງໃສ, ເນັ້ນໃສ່ການແກ້ໄຂການອັດຊ່ອງຫວ່າງການຮົ່ວໄຫຼໃນລະບົບ ໂດຍການສຸມໃສ່ທາງດ້ານນິຕິກໍາ ແລະ ກົງຈັກການຄຸ້ມຄອງລະຊ່ອງຫວ່າງຕ່າງໆ, ແຜນປະຕິຮູບລະບົບລາຍຈ່າຍຮອບດ້ານແກ້ໄຂບັນຫາຕ່າງໆທີ່ເປັນລັກສະນະຟຸມເຟືອຍໃຫ້ມີການປະຢັດມັດທະຍັດ, ປັບໂຄງສ້າງການລົງທຶນຕ່າງໆ, ປັບປຸງຂົງເຂດຄັງເງິນງົບປະມານໃຫ້ມີຄວາມກະທັດຮັດ, ໂປ່ງໃສ ແລະ ແຜນພັດທະນາບຸກຄະລາກອນຂະແໜງການເງິນ ແລະ ບັນຫາອື່ນໆ.

 

ໂອກາດນີ້, ສະຫາຍ ສອນໄຊ ສີພັນດອນ ໄດ້ໃຫ້ກຽດໂອ້ລົມຕໍ່ກອງປະຊຸມເຜີຍແຜ່ເຊື່ອມຊຶມມະຕິກອງປະຊຸມໃຫຍ່ ຄັ້ງທີ XI  ຂອງພັກປະຊາຊົນ ປະຕິວັດລາວ, ໄດ້ເນັ້ນໜັກຫຼາຍບັນຫາເປັນຕົ້ນ: ເອົາໃຈໃສ່ການຈັດຕັ້ງເຜີຍແຜ່ ແລະ ຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ, ມະຕິກອງປະຊຸມຄັ້ງປະຖົມມະລຶກຂອງສະພາແຫ່ງຊາດ ຊຸດທີ IX ແລະ ມະຕິກອງປະຊຸມໃຫ່ຍ ຄັ້ງທີ III ຂອງອົງຄະນະພັກກະຊວງການເງິນໃຫ້ເປັນແຜນການ ແລະ ໂຄງການລະອຽດເພື່ອເປັນທິດທາງໃຫ້ແກ່ການຈັດຕັ້ງປະຕິບັດວຽກງານຕົວຈິງໃຫ້ມີປະສິດທິພາບປະສິດທິຜົນ.

ຄຽງຄູ່ກັນນີ້, ຕ້ອງມີຍຸດທະສາດໃນການປັບປຸງວິສາຫະກິດລັດລົງທຶນໃຫ້ມີຜົນກໍາໄລ ແລະ ເປັນວິສາຫະກິດທີ່ນໍາໜ້າ, ກວດກາຄືນວິສາຫະກິດທີ່ເປັນຍຸດທະສາດຂອງລັດທີ່ເປັນໜໍ່ແໜງທາງດ້ານລາຍຮັບ, ປັບປຸງກົງຈັກການຈັດຕັ້ງ ແລະ ບຸກຄະລາກອນຂອງບັນດາລັດວິສາຫະກິດໃຫ້ມີຄວາມເໝາະສົມ, ປະຕິຮູບການຄຸ້ມຄອງລາຍຮັບແມ່ນມີຄວາມຈໍາເປັນ ແລະ ຫຼີກລ້ຽງບໍ່ໄດ້ເພື່ອຮັບປະກັນການຄຸ້ມຄອງໃຫ້ມີປະສິດທິຜົນ ແລະອັດຊ່ອງວ່າງການຮົ່ວໄຫຼຂອງລາຍຮັບງົບປະມານໃນສະເພາະໜ້າ. ສະນັ້ນ, ຂະແໜງລາຍຮັບຕ້ອງໄດ້ສຸມໃສ່ 4 ໜ້າວຽກບູລິມະສິດຕົ້ນຕໍຄື: ຕ້ອງໄດ້ທົບທວນນະໂຍບາຍ, ປັບປຸງນິຕິກໍາ ແລະ ບັງຄັບໃຊ້ນິຕິກໍາຂອງຂົງເຂດລາຍຮັບງົບປະມານ, ຕ້ອງໄດ້ມີແຜນງານປະຕິຮູບກົນໄກການຄຸ້ມຄອງລາຍຮັບງົບປະມານ, ຕ້ອງມີແຜນການປະຕິຮູບການຫັນເປັນທັນສະໄໝໃນຂົງເຂດລາຍຮັບງົບປະມານ, ຕ້ອງມີແຜນງານປະຕິຮູບດ້ານກົງຈັກການຈັດຕັ້ງ, ບຸກຄະລາກອນ ແລະ ສ້າງຂີດຄວາມສາມາດໃຫ້ແກ່ພະນັກງານ-ລັດຖະກອນຂະແໜງການເງິນ, ຫັນການຊໍາລະເກັບລາຍຮັບຜ່ານລະບົບເອເລັກໂຕນິກ ແລະ ດີຈິຕອນໃຫ້ຫຼາຍຂຶ້ນ, ເລັ່ງປະຕິຮູບວຽກງານລາຍຮັບ ແລະ ອັດຊ່ອງຫວ່າງການຮົ່ວໄຫຼຂອງຂະແໜງການເງິນ, ປະຕິຮູບລະບົບລາຍຈ່າຍ ແລະ ກົນໄກ, ຂັ້ນຕອນ, ການບໍລິການ ເພື່ອອໍານວຍຄວາມ ສະດວກໃນການດໍາເນີນທຸລະກິດ ແລະ ການປະຕິບັດພັນທະຕໍ່ງົບປະມານໃຫ້ມີຄວາມສະດວກ, ທັນສະໄໝ, ໂປ່ງໃສ, ວ່ອງໄວ ແລະ ມີປະສິດທິຜົນ.

 

ພ້ອມດຽວກັນນີ້, ເດັດຂາດບໍ່ອະນຸຍາດໃຫ້ພະນັກງານຄັງເງິນປະຈໍາແຂວງ ແລະ ຄັງເງິນປະຈໍາເມືອງຈ່າຍ-ລ່ວງໜ້ານອກແຜນງົບປະມານແຫ່ງລັດ, ເພີ່ມຄວາມເດັດຂາດ, ເຂັ້ມງວດປະຕິບັດວິໄນການເງິນ, ສະກັດກັ້ນຊ່ອງຫວ່າງການຮົ່ວໄຫຼຂອງລາຍຮັບ ແລະ ລາຍຈ່າຍງົບປະມານຢ່າງມີຈຸດສຸມ ແລະ ມີມາດຕະການປະຕິບັດໃຫ້ໄວຍົກສູງຄວາມຮັບຜິດຊອບຕໍ່ໜ້າທີ່ວຽກງານ, ຕ້ານແນວຄິດ ແລະ ການກະທໍາ ທີ່ບໍ່ສອດຄ່ອງກັບກົດໝາຍໂດຍສະເພາະການສວຍໃຊ້ໜ້າທີ່ຕໍາແໜ່ງເຮັດໃຫ້ມີປະກົດການຫຍໍ້ທໍ້ ແລະ ດຶງເອົາຫຼາຍພາກສ່ວນເຂົ້າມີສ່ວນຮ່ວມໃນການປັບປຸງຄວາມເຂັ້ມແຂງດ້ານການເງິນຂອງລັດ; ເພີ່ມທະວີການໂຄສະນາເຜີຍແຜ່ກົດໝາຍ ແລະ ນິຕິກໍາໃຕ້ກົດໝາຍຂອງຂະແໜງການເງິນ ໃຫ້ໄປສູ່ລົງເລິກ ແລະ ທົ່ວເຖິງທັງສູນກາງ ແລະ ທ້ອງຖິ່ນສ້າງກົນໄກ ແລະ ນະໂຍບາຍສົ່ງເສີມການລົງທຶນຂອງພາກເອກະຊົນໃຫ້ຫຼາຍຂຶ້ນ ເພື່ອເປັນທ່າແຮງໃຫ້ແກ່ການສ້າງຖານລາຍຮັບງົບປະມານແຫ່ງລັດ.

ພາບ/ຂ່າວ:

ຂ່າວ: ອາພັດສະລາ ຈັນທະວົງ

ວັນທີອອກຂ່າວ:

23/04/2021

ວັນທີເກິດຂ່າວ:

21/04/02021

Close Menu
Top