3 ເດືອນຕົ້ນປີ 2021 ດ່ານພາສີສາກົນປາກຊັນ ເກັບລາຍຮັບເຂົ້າງົບປະມານໄດ້ 50 ຕື້ກີບ

ຕາມການໃຫ້ສຳພາດຂອງ ທ່ານ ໄຊຊະນະ ວົງຊົມພູ ຮອງຫົວໜ້າດ່ານພາສີສາກົນປາກຊັນ ແຂວງບໍລິຄຳໄຊ ໃນວັນທີ 9 ເມສາ 2021 ໃຫ້ຮູ້ວ່າ: ຄະນະຮັບຜິດຊອບຈັດເກັບລາຍຮັບໄດ້ເອົາໃຈໃສ່ຊີ້ນໍາ-ນໍາພາພະນັກງານຫຼັກແຫຼ່ງພາຍໃນດ່ານເປັນປົກກະຕິ, ຖືເອົາວຽກງານການເມືອງ-ແນວຄິດ ຕິດພັນກັບວຽກງານວິຊາສະເພາະ, ຊຶ່ງໂດຍລວມແລ້ວເຫັນວ່າພາຍໃນດ່ານສາກົນປາກຊັນໂດຍພື້ນຖານ ວຽກງານວິຊາສະເພາະໄດ້ມີການປັບປຸງແກ້ໄຂຫຼາຍດ້ານ ເຮັດໃຫ້ການບໍລິການພາຍໃນດ່ານມີຄວາມສະດວກ ວ່ອງໄວ ແລະ ຮັບປະກັນດ້ານລະບຽບກົດໝາຍ.

ສຳລັບການສົ່ງອອກ-ນໍາເຂົ້າສິນຄ້າ ເຫັນໄດ້ວ່າມີບາງຊະນິດສິນຄ້າໄດ້ເພີ່ມຂຶ້ນ ແລະ ລຸດລົງຕາມກົນໄກເສດຖະກິດຂອງຕະຫຼາດ, ຊຶ່ງການຈັດເກັບລາຍຮັບເຂົ້າງົບປະມານປະຈໍາປີ 2021 ຍັງເປັນປີທີ່ທ້າທາຍຫຼາຍດ້ານ ຖ້າທຽບໃສ່ຕົວເລກແຜນການທີ່ໄດ້ຮັບມອບໝາຍໃຫ້, ບວກກັບການລະບາດຂອງພະຍາດໂຄວິດ-19, ອັນໄດ້ສົ່ງຜົນກະທົບໂດຍກົງຕໍ່ກັບການເກັບລາຍຮັບປີ 2021 ສຳລັບໂຕເລກທີ່ໄດ້ຮັບມອບໝາຍຈາກຂັ້ນເທິງຈຳນວນ 361,27 ຕື້ກວ່າກີບ.

 

ສະນັ້ນ, ຄະນະຮັບຜິດຊອບດ່ານພາສີສາກົນປາກຊັນໄດ້ແບ່ງອອກເປັນ IV ງວດຕາມໄຕມາດ, ງວດລະ 90 ຕື້ກວ່າກີບ, ຜ່ານການຈັດຕັ້ງປະຕິບັດຈັດເກັບລາຍຮັບເຂົ້າງົບປະມານແຫ່ງລັດ 3 ເດືອນຕົ້ນປີ 2021 (ງວດI) ໄດ້ 50,23 ຕື້ກວ່າກີບ, ຖ້າທຽບໃສ່ແຜນການປີ 361,27 ຕື້ກວ່າກີບ ເທົ່າກັບ 13,90%, ຖ້າທຽບໃສ່ແຜນງວດເທົ່າກັບ 55,62%, ແຕ່ຖ້າທຽບໃສ່ໄລຍະດຽວກັນໃນປີຜ່ານມາເທົ່າກັບ 89,81%.

ສ່ວນສາເຫດບໍ່ສາມາດຈັດເກັບລາຍຮັບເຂົ້າງົບປະມານໄດ້ຕາມແຜນການ ເກີດຈາກຫຼາຍປັດໃຈເປັນຕົ້ນ: ການວາງໂຕເລກຈັດເກັບລາຍຮັບມອບໝາຍຈາກຂັ້ນເທິງສູງເກີນໄປ ຖ້າທຽບໃສ່ຖານລາຍຮັບຂອງດ່ານ, ການປິດດ່ານປະເພນີ 3 ດ່ານທີ່ຂຶ້ນກັບດ່ານສາກົນປາກຊັນ, ຕິດພັນກັບຕ້ານສະກັດການແຜ່ະບາດຂອງພະຍາດໂຄວິດ-19 ເຮັດໃຫ້ສິນຄ້າບາງປະເພດຢຸດຕິການນໍາເຂົ້າ, ການຫຼຸດຜ່ອນການເກັບພາສີ, ອາກອນນຳເຂົ້າສິນຄ້າ ຫຼື ບາງປະເພດສິນຄ້າຍົກເວັ້ນພາສີໃນກອບສັນຍາອາຊຽນ, ການຍົກເວັ້ນພາສີອາກອນສິນຄ້າສຳລັບການລົງທຶນ, ການກໍ່ສ້າງໂຄງການໃຫຍ່ໆຢູ່ພາຍໃນແຂວງໄດ້ສຳລັດເປັນສ່ວນໃຫຍ່ເປັນຕົ້ນ: ໂຄງການກໍ່ສ້າງເຂື່ອນໄຟຟ້ານໍ້າຕົກ , ນໍ້າງຽບ, ນໍ້າເທີນ. 

ສຳລັບການຈັດເກັບລາຍຮັບພາຍໃນດ່ານຕົ້ນຕໍ ໄດ້ຈາກການນຳເຂົ້ານໍ້າມັນເຊື້ອໄຟ, ເຄື່ອງເອເລັກໂຕນິກເຄື່ອງອຸປະໂພກ-ບໍລິໂພກ ແລະ ການບໍລິການ, ສ່ວນທິດທາງແຜນການໃນຕໍ່ໜ້າ ຄະນະຮັບຜິດຊອບດ່ານຈະເພີ່ມທະວີການສຶກສາອົບຮົມ ການເມືອງແນວຄິດໃຫ້ພະນັກງານ, ສະມາຊິກພັກ, ພະນັກງານລັດຖະກອນເປັນປົກກະຕິ, ຕໍ່ເນື່ອງ, ມີຄວາມຮັຜິດຊອບສູງຕໍ່ໜ້າທີ່ການເມືອງ, ມີຈັນຍາບັນ, ຈັນຍາທໍາ, ໂປ່ງໃສໂດຍອີງໃສຂໍ້ຫ້າມ, ກົດໝາຍທີ່ກ່ຽວຂ້ອງ, ປະສານສົມທົບກັບອົງການປົກຄອງທ້ອງຖິ່ນ, ຂະແໜງການທີ່ກ່ຽວຂ້ອງຕາມສາຍຕັ້ງ ແລະ ສາຍຂວາງອຳນວຍຄວາມສະດວກການບໍລິການ ການນຳເຂົ້າ-ສົ່ງອອກໃຫ້ມີຄວາມວ່ອງໄວ.

ພາບ/ຂ່າວ:
ວັນທີອອກຂ່າວ:

21/04/2021

ວັນທີເກິດຂ່າວ:
Close Menu
Top