ມອບ-ຮັບໜ້າທີ່ລັດຖະມົນຕີ ກະຊວງການເງິນຜູ້ເກົ່າ ແລະ ຜູ້ໃໝ່

ພິທີມອບ-ຮັບໜ້າທີ່ລັດຖະມົນຕີກະຊວງການເງິນລະຫວ່າງທ່ານ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ (ຜູ້ເກົ່າ) ແລະ ທ່ານ ບຸນໂຈມ ອຸບົນປະເສີດ ລັດຖະມົນຕີກະຊວງການເງິນ (ຜູ້ໃໝ່) ໄດ້ຈັດຂຶ້ນໃນວັນທີ 6 ເມສານີ້ທີ່ກະຊວງການເງິນ, ໂດຍການເປັນກຽດເຂົ້າຮ່ວມຂອງທ່ານ ພັນຄຳ ວິພາວັນ ກຳມະການກົມການເມືອງສູນກາງພັກ ນາຍົກລັດຖະມົນຕີ ແຫ່ງ ສປປ ລາວ, ມີຜູ້ຕາງໜ້າຈາກຄະນະຈັດຕັ້ງສູນກາງພັກ, ຄະນະບໍລິຫານງານພັກກະຊວງ, ພະນັກງານຫຼັກແຫຼ່ງຂອງກະຊວງການເງິນ, ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

ໃນພິທີທ່ານ ນາງ ວິໄລວັນ ເພັງສະຫວັດ ໄດ້ຕາງໜ້າຄະນະຈັດຕັ້ງສູນກາງພັກ ຂຶ້ນຜ່ານລັດຖະດຳລັດຂອງປະທານປະເທດ ແຫ່ງ ສປປ ລາວ ສະບັບເລກທີ 120/ປປທ, ລົງວັນທີ 24 ມີນາ 2021 ວ່າດ້ວຍການອອກພັກການ-ຮັບອູດໜູນບຳນານໂດຍອະນຸມັດໃຫ້ທ່ານ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີກະຊວງການເງິນອອກພັກການ-ຮັບອຸດໜູນບຳນານ; ລັດຖະດຳລັດປະທານປະເທດ ແຫ່ງ ສປປ ລາວ ສະບັບເລກທີ 135/ປປທ, ລົງວັນທີ 29 ມີນາ 2021 ວ່າດ້ວຍການແຕ່ງຕັ້ງລັດຖະມົນຕີກະຊວງການເງິນໂດຍແຕ່ງຕັ້ງໃຫ້ທ່ານ ບຸນໂຈມ ອຸບົນປະເສີດ ເປັນລັດຖະມົນຕີກະຊວງການເງິນ ແລະ ດຳລັດຂອງນາຍົກລັດຖະມົນຕີ ສະບັບເລກທີ 285/ນຍ, ລົງວັນທີ 2 ເມສາ 2021 ວ່າດ້ວຍການແຕ່ງຕັ້ງຮອງລັດຖະມົນຕີກະຊວງການເງິນໂດຍແຕ່ງຕັ້ງທ່ານ ບຸນປອນ ວັນນະຈິດ ເປັນຮອງລັດຖະມົນຕີກະຊວງການເງິນ.

ໃນໂອກາດດັ່ງກ່າວ, ທ່ານ ສົມດີ ດວງດີ ໄດ້ຜ່ານບົດສະຫຼຸບໂດຍສັງເຂບການຊີ້ນຳ-ນໍາພາໄລຍະຜ່ານມາຍົກໃຫ້ເຫັນວຽກງານດ້ານການເມືອງ-ແນວຄິດ, ວຽກກະກຽມ ແລະ ດຳເນີນກອງປະຊຸມໃຫຍ່ຂອງພັກ, ວຽກປັບປຸງກົງຈັກ ແລະ ການຈັດຕັ້ງພັກ, ວຽກງານລັດ, ການນຳພາແກ້ໄຂວຽກງານດ້ານງົບປະມານໃນ 1 ສະໄໝຜ່ານມາມີຫຼາຍອັນພົົົົ້ນເດັ່ນ ແລະ ສະເໜີທິດທາງແຜນການໃນຕໍ່ໜ້ານຳອີກດ້ວຍ.

ໂອກາດນີ້,ທ່ານ ພັນຄຳ ວິພາວັນ ໄດ້ໃຫ້ທິດຊີ້ນຳບາງຕອນວ່າ: ໃຫ້ຄະນະນຳໃນກະຊວງການເງິນນໍາເອົາເນື້ອໃນມະຕິກອງປະຊຸມໃຫຍ່ຄັ້ງທີ XI ຂອງພັກ, ມະຕິກອງປະຊຸມໃຫຍ່ ຄັ້ງທີ III ຂອງອົງຄະນະພັກກະຊວງການເງິນໄປຜັນຂະຫຍາຍ, ເພື່ອແນໃສ່ເຮັດໃຫ້ສະມາຊິກພັກພະນັກງານເຂົ້າໃຈຢ່າງເລິກເຊິ່ງຕໍ່ແນວທາງການເມືອງຂອງພັກ ແລະ ຈັດຕັ້ງຜັນຂະຫຍາຍໃຫ້ສູ່ລວງເລິກກຳແໜ້ນພາລະບົດບາດໜ້າທີ່ຂອງກະຊວງການເງິນ, ຂຸດຄົ້ນແຫຼ່ງລາຍຮັບເຂົ້າງົບ ປະມານ ເພື່ອຮັບໃຊ້ໃຫ້ແກ່ການເຄື່ອນໄຫວວຽກງານຂອງກົງຈັກພັກ-ລັດ ຮັບໃຊ້ໃຫ້ແກ່ການພັດທະນາປະເທດ, ເພີ່ມທະວີຂຸດຄົ້ນທຸກແຫຼ່ງລາຍຮັບທີ່ບົ່ມຊ້ອນພາຍໃນ ແລະ ສ້າງຖານລາຍຮັບໃຫຍ່ທີ່ໝັ້ນຄົງເພື່ອເກັບລາຍຮັບເຂົ້າງົບປະມານໃຫ້ນັບມື້ເພີ່ມຂຶ້ນ, ສຸມທຸກກໍາລັງໃນການຫັນການເງິນເປັນທັນສະໄໝຮັບປະກັນການຈັດຕັ້ງປະຕິບັດການຈັດເກັບລາຍຮັບ ແລະ ການຄຸ້ມຄອງລາຍຈ່າຍໃຫ້ມີປະສິດທິຜົນສູງກວ່າເກົ່າ, ເພີ່ມທະວີການຊີ້ນຳຕໍ່ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ ປະຈຳປີ 2021 ຊຶ່ງເປັນປີທຳອິດຂອງແຜນພັດທະນາເສດຖະ ກິດ-ສັງຄົມແຫ່ງຊາດ ຄັ້ງທີ IX ໃຫ້ເຂົ້າສູ່ລວງເລິກ ແລະ ມີປະສິດທິຜົນສູງ, ສືບຕໍ່ແກ້ໄຂປະກົດການຫຍໍ້ທໍ້ຕ່າງໆຂອງຖັນແຖວພະນັກງານປັບປຸງການຈັດຕັ້ງໃຫ້ມີຄວາມໜັກແໜ້ນເຂັ້ມແຂງ, ເພີ່ມທະວີການປະຕິບັດວິໄນການເງິນໃຫ້ມີຄວາມເຂັ້ມງວດ ໂດຍສະເພາະເອົາໃຈໃສ່ຄຸ້ມຄອງລາຍຮັບ-ລາຍຈ່າຍງົບປະມານໃຫ້ເຂັ້ມງວດ, ສືບຕໍ່ແກ້ໄຂສະພາບປະກົດການຫຍໍ້ທໍ້ພາຍໃນຂະແໜງການເງິນຕ້ານຄວາມບໍ່ໂປ່ງໃສ, ແກ້ໄຂການສໍ້ລາດບັງຫຼວງຂອງພະນັກງານການເງິນ, ແກ້ໄຂບັນຫາຄົນເຫຼືອບໍ່ພໍປະສິດທິພາບການເຮັດວຽກຕ່ຳຂາດຄວາມກະຕືລືລົ້ນຂາດລະບຽບວິໄນ ແລະ ອື່ນໆ.

ພາບ/ຂ່າວ:
ວັນທີອອກຂ່າວ:

07/04/2021

ວັນທີເກິດຂ່າວ:

06/04/2021

Close Menu
Top