ລັດຖະມົນຕີກະຊວງການເງິນ ຊີ້ແຈງຕໍ່ກອງປະຊຸມຄັ້ງປະຖົມ ມະລຶກຂອງສະພາແຫ່ງຊາດ ຊຸດທີ IX ກ່ຽວກັບແຜນງົບປະມານ 5 ປີ

ໃນໂອກາດດຳເນີນກອງປະຊຸມຄັ້ງປະຖົມມະລຶກຂອງສະພາແຫ່ງຊາດ ຊຸດທີ IX ລະຫວ່າງວັນທີ 22-26 ມີນາ 2021 ຜ່ານມານີ້, ທີ່ຫໍປະຊຸມແຫ່ງຊາດຫຼັງໃໝ່ (ທາດຫຼວງ),ໂດຍພາຍໃຕ້ການເປັນປະທານຂອງທ່ານ ໄຊສົມພອນ ພົມວິຫານ ປະທານສະພາແຫ່ງຊາດ ຊຸດທີ IX.

ໃນວັນທີ 23 ມີນາ 2021 ນີ້, ທ່ານ ບຸນໂຈມ ອຸບົນປະເສີດ ກຳມະການສູນກາງພັກ, ລັດຖະມົນຕີກະຊວງການເງິນ, ໄດ້ຂຶ້ນລາຍງານ-ຊີ້ແຈງຕໍ່ກອງປະຊຸມຄັ້ງປະຖົມມະລຶກຂອງສະພາແຫ່ງຊາດ ຊຸດທີ IX ກ່ຽວກັບແຜນງົບ ປະມານແຫ່ງລັດ 5 ປີ (2021-2025), ຊຶ່ງອີງໃສ່ການມອບໝາຍຕາງໜ້າລັດຖະບານກໍຄືກະຊວງການເງິນ, ຂໍ ອະນຸຍາດອະທິບາຍແລກປ່ຽນບາງບັນຫາ ຕາມສະມາຊິກສະພາແຫ່ງຊາດໄດ້ມີຄວາມເປັນຫ່ວງເປັນໄຍ,  ມີຄໍາຄິດຄໍາເຫັນຕໍ່ບາງຄາດໝາຍບາງຕົວເລກທີ່ລັດຖະບານນໍາສະເໜີ, ກ່ອນອື່ນຂໍສະແດງຄວາມຂອບໃຈ ແລະ ຂໍຮັບເອົາຄໍາຄິດ ຄໍາເຫັນຂອງບັນດາສະມາຊິກສະພາແຫ່ງຊາດໄດ້ໃຫ້ຄວາມເປັນຫ່ວງໃຫ້ຄໍາແນະນໍາຕໍ່ລັດຖະບານກໍຄືກະຊວງການເງິນເພື່ອນໍາໄປສຶກສາຄົ້ນຄວ້າແກ້ໄຂແຕ່ນີ້ໄປໃນຕະຫຼອດ 5 ປີ.

 

ສໍາລັບແຜນງົບປະມານ 5 ປີນັບແຕ່ປີ 2021-2025 ເປັນການສ້າງແຜນງົບປະມານ 5 ປີຄັ້ງທີ IX ຍັງເປັນແຜນງົບປະມານສືບຕໍ່ແກ້ໄຂຄວາມຫຍຸ້ງຍາກແກ້ໄຂບັນຫາທີ່ສະສົມມາໄລຍະຍາວ, ດັ່ງທີ່ໄດ້ສະເໜີຢູ່ໃນບົດມີ 5 ບັນຫາໃຫຍ່ 5 ຂໍ້ຄົງຄ້າງທີ່ພົ້ນເດັ່ນທີ່ສຸດ, 5 ຂໍ້ຄົງຄ້າງທີ່ເປັນໃຈກາງພື້ນຖານໃນລະບົບການເງິນງົບປະມານທີ່ສະສົມມາເປັນເວລາຍາວນານ.

ດັ່ງນັ້ນ, ການສ້າງແຜນງົບປະມານໃນອີກ 5 ປີຕໍ່ໜ້າຍັງເປັນການສ້າງແຜນງົບປະມານເພື່ອປະຄັບປະຄອງ ແລະ ແກ້ໄຂບັນຫາທີ່ສະສົມຜ່ານມາ, ຊຶ່ງຈຸດທີ່ແລກປ່ຽນນໍາສະມາຊິກສະພາແຫ່ງຊາດເພາະວ່າມັນມີຫຼາຍຕົວເລກຄາດໝາຍ, ຖ້າທຽບໃສ່ແຜນງົບປະມານ 5 ປີຄັ້ງທີ VIII ຜ່ານມາຍັງມີບາງຄາດໝາຍຫຼຸດລົງບາງຄາດໝາຍຍັງປະຄັບປະຄອງໄປໃນຈັງຫວະທີ່ເສດຖະກິດພວກເຮົາທີ່ມີຄວາມຫຍຸ້ງຍາກຄືແນວນີ້.

ສຳລັບການສ້າງແຜນງົບປະມານ 5 ປີ (2021-2025) ນີ້ທາງດ້ານລາຍຮັບທາງດ້ານລາຍຈ່າຍ, ອີງໃສ່ຄໍາຄິດຄໍາເຫັນຂອງຫຼາຍທ່ານຕັ້ງບັນຫາວ່າການຂາດດຸນງົບປະມານ 2% ແລະ ບໍ່ໃຫ້ເກີນ 3% ຕະຫຼອດ 5 ປີນີ້ມີຄວາມຈິງແນວໃດຫຼາຍທ່ານຊິຕັ້ງບັນຫາໃນເງື່ອນໄຂພວກເຮົາມີການຂາດດຸນມີຄວາມຕ້ອງການຈ່າຍຄືໃນປັດຈຸບັນ ແລະ ໃນຕໍ່ໜ້າ.

ອີງໃສ່ຜົນຈຸດອ່ອນຂໍ້ຄົງຄ້າງທີ່ຜ່ານມາ, ກະຊວງການເງິນໃນນາມເສນາທິການ ແລະ ລັດຖະບານ, ຈຶ່ງໄດ້ ສ້າງແຜນງົບປະມານເພື່ອໃຫ້ສົມດຸນເທື່ອລະກ້າວໝາຍຄວາມວ່າມີລາຍຮັບເທົ່າໃດກໍຕ້ອງເບິ່ງລາຍຈ່າຍໃຫ້ຊໍ່າກັບລາຍຮັບ ຫຼື ວ່າໃຫ້ຫຼື່ນລາຍຮັບທີ່ເຮົາມີ, ເພື່ອເຮັດໃຫ້ແຜນງົບປະມານໃນ 5 ປີຕໍ່ໄປນີ້ຍັບເຂົ້າການສົມດຸນ. ດັ່ງນັ້ນ,ສະເໜີຕໍ່ກອງປະຊຸມວ່າປີ 2021, ປີ 2022 ແຜນງົບປະມານຂອງພວກເຮົາຍັງເປັນແຜນປະຄັບປະຄອງບໍ່ໃຫ້ເກີດບໍ່ໃຫ້ຕົກເຂົ້າສູ່ວິກິດ ຫຼື ຄວາມຫຍຸ້ງຍາກທີ່ໄດ້ກ່າວມາແລ້ວປີ 2021, ປີ 2022 ນີ້ຍັງເປັນແຜນທີ່ປະຄັບປະຄອງແກ້ໄຂຄວາມຫຍຸ້ງຍາກ, ສ່ວນວ່າ 2023, 2024, 2025 ແຜນງົບປະມານພວກເຮົາຕາມການຄາດຄະເນຕາມການຄິດໄລ່ຕໍ່ສິ່ງທີ່ເອື້ອອໍານວຍຄວາມສະດວກຕໍ່ສິ່ງທ້າທາຍຕ່າງໆທີ່ເກີດຂຶ້ນໃນ 5 ປີຕໍ່ໜ້ານີ້.

ສຳລັບໃນປີ 2023 ເປັນຕົ້ນໄປພວກເຮົາຈະພະຍາຍາມເຮັດໃຫ້ການສ້າງແຜນງົບປະມານໃຫ້ສົມດຸນເທື່ອລະກ້າວໝາຍຄວາມວ່າລາຍຮັບພາຍໃນໃຫ້ກຸ້ມລາຍຈ່າຍພາຍໃນ. ອັນນີ້ແມ່ນຕ້ອງປະຕິບັດຫຼາຍມາດຕະການໄປພ້ອມກັນໂດຍສະເພາະພວກເຮົາພະຍາຍາມເບິ່ງດ້ານລາຍຈ່າຍງົບປະມານ, ດັ່ງທີ່ສະມາຊິກສະພາແຫ່ງຊາດຫຼາຍທ່ານໄດ້ມີຄໍາເຫັນຕໍ່ຄາດໝາຍລາຍຈ່າຍບໍລິຫານຂອງພວກເຮົາເປັນຫຍັງທຽບໃສ່ແຜນ 5 ປີຄັ້ງທີ VIII, ຈຶ່ງຂຶ້ນສູງຄັນເວົ້າເລື່ອງໂຄງສ້າງລາຍຈ່າຍງົບປະມານບໍລິຫານປົກກະຕິມັນມີຢູ່ 4 ປະເພດລາຍຈ່າຍທີ່ລວມຢູ່ໃນນີ້ມີເງິນເດືອນນະໂຍບາຍ, ເງິນດັດສົມ, ເງິນສົ່ງເສີມນະໂຍບາຍ, ເງິນບໍລິຫານປົກກະຕິ, ແຕ່ວ່າສິ່ງສໍາຄັນແມ່ນລາຍຈ່າຍການເງິນແມ່ນນອນຢູ່ໃນພາກນີ້ບ້ວງນີ້ໝາຍຄວາມວ່າດອກເບ້ຍຊໍາລະຕົ້ນທຶນເງິນກູ້ທາງພາຍໃນ ແລະ ຕ່າງປະເທດ, ຊຶ່ງມັນເພີ່ມຂຶ້ນຫຼາຍໃນໄລຍະ 5 ປີຕໍ່ໄປ.

ແຕ່ລະປີຕົກຢູ່ປີໜຶ່ງປະມານ 4.000-4.500 ຮ້ອຍຕື້/ປີ, ສະເພາະຊໍາລະດອກເບ້ຍມັນຈຶ່ງເຮັດໃຫ້ລາຍຈ່າຍບໍລິຫານປົກກະຕິພວກເຮົາໃນພູດລາຍຈ່າຍການເງິນມັນເພີ່ມຂຶ້ນຈາກ 93 ພັນຕື້ມາເປັັນ 130 ພັນຕື້ແມ່ນບ້ວງລາຍຈ່າຍ, ແຕ່ວ່າເບື້ອງລັດຖະບານໄດ້ມີແຜນເພື່ອຫຼຸດລາຍຈ່າຍທີ່ບໍ່ຈໍາເປັນລົງຄືກັບໃນເອກະສານທີ່ແຈກຢາຍໃຫ້ບັນດາສະມາຊິກສະພາແຫ່ງຊາດ, ລາຍຈ່າຍເງິນເດືອນໃນປັດຈຸບັນປີ 2021 ນີ້ກວມຢູ່ 52% ຂອງລາຍຈ່າຍລາຍຮັບພາຍໃນກວມຢູ່ 52% ໃນປັດຈຸບັນ, ໃນຕະຫຼອດ 5 ປີຕໍ່ໜ້ານີ້ຈະໃຫ້ໄດ້ຫຼຸດລົງເຫຼືອ 40% ປະມານ 15 ພັນຕື້ລາຍຈ່າຍເງິນເດືອນດ້ວຍຮູບການທີ່ຈໍານວນພົນພວກເຮົາຫຼຸດລົງ.

 

ການຮັບລັດຖະກອນໂກຕາໃໝ່ພວກເຮົາຈໍາກັດເຂົ້າມັນ, ຈຶ່ງເຮັດໃຫ້ຄັງເງິນເດືອນຫຼຸດລົງອັນນີ້ຄືມາດຕະການໜຶ່ງສໍາລັບການປະຢັດລາຍຈ່າຍ, ອັນທີສອງນີ້ລາຍຈ່າຍບໍລິຫານຄືຕາມນະໂຍບາຍທີ່ທ່ານນາຍົກລັດຖະມົນຕີໄດ້ສະເໜີແມ່ນນະໂຍບາຍປະຢັດນະໂຍບາຍຮັດສາຍແອວຕ່າງໆນີ້ພວກເຮົາຈະສຸມໃສ່ຫຍັງຈະແກ້ໄຂແມ່ນລາຍຈ່າຍທີ່ບໍ່ຈໍາເປັນທີ່ຈະຕ້ອງໄດ້ຕັດຮັດສາຍແອວເຂົ້າຄືກັບໄດ້ສະເໜີບັນຫາຂໍ້ຄົງຄ້າງຜ່ານມາລາຍຈ່າຍບໍລິຫານລັດເຮົານີ້ແມ່ນຟຸມເຟືອຍທີ່ສຸດຄ່ານໍ້າຄ່າໄຟຄ່າປະຊຸມສໍາມະນາໄປວຽກທາງການຕ່າງໆນີ້ບິນຫຼາຍລາຍຈ່າຍທີ່ບໍ່ຈໍາເປັນເຮົາຍັງສືບຕໍ່ອະນຸມັດສືບຕໍ່ຈ່າຍອັນນີ້ເຮົາຊິໄດ້ພ້ອມກັນປະຢັດພ້ອມກັນຮັດສາຍແອວລົງ.

ດັ່ງນັ້ນ, ຈຶ່ງເຮັດໃຫ້ລາຍຈ່າຍບໍລິຫານນີ້ຈາກ 14% ບໍລິຫານປັດຈຸບັນນີ້ໃຫ້ເຫຼືອ 11% ໂດຍການປະຕິບັດມາດຕະການຮັດສາຍແອວ ຫຼື ວ່າຕັດລາຍຈ່າຍທີ່ບໍ່ຈໍາເປັນລົງ ແລະ ປະຢັດລາຍຈ່າຍທີ່ເຫັນວ່າມີຄວາມຈໍາເປັນຈ່າຍຈະຕ້ອງຮັບປະກັນໃຫ້ມັນປະຢັດໃຫ້ໄດ້ໂດຍສະເພາະແມ່ນການແກ້ໄຂການນໍາໃຊ້ພາຫະນະຢູ່ໃນກົງຈັກລັດເຮົານີ້ຊຶ່ງເປັນລັກສະນະທີ່ຟຸມເຟືອຍທີ່ສຸດລາຍຈ່າຍຢູ່ໃນບ້ວງນີ້ຖືວ່າມະຫາສານທີ່ສຸດທີ່ພວກເຮົາຈ່າຍໄປດ້ວຍເຫດການທີ່ບໍ່ມີປະສິດທິຜົນອັນນີ້ຂໍສະເໜີນໍາສະມາຊິກສະພາແຫ່ງຊາດແນວນັ້ນເຫດຜົນທີ່ວ່າເປັນຫຍັງລາຍຈ່າຍບໍລິຫານພວກເຮົາໃນ 5 ປີຕໍ່ໄປນີ້ມັນຈັ່ງຊິເພີ່ມຂຶ້ນຫຼາຍຈາກແຜນ 5 ປີຄັ້ງທີ VIII ຜ່ານມາເນື່ອງຈາກມີລາຍຈ່າຍການເງິນລາຍຈ່າຍດອກເບ້ຍຕົ້ນທຶນ.

ການສ້າງແຜນງົບປະມານເຫັນດີນໍາສະມາຊິກສະພາແຫ່ງຊາດເປັນຫ່ວງ ຫຼື ວ່າເຈາະຈີ້ມລາຍຮັບພວກເຮົາຖ້າທຽບໃສ່ແຜນລາຍຮັບ 5 ປີຄັ້ງທີ VIII ປະມານ 15,9%  ປະຕິບັດໄດ້ສະເລ່ຍຕໍ່ GDP. ແຕ່ສຸດນີ້ສະເໜີ 16% ຂອງ GDP ແຕ່ເນື່ອງຈາກວ່າພວກເຮົາຄາດຄະເນກໍມີຫຼາຍອັນກໍບໍ່ແມ່ນພຽງແຕ່ວ່າຄາດຄະເນແຕ່ສະພາບການຂອງພາກພື້ນ ແລະ ສາກົນແຕ່ພວກເຮົາຄາດຄະເນເບິ່ງຈາກພາຍໃນພວກເຮົາຕື່ມກໍ່ຄິດວ່າຢູ່ໃນ 16% ນີ້ເບື້ອງຕົ້ນຖືວ່າຈະເໝາະສົມແຕ່ວ່າອີງໃສ່ສະມາຊິກສະພາແຫ່ງຊາດຫຼາຍທ່ານມີຄໍາເຫັນວ່າຄວນຢູ່ໃນລະດັບ 18%.

ພວກເຮົາກໍມາໄລ່ເບິ່ງຄັນ 16% ພວກເຮົາຈະຕົກຢູ່ແສນຫົກສິບເກົ້າພັນຕື້ຖ້າເອົາ 17% ແມ່ນແສນແປດສິບພັນຕື້ຖ້າ 18% ແມ່ນແສນເກົ້າສິບພັນຕື້ເພີ່ມຈາກ 16% ຫຼື ປະມານຊາວພັນຕື້ລາຍຮັບ 5 ປີ. ສໍາລັບບັນຫາທີ່ຫຼາຍທ່ານຕັ້ງບັນຫາເລື່ີອງການດຸ່ນດ່ຽງຫົວແຫຼ່ງດຸ່ນດ່ຽງທີ່ໄດ້ສະເໜີຢູ່ໃນແຜນງົບປະມານ 5 ປີຄັ້ງທີ IX ນີ້ມັນບໍ່ແຈ້ງກໍຄືກັບບົດລາຍງານທີ່ໄດ້ສະເໜີວ່າການຂາດດຸນງົບປະມານຜ່ານມາພວກເຮົາມີການຂາດດຸນ.

ການຂາດດຸນພາຍໃນລາຍຮັບພາຍໃນກັບລາຍຈ່າຍປົກກະຕິພາຍໃນພວກເຮົາຂາດດຸນແຕ່ລະປີ, ຂາດດຸນ 2-3%, ຂາດດຸນທີ່ເປັນບັນຫາໃຫຍ່ຂາດດຸນພາຍນອກຂາດດຸນການຊໍາລະສະສາງກັບຕ່າງປະເທດສະເພາະແມ່ນຕົ້ນທຶນເງິນກູ້ແມ່ນເປັນບັນຫາໃຫຍ່ ແລະ ຢູ່ໃນສາລະບານງົບປະມານ, ຈຶ່ງມີພາກທີ 5 ພາກນັ້ນແມ່ນພາກດຸນດ່ຽງ   ໝາຍຄວາມວ່າຊໍາລະຕົ້ນທຶນເງິນກູ້ຕ່າງປະເທດ.

ແຕ່ວ່າແຫຼ່ງດຸນດ່ຽງນີ້ພວກເຮົາສະເໜີວ່າແຫຼ່ງດຸນດ່ຽງຕົ້ນຕໍນີ້ແມ່ນເບື້ອງຂະແໜງການເງິນນີ້ຈະສຸມໃສ່ໃນ 5 ປີຕໍ່ໜ້ານີ້ໄລຍະສັ້ນໄລຍະສະເພາະໜ້ານີ້ຈະໄດ້ທົບທວນຄືນໝົດສະເພາະນະໂຍບານການເງິນ ໂດຍສະເພາະນະໂຍບາຍພາສີອາກອນນີ້, ຊຶ່ງມັນເປັນສິ່ງອຸດຕັນເປັນບັນຫາຕໍ່ການດໍາເນີນທຸລະກິດຂອງຜູ້ປະກອບທຸລະກິດ, ການສ້າງຄວາມຫຍຸ້ງຍາກນີ້ພວກເຮົາຈະໄດ້ສືບຕໍ່ດໍາເນີນແກ້ໄຂເຮັດແນວໃດ, ເພື່ອໃຫ້ນະໂຍບາຍພາສີອາກອນເຮັດໃຫ້ປະຊາຊົນມີຄວາມສົນໃຈໃນການຜະລິດໃນການດໍາເນີນທຸລະກິດຕ້ອງໄດ້ສົ່ງເສີມເພື່ອແກ້ໄຂຖານລາຍຮັບສ້າງຖານລາຍຮັບໃຫ້ພວກເຮົານີ້ເພີ່ມຂຶ້ນໂດຍການໍາໃຊ້ນະໂຍບາຍພາສີອາກອນໃນຫຼາຍດ້ານໃນເມື່ອແຫຼ່ງລາຍຮັບເພີ່ມຂຶ້ນຖານລາຍຮັບເຮົາກໍ່ເພີ່ມຂຶ້ນໂຕນີ້ຈະເປັນແຫຼ່ງໜຶ່ງມາຮັບປະກັນໃນການຊໍາລະໜີ້ສິນຂອງພວກເຮົາຕໍ່ຕ່າງປະເທດອັນນີ້ແມ່ນແຫຼ່ງໜຶ່ງໝາຍຄວາມວ່າແຫຼ່ງດຸນດ່ຽງທີ່ຈະບໍລິຫານຢູ່ໃນພາກທີ 5 ຂອງສາລະບານງົບປະມານ.

ສຳລັບລາຍຈ່າຍຈະຕ້ອງປະຢັດລາຍຈ່າຍທີ່ບໍ່ຈໍາເປັນ, ໝາຍຄວາມວ່າບໍ່ຈ່າຍທີ່ບໍຈໍາເປັນ, ບໍ່ຈ່າຍກໍ່ບໍ່ມີຫຍັງເກີດຂຶ້ນ, ຕັດລົງເພື່ອໄປສະສົມໃນການຊໍາລະໜີ້ສິນທີ່ພວກເຮົາມີຢ່າງມະຫາສານໃນປັດຈຸບັນ, ສ່ວນແຫຼ່ງທີ 3 ທີ 4 ນັ້ນກໍຍັງເປັນແຫຼ່ງແກ້ໄຂສະເພາະໜ້າແມ່ນການລະດົມພັນທະບັດກໍຄືກັບສະພາແຫ່ງຊາດບາງທ່ານສະເໜີ, ການສ້າງໜີ້ໝາຍຄວາມວ່າ ເອົາໜີ້ໂຕນັ້ນມາແກ້ໜີ້ໂຕນີ້, ແຕ່ມັນຄືຄວາມຈໍາເປັນໃນບາງກໍລະນີອັນນີ້ເປັນການແກ້ໄຂເປັນກົນໄກລວມທັງການລະດົມທ່າແຮງບົມຊ້ອນເປັນຕົ້ນ: ແມ່ນຊັບສິນຂອງລັດທີ່ມີເປັນຕົ້ນ: ແມ່ນຊັບພະຍາກອນທີ່ເຮົາມີເພື່ອເຮັດແນວໃດເພື່ອເຮັດໃຫ້ຊັບພະຍາກອນດັ່ງກ່າວນີ້ມາເປັນຜົນປະເໂຫຍດຕອບແທນໃນບາງດ້ານໃນການແກ້ໄຂຄວາມຫຍຸ້ງຍາກທາງດ້ານການເງິນງົບປະມານໃນປັດຈຸບັນ.

ການແກ້ໄຂບັນຫາໃນຂົງເຂດການເງິນງົບປະມານໂດຍສະເພາະແມ່ນບັນຫາການເກັບລາຍຮັບໃນໄລຍະຜ່ານມາໄດ້ວິເຄາະວິໄຈກໍຮັບຮູ້ວ່າການຮົ່ວໄຫຼຂອງຮັບງົບປະມານຜ່ານມານີ້ມັນມາທັງ 2 ດ້ານບັນຫາທີ 1 ແມ່ນກົດໝາຍນິຕິກໍາໃຕ້ກົດໝາຍຈໍານວນໜຶ່ງມີສ່ອງຫວ່າງພວກເຮົາກໍວິເຄາະອອກມາເຫັນວ່າມີສ່ອງຫວ່າງ, ສ່ອງຫວ່າງໂຕນີ້ມັນເປັນບັນຫາທີ່ເກີດຂຶ້ນທີ່ຕາມມາແມ່ນເຈົ້າໜ້າທີ່ ສາມາດສວຍໃຊ້ໜ້າທີ່ໄດ້ຈາກສ່ອງຫວ່າງກົດໝາຍນິຕິກໍາກົດໝາຍ.

 

ຜູ້ປະກອບການອີງໃສ່ສ່ອງຫວ່າງຜູ້ປະກອບການດໍາເນີນທຸລະກິດວ່າເຂົາເຈົ້າບໍ່ມີຄວາມໂປ່ງໃສໃນເນື້ອແທ້ກໍຍັງແມ່ນເຈົ້າໜ້າທີ່ຄຸ້ມຄອງເກັບລາຍຮັບແຕ່ລະຂັ້ນຂອງພວກເຮົາມີຄວາມຮັບຜິຊອບຕໍ່ບັນຫານີ້ພວກເຮົາເຫັນວ່າເປັນບັນຫາທີ່ໄດ້ວິເຄາະວິໄຈອອກມາຈະແຈ້ງແລ້ວ.

ດັ່ງນັ້ນ, ທາງກະຊວງການເງິນໃນນາມເປັນເສນາທິການໃຫ້ແກ່ລັດຖະບານຈະສຸມໃສ່ 2 ບັນຫາໃຫຍ່ໃນການແກ້ໄຂເງິນຮົ່ວໄຫຼຂອງລາຍຮັບຈາກຄວາມຮັບຜິດຊອບ, ບັນຫາທີ 1 ຮີບດ່ວນປັບປຸງບາງກົດໝາຍບາງມາດຕາຂອງກົດໝາຍ ແລະ ນິຕິກໍາໃຕ້ກົດໝາຍທີ່ເປັນສ່ອງຫວ່າງໃຫ້ເຈົ້າໜ້າທີ່ຄຸ້ມຄອງເກັບລາຍຮັບພວກເຮົານີ້ສວຍໃຊ້ ໜ້າທີ່ຈະບໍໃຫ້ສວຍໃຊ້ໄດ້ຊິດໍາເນີນປັບປຸງກົນໄກໂຕນີ້ໃຫ້ຮີບດ່ວນຂອງຂະແໜງການເງິນພວກເຮົານີ້ຂອງລັດຖະບານ. 2 ໃຫ້ຜູ້ປະກອບການນີ້ມີຄວາມໂລ່ງໃຈມີຄວາມໂປ່ງໃສໃນການສະໝັກໃຈ ຫຼື ວ່າປະຕິບັດພັນທະຂອງຕົນເອງຜ່ານລະບົບທີ່ລັດຄຸ້ມຄອງທີ່ໂປ່ງໃສ.

ກ່ຽວພັນກັບການປັບປຸງກົນໄກນີ້ແກ້ໄຂການຮົ່ວໄຫຼນີ້ທາງຂະແໜງການເງິນຈະໄດ້ເລີ່ມໃຊ້ການປະຕິຮູບໃນແຜນ 5 ປີຄັ້ງທີ IX ຈະປະຕິຮູບກົນໄກຄຸ້ມຄອງການເງິນຢ່າງເລິກເຊິ່ງຮອບດ້ານ. ໃນນີ້, ພວກເຮົາຈະສຸມໃສ່ຮີບດ່ວນທີ່ສຸດດໍາເນີນການປັບປຸງກົງຈັກປະຕິຮູບຄຸ້ມຄອງເກັບລາຍຮັບໃຫ້ມີປະສິດທິຜົນປະສິດຕິພາບນັບແຕ່ສູນກາງຮອດທ້ອງຖິ່ນໂດຍສະເພາະແມ່ນກົງຈັກເກັບລາຍຮັບເມື່ອກ່ອນພວກເຮົາມີ 4 ກົມເກັບດຽວນີ້ໃຫ້ເຫຼືອແຕ່ກົມດຽວມອບໃຫ້ສ່ວຍສາອາກອນຜູ້ດຽວເປັນຜູ້ເກັບລາຍຮັບ, ຊຶ່ງຈະເຮັດໃຫ້ການພັດທະນາລະບົບຄຸ້ມຄອງທັນສະໄໝນີ້ມີການປະຢັດ ແລະ ຮັບປະກັນໃຫ້ແກ່ການຜັນຂະຫຍາຍທີ່ເປັນຕົ້ນທຶນປະຢັດ.

ການປະຕິຮູບກົງຈັກຄຸ້ມຄອງລາຍຈ່າຍ, ຊຶ່ງເຫັນວ່າຜ່ານມານີ້ພວກເຮົາຂາດປະສິດທິພາບຫຼາຍ, ຫຼາຍທ່ານຜູ້ແທນທີ່ສະເໜີວ່າການແບ່ງຂັ້ນຄຸ້ມຄອງຫົວໜ່ວຍທຸລະກິດທີ່ຂຶ້ນທະບຽນຢູ່ສູນກາງ ແລະ ເຄື່ອນໄຫວຢູ່ທ້ອງຖິ່ນລະກະທ້ອງຖິ່ນມາເຄື່ອນໄຫວຢູ່ສູນກາງເຫັນມັນຍ້ອນລະບົບຄຸ້ມຄອງຄັງເງິນເຮົາມັນມີສິ່ງອຸດຕັນມັນຕ້ອງໄດ້ປະຕິຮູບລະບົບໂຕນີ້, ເພື່ອເຮັດລາຍຮັບດັ່ງກ່າວເຂົ້າໄປສູ່ແຕ່ລະທ້ອງຖິ່ນ, ໄປພ້ອມກັນປັບປຸງກົງຈັກຄຸ້ມຄອງເກັບລາຍຮັບໃຫ້ມີປະສິດທິພາບມີຄວາມໂປ່ງໃສແທ້.

ວຽກງານການຄຸ້ມຄອງການແກ້ໄຂຮົ່ວໄຫຼລາຍຮັບດໍາເນີນການປະຕິຮູບກໍຄືການປັບປຸງບັນດາບຸກຄະລາກອນທີ່ຮັບຜິດຊອບວຽກງານນີ້ຢ່າງເລິກເຊິ່ງມີການດໍາເນີນຫຼາຍຂັ້ນຕອນຫຼາຍບາດກ້າວ ແລະ ຫຼາຍກົນໄກຫຼາຍວິທີການພວກເຮົາຊິໄດ້ດໍາເນີນແກ້ທັງປັບປຸງ ແລະ ປະຕິຮູບກົງຈັກທັງປັງປຸງຄົນໄປພ້ອມກັນ, ສ່ວນວ່າການຫັນເປັນທັນສະໄໝດໍາເນີນການແກ້ໄຂຕາມກົນໄກຕ່າງໆນີ້ຫັນເປັນທັນສະໄໝ, ແກ້ໄຂບັນດາກົງຈັກບັນດາຂອດຂັ້ນຂັນດາບັນຫາຕ່າງໆທີ່ມັນຍັງຄຸມເຄືອຢູ່ນີ້ໃຫ້ເຂົ້າສູ່ລະບົບການຫັນເປັນທັນສະໄໝໄປພ້ອມໆກັນເຮັດໃຫ້ມັນມີການຫັນປ່ຽນໃໝ່ຢ່າງຕັ້ງໜ້າ.

 

ສໍາລັບບັນຫາລາຍຈ່າຍໃຫ້ແກ່ຂົງເຂດສຶກສາ, ຂົງເຂດສາທາ, ປັດຈຸບັນການຕອບສະໜອງຍັງບໍ່ພໍແຕ່ແນວໃດກໍຕາມແຕ່ຈະພະຍາມ ແລະ ສົມທົບກັບສອງຂະແໜງການເບິ່ງລະອຽດ, ເພື່ອຈະສະໜອງໃຫ້ຕື່ມອັນໃດຄວນປັບແນວໃດ, ເພື່ອຮັດໃຫ້ບັນດາຄາດໝາຍຕ່າງໆທີ່ກໍານົດໄວສາມາດປະຕິບັດໄດ້ຕາມຄາດໝາຍ. 

ພາບ/ຂ່າວ:
ວັນທີອອກຂ່າວ:

02/04/2021

ວັນທີເກິດຂ່າວ:

22-26/03/2021

Close Menu
Top