ເຜີຍແຜ່ເອກະສານສຳຄັນຂອງພັກໃຫ້ສະມາຊິກພັກ ຂຶ້ນກັບຄະນະພັກຮາກຖານຫ້ອງການກະຊວງ

ໃນວັນທີ 18 ກຸມພາ 2020 ທີ່ຫ້ອງປະຊຸມໃຫຍ່ຊັ້ນ 4, ຄະນະບໍລິຫານງານພັກກະຊວງການເງິນ, ໄດ້ຈັດກອງປະຊຸມເຜີຍແຜ່ເອກະສານສໍາຄັນຂອງພັກເປັນຕົ້ນ: ມະຕິກອງປະຊຸມຄົບຄະນະບໍລິຫານງານພັກ ເປີດກວ້າງຄັ້ງທີ 1, ສະໄໝທີ III, ແຜນວຽກຈຸດສຸມໃນປີ 2021, ແຜນການປະຕິຮູບພັດທະນາຂະແໜງການເງິນໃນປີ 2021 ໃຫ້ສະມາຊິກພັກສົມບູນ-ສະມາຊິກພັກສຳຮອງທີ່ຂຶ້ນກັບຄະນະພັກຮາກຖານຫ້ອງການກະຊວງການເງິນ, ໂດຍການເປັນປະທານຂອງສະຫາຍ ສົມບູນ ອິນທະປັດຖາ ຄະນະປະຈໍາພັກກະຊວງ, ເລຂາຄະນະພັກຮາກຖານ, ຫົວໜ້າຫ້ອງການກະຊວງການເງິນ, ຄະນະເລຂາໜ່ວຍພັກ, ພ້ອມດ້ວຍບັນດາສະມາຊິກພັກເຂົ້າຮ່ວມ.

ໂອກາດດັ່ງກ່າວ, ສະຫາຍ ສົມບູນ ອິນທະປັດຖາ ໄດ້ນໍາເອົາເນື້ອໃນຂອງມະຕິກອງປະຊຸມຄົບຄະນະບໍລິຫານງານພັກເປີດກວ້າງຄັ້ງທີ 1 ສະໄໝທີ III ຂອງອົງຄະນະພັກກະຊວງການເງິນນໍາມາຈັດຕັ້ງຜັນຂະຫຍາຍ, ແຜນວຽກຈຸດສຸມໃນປີ 2021, ແຜນດໍາເນີນງານຂອງຄະນະບໍລິຫານງານພັກກະຊວງການເງິນປະຈໍາປີ 2021, ແຜນການປະຕິຮູບ ແລະ ພັດທະນາຂະແໜງການເງິນໃນປີ 2021 ໂດຍສຸມໃສ່ປັບປຸງນະໂຍບາຍ, ກົນໄກການຄຸ້ມຄອງການເງິນ, ຄຸ້ມຄອງລາຍຮັບ-ລາຍຈ່າຍງົບປະມານເພື່ອອັດຊ່ອງຫວ່າງການຮົ່ວໄຫຼ ແລະ ແກ້ໄຂປາກົດການຫຍໍ້ທໍ້ ໃນຂະແໜງການເງິນ, ແຜນງານຈຸດສຸມການຫັນເປັນທັນສະໄໝຂອງຂະແໜງການເງິນໃນປີ 2021, ແຜນການປະຕິຮູບການຈັດຕັ້ງ ແລະ ການຄຸ້ມຄອງບຸກຄະລາກອນຂະແໜງການເງິນແຕ່ສູນກາງຮອດທ້ອງຖິ່ນ ແລະ ການປັບປຸງວຽກງານຄຸ້ມຄອງ 3ຂະແໜງສາຍຕັ້ງ, ແຜນງານພັດທະນາບຸກຄະລາກອນຂອງຂະແໜງການເງິນ, ແຜນການກວດກາພັກກວດກາລັດຕ້ານການສໍ້ລາດບັງຫຼວງ ແລະ ແກ້ໄຂຜົນຂອງການກວດກາຂະແໜງການເງິນ.

      ກອງປະຊຸມໃນຄັ້ງນີ້, ຖືວ່າມີຄວາມສໍາຄັນຫຼາຍຕໍ່ການຈັດຕັ້ງປະຕິບັດຜົນສໍາເລັດຂອງມະຕິກອງປະຊຸມໃຫຍ່ ຄັ້ງທີ III ຂອງອົງຄະນະພັກກະຊວງການເງິນ, ໂດຍສະເພາະແມ່ນການສ້າງເປັນແຜນງານ ແລະ ວຽກຈຸດສຸມໃນປີ 2021 ຂອງແຕ່ລະຂົງເຂດວຽກງານ. ນອກນັ້ນ, ບັນດາສະມາຊິກພັກຍັງໄດ້ຮັບຮູ້ ແລະ ເຂົ້າໃຈສາມາດນໍາໄປຜັນຂະຫຍາຍເປັນໂຄງການລະອຽດໃນການຈັດຕັ້ງປະຕິບັດ ແລະ ພ້ອມກັນຍົກສູງຄວາມຮັບຜິດຊອບຂອງຕົນເພື່ອເສີມຂະຫຍາຍຫົວຄິດປະດິດສ້າງ, ຍົກສູງຄວາມສາມາດ, ສະແດງຄວາມຈິງໃຈປະກອບຄໍາຄິດຄໍາເຫັນຢ່າງກົງໄປກົງມາ ດ້ວຍຄວາມຮັບຜິດຊອບສູງ, ບົນຈິດໃຈທີ່ສ້າງສັນ ແລະ ສາມາດນໍາໄປຈັດຕັ້ງປະຕິບັດໃຫ້ປະກົດຜົນເປັນຈິງ.

ພາບ/ຂ່າວ:
ວັນທີອອກຂ່າວ:

22/02/2021

ວັນທີເກິດຂ່າວ:

18/02/2021

Close Menu
Top