ຄະນະບໍລິຫານງານພັກ ກະຊວງການເງິນ ເຊື່ອມຊຶມ-ຜັນຂະຫຍາຍມະຕິກອງປະຊຸມ ຄັ້ງທີ XI ຂອງພັກ

ໃນວັນທີ 2021 ເມສາ 2021 ນີ້, ຄະນະບໍລິຫານງານພັກ ກະຊວງການເງິນ, ໄດ້ຈັດກອງປະຊຸມເຊື່ອມຊຶມ ແລະ ຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກປະຊາຊົນປະຕິວັດລາວຂຶ້ນທີ່ຫ້ອງປະຊຸມກົມສ່ວຍສາອາກອນ, ເພື່ອໃຫ້ບັນດາສະຫາຍຄະນະບໍລິຫານງານພັກກະຊວງ, ເລຂາຄະນະພັກຮາກຖານ, ເລຂາໜ່ວຍພັກຮາກຖານ, ສຳມະຊິກພັກພະນັກງານຫຼັກແຫຼ່ງນໍາພາຄຸ້ມຄອງອ້ອມຂ້າງກະຊວງການເງິນ.

 

ໂດຍການເປັນປະທານຂອງ ສະຫາຍ ບຸນໂຈມ ອຸບົນປະເສີດ ກຳມະການສູນກາງພັກ, ເລຂາຄະນະພັກກະ ຊວງ, ລັດຖະມົນຕີກະຊວງການເງິນ, ມີບັນດາສະຫາຍຄະນະບໍລິຫານງານພັກກະຊວງ,  ເລຂາ, ຮອງເລຂາຄະນະພັກຮາກຖານ, ເລຂາ, ຮອງເລຂາໜ່ວຍພັກຮາກຖານ, ສະມາຊິກພັກ, ຂັ້ນຫົວໜ້າພະແນກ ແລະ ຮອງຫົວໜ້າພະແນກ ອອມຂ້າງກະຊວງການເງິນເຂົ້າຮ່ວມ.

ໂດຍປະຕິບັດຕາມຈິດໃຈຊີ້ນໍາ ແລະ ການຕົກລົງຂອງກົມການເມືອງ ແລະ ຄະນະເລຂາທິການສູນກາງພັກ ກໍຄືຄໍາສັ່ງກ່ຽວກັບການຈັດຕັ້ງເຊື່ອມຊຶມມະຕິກອງປະຊຸມໃຫຍ່ ຄັ້ງທີ XI ຂອງພັກ, ເພື່ອໃຫ້ບັນດາສະຫາຍສູນກາງ, ພະນັກງານນໍາພາຫຼັກແຫຼ່ງກໍາໄດ້ເນື້ອໃນຈິດໃຈຕົ້ນຕໍ, ມີຄວາມເຂົ້າໃຈຢ່າງເປັນເອກະພາບ, ເພື່ອສືບຕໍ່ນໍາພາຈັດຕັ້ງເຊື່ອມຊຶມ ແລະ ຜັນຂະຫຍາຍ ມະຕິ XI ເຂົ້າສູ່ວຽກງານຂອງຕົນ ແລະ ເຮັດໃຫ້ມະຕິກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XI ຂອງພັກໄດ້ຮັບການຈັດຕັ້ງເຊື່ອມຊຶມຢ່າງກວ້າງຂວາງເລິກເຊິງ ແລະ ຈັດຕັ້ງປະຕິບັດເກີດຜົນເປັນຈິງ.

 

ໃນໂອກາດດັ່ງກ່າວ, ສະຫາຍ ບຸນໂຈມ ອຸບົນປະເສີດ ໃຫ້ຮູ້ວ່າ: ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XI ຂອງພັກແມ່ນເຫດການການເມືອງສໍາຄັນປະຫວັດສາດ, ເປັນກອງປະຊຸມແຫ່ງການສືບຕໍ່ຍຶດໝັ້ນ ແລະ ເພີ່ມເຕີມເສີມຂະຫຍາຍແນວທາງປ່ຽນແປງໃໝ່ຢ່າງຮອບດ້ານມີຫຼັກການຂອງພັກເຮົາເຂົ້າສູ່ລວງເລິກ, ສືບຕໍ່ບູລະນະລະ ບອບ ປະຊາທິປະໄຕ ປະຊາຊົນ ໃຫ້ສົມບູນຍິ່ງຂຶ້ນ ແລະ ກ້າວເດີນສູ່ຈຸດໝາຍສັງຄົມນິຍົມ, ກໍານົດທັດສະນະແຫ່ງການສ້າງການຫັນປ່ຽນຢ່າງແຂງແຮງ, ເລິກເຊິ່ງ, ຮອບດ້ານໃນການພັດທະນາເສດຖະກິດສັງຄົມໃນຊຸມປີຕໍ່ໜ້າ ແນ ໃສ່ແກ້ໄຂຄວາມທຸກຍາກ ແລະ ນໍາເອົາປະເທດຊາດພົ້ນຈາກສະຖານະດ້ອຍພັດທະນາ, ທັງເປັນຂີດໝາຍແຫ່ງການເຕີບໃຫ່ຍຂະຫຍາຍຕົວ, ແມ່ນບັ້ນດໍາເນີນຊີວິດການເມືອງພາຍໃນພັກເພື່ອສ້າງການຫັນປ່ຽນທີ່ແຂງແຮງ ແລະ ເປັນລະບົບໂດຍເລີ່ມຈາກການຫັນປ່ຽນທາງດ້ານແນວຄິດຈິນຕະນາການ ສູ່ການກະທໍາຕົວຈິງ, ເພື່ອແກ້ໄຂຈຸດອ່ອນ ຂໍ້ ຄົງຄ້າງໃຫ້ມີການຫັນປ່ຽນໃໝ່ຢ່າງຮອບດ້ານ, ແນ່ໃສ່ຍົກສູງບົດບາດຄວາມສາມາດ ນໍາພາ ແລະ ຄວາມເປັນແບບຢ່າງນໍາໜ້າຂອງພັກ ເພີ່ມທະວີຄວາມສາມັກຄີເປັນປຶກແຜ່ນຂອງປະຊາຊົນໃນຊາດ, ເດັດດ່ຽວປົກປັກຮັກສາ ແລະ ສ້າງສາປະເທດຊາດສູ່ຈຸດໝາຍສັງຄົມນິຍົມ.

 ການຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດສັງຄົມຕົວຈິງແມ່ນແນໃສ່ໃຫ້ ການນໍາແຕ່ລະຂັ້ນ ຮັບຮູ້ເຂົ້າໃຈຢ່າງເລິກເຊິ່ງ ແລະ ກໍາແໜ້ນເນື້ອໃນຂອງມະຕິ XI ຂອງພັກ, ໂດຍສະເພາະແມ່ນເນື້ອໃນທີ່ສໍາຄັນຕົ້ນຕໍ ແລະ ວຽກງານຈຸດສຸມທີ່ຕ້ອງໄດ້ເອົາໃຈໃສ່ນໍາພາຊີ້ນໍາໃນແຕ່ລະຂົງເຂດວຽກງານຕາມຄວາມຮັບຜິດຊອບຂອງຕົນ ຕິດພັນກັບການເສີມຂະຫຍາຍຄວາມເປັນເຈົ້າການຂອງບັນດາກະຊວງອົງການ, ບັນດາແຂວງ, ນະຄອນຫຼວງກໍຄືຂະແໜງການ ແລະ ທ້ອງຖິ່ນຕ່າງໆໃນການຫັນມະຕິກອງປະຊຸມໃຫຍ່ ຄັ້ງທີ XI ຂອງພັກ ໃຫ້ເປັນແຜນງານ, ໂຄງການ ແລະ ກິດຈະກໍາລະອຽດຂອງຕົນເພື່ອຈັດຕັ້ງປະຕິບັດໃຫ້ເກີດໝາກເກີດຜົນຕົວຈິງ.

ພ້ອມນັ້ນຕ້ອງເພີ່ມທະວີການນໍາພາຊີ້ນໍາຂອງກົມການເມືອງ ແລະ ຄະນະເລຂາທິການສູນກາງພັກໃນການ ຈັດຕັ້ງຜັນຂະຫຍາຍ ມະຕິ XI ຂອງພັກໃຫ້ແທດເຖິງຕົວຈິງ ແລະ ສ້າງໄດ້ຜົນສສໍາເລັດໃໝ່ໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດໃນໄລຍະໃໝ່. ການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ, ພາຍໃຕ້ຄໍາຂວັນຍົກສູງຄວາມສາມາດນຳພາຂອງພັກ, ເພີ່ມທະວີຄວາມສາມັກຄີເປັນປຶກແຜ່ນປະຊາຊົນໃນຊາດ, ຮັບປະກັນສະຖຽນສະພາບດ້ານການເມືອງຢ່າງໜັກແໜ້ນ, ຜັນຂະຫຍາຍແນວທາງປ່ຽນແປງໃໝ່ສູ່ລ່ວງເລິກ,ສ້າງການຫັນປ່ຽນການພັດທະນາເສດຖະກິດສັງຄົມໄປສູ່ຄຸນນະພາບໃໝ່ຢ່າງແຂງແຮງ, ຍົກລະດັບຄຸນນະພາບຊີວິດ ຂອງປະຊາຊົນໃຫ້ສູງຂຶ້ນ, ສືບຕໍ່ນຳພາປະເທດຊາດພົ້ນຈາກສະຖານະພາບດ້ອຍພັດທະນາ ແລະ ກ້າວເດີນສູ່ຈຸດໝາຍສັງຄົມນິຍົມ, ຖືເປັນແນວຄິດຊີ້ນນໍາທີ່ສ່ອງແສງ ແລະ ຊີ້ບອກຢ່າງກວມລວມໃຫ້ແກ່ການຈັດຕັ້ງຜັນຂະ ຫຍາຍມະຕິກອງປະຊຸມໃຫ່ຍຕະຫຼອດສະໄໝທີ XI.

ໃນກອງປະຊຸມຍັງໄດ້ມີການນໍາສະເໜີເອກະສານການຫັນເປັນທິດທາງລວມ, ຄາດໝາຍສູ້ຊົນ ເປັນອັນລະ ອຽດຕິດພັນກັບ ມະຕິກອງປະຊຸມໃຫ່ຍ ຄັ້ງທີ XI ຂອງພັກ, ມະຕິຂອງສະພາແຫ່ງຊາດ, ແຜນພັດທະນາ 5 ປີຄັ້ງທີ IX, ແຜນປະຕິຮູບວຽກງານລາຍຮັບ ແລະ ການອັດຊ່ອງຫວ່າງການຮົ່ວໄຫຼຂອງຂະແໜງການເງິນ, ແຜນປະຕິຮູບລະບົບລາຍຈ່າຮອບດ້ານ ແລະ ແຜນພັດທະນາບຸກຄະລາກອນຂະແໜງການເງິນ ແລະ ສະເໜີຜ່ານບັນດາເອກະສານຕ່າງໆນຳອີກດ້ວຍ

ພາບ/ຂ່າວ:
ວັນທີອອກຂ່າວ:

21/04/2021

ວັນທີເກິດຂ່າວ:

20-21/04/2021

Close Menu
Top